ރައީސް ޑރ.މުހައްމަދު މުއިއްޒުއަށް ސިހުރު ހެދިކަމުގެ ތުހުމަތުގައި ހައްޔަރުކުރި އެންވަޔަރަމަންޓް މިނިސްޓްރީގެ ސްޓޭޓް މިނިސްޓަރު ފާތިމަތު ޝަމްނާޒް އަލީ ސަލީމް އަށް ދައުވާ ނުކުރަން ޕްރޮސެކިއުޓާ ޖެނެރަލް (ޕީޖީ)ގެ އޮފީހުން މިއަދު ނިންމައިފިއެވެ.
މިދިޔަ މަހުގެ ފަހުކޮޅު ފުލުހުން ބުނީ މި މައްސަލާގައި ހިމެނޭ އެންމެންގެ މައްޗަށް ދައުވާކުރުމާ މެދު ޕީޖީއިން މަޝަވަރާކުރަމުން އަންނަކަމަށެވެ. އަދި މިއަދު ޕްރޮސެކިއުޓާ ޖެނެރަލް (ޕީޖީ) އޮފީހުން ބުނީ އެ މައްސަލައިގައި ޕީޖީއަށް އެއްވެސް މިންވަރަކަށް ހެއްކެއް ފެނިފައިނުވާ ކަމަށާއި އެހެންކަމުން ދައުވާކުރަން ނުފޮނުވަން ނިންމީކަމަށެވެ.
ސިހުރު ހެދިކަމުގެ ތުހުމަތުގައި މި އަހަރު ޖޫން މަހުގެ 23 ވަނަ ދުވަހު ޝިމްނާޒު ހައްޔަރުކުރި އިރު އޭނާ އާއި އެކު އިތުރު ދެމީހުންވެސް ވަނީ ހައްޔަރުކޮށްފައެވެ. މި މައްސަލައިގެ ތުހުމަތުގައި ދެން ހައްޔަރުކޮށްފައިވަނީ އޭނާގެ އެއްބަނޑުއެއްބަފާ ކޮއްކޮ، ހައްވާ ސަނާ އަލީ ސަލީމް އާއި ސިހުރު ހެދި ކަމަށް ބުނާ މުލީއާގޭގެ ކުރީގެ ކައްކާ ތ. ކިނބިދޫ، ނިވައިދޮށުގޭ، ހުސައިން ސަމީރުއެވެ.
އެހެންނަމަވެސް ސިހުރު ހެދިކަމުގެ ތުހުމަތުގައި ހައްޔަރުކުރި ސަމީރު އޭގެ 7 ދުވަސް ފަހުން ވަނީ ދޫކޮށްލާފައެވެ. ޝަމްނާޒު އާއި ސަނާ ބަންދުން ދޫކޮށްލީ އޭގެ 20 ދުވަސް ފަހުން ޖުލައި 13 ވަނަ ދުވަހުގައެވެ.
