ކުރިއަށް އޮތް ތިން ދުވަހު، މާލެ ސަރަހައްދަށް އެއް މަސް ދުވަހުގެ ވާރޭވެހުން އެކަށީގެންވާ ކަމަށް އިންޓަނޭޝަނަލް ވެދާ ރިޕޯޓިން އިން ބުނެފިއެވެ.
އަލްޖަޒީރާއިން ދުނިޔޭގެ އެކު ގައުމުތަކުގެ މޫސުން ލަފާކޮށް ބުނެފައިވަނީ، ރާއްޖޭގެ ވެރިރަށް މާލެ އަށް ކުރިއަށް އޮތް 72 ގަޑިއިރުގެ ތެރޭގައި އެއް މަސްދުވަހުގެ ވާރޭވެހުން އެކަށީގެންވާ ކަމަށެވެ.
ފާއިތުވި 24 ގަޑިއިރުގެ ތެރޭގައި މާލެއަށް ވަނީ 30.8 މިލިމީޓަރު ވާރޭވެހިފައިވާއިރު، ހުޅުލެއަށް 59.4 މިލިމީޓަރުގެ ވާރޭ އަދި ހުޅުމާލެއަށް 31.5 މިލިމީޓަރުގެ ވާރޭވެހިފައިވެއެވެ.
މިހަފްތާގައި ރާއްޖެއަށް ވިއްސާރަކުރާނެކަމަށް ލަފާކޮށް މޫސުމަށް ސަމާލުވުމަށް މެޓް އޮފީހުން އިލްތިމާސްކޮށްފައިވާއިރު، މިއަދު ހެނދުނު 09:00 އިން 15:00 އަށް މުޅި ރާއްޖެއަށް ހުދު ސަމާލުވަނީ ނެރެފައެވެ. އަދި ބޯކޮށް ވާރޭވެހުމާއެކު ގަޑިއަކު 19 މޭލާއި 24 މޭލާއި ދެމެދުގެ ބާރު މިނުގައި ވައިޖެހޭނެކަމަށް ވަނީ ލަފާކޮށްފައެވެ. އަދި ވިލާގަނޑުގައި ގަޑިއަކު 45 މޭލަށް ވައިގަދަވާނެކަމަށް ވަނީ ލަފާކޮށްފައެވެ.
