ގަވާއިދާ ހިލާފަށް ވިޔަފާރި ކުރަމުްނދިޔަ ބިދޭސީންތަކެއް އަނެއްކާވެސް ހައްޔަރުކޮށްފިއެވެ.
މިފަދަ ވިޔަފާރިތައް ކުރަމުންދާ ބިދޭސީން ހޯދުމަށް އިމިގްރޭޝަނާއި ފުލުހުން ގެންދަނީ މިިދިޔަ ނޮވެމްބަރުން ފެށިގެން ހާއްސަ އޮޕަރޭޝަންތަކެއް ކުރިއަށް ގެންދަމުންނެވެ.
ސިލްސިލާކޮށް މާލެ ސަރަހައްދުގައި ހިންގަމުންދާ މި އޮޕަރޭޝަންގެ ތެރެއިން އިއްޔެ ވަނީ ހުޅުމާލޭގައި ހިންގަމުންދިޔަ ބޯކޮށާ ތަންތަނަށް އަމާޒުކޮށްގެން ރެއިޑު ހިންގާފައެވެ. މި ރެއިޑުތަކުގައި 06 ތަނެއް ބަލާ ފާސްކޮށް 4 ތަނެއް ބަންދުކޮށްފައިވާ ކަމަށް އިމިގްރޭޝަނުން ބުނެއެވެ. އަދި ގަވާއިދާ ހިލާފަށް އުޅެމުންދިޔަ 7 ބިދޭސީން އަތުލައިގަނެފައިވާ ކަމަށް އިމިގްރޭޝަނުން ބުނެއެވެ.
އަދި މި ފަހުން ބިދޭސީން ހިންގާ ކުދި ރީޓެއިލް ފިހާރަ އަދި ޓޭކްއަވޭ ކޮފީ ޝޮޕްތަކުންނާއި މާލޭގައި ހިންގާ ހަށި ވިއްކާ ތަންތަނުން ވެސް ބިދޭސީން ހައްޔަރު ކުރަމުންދާއިރު ގަވާއިދާ ހިލާފަށް އުޅޭ ބިދޭސީން އަނބުރާ ގައުމަށް ފޮނުވާލުމަށް މި ސަރުކާރުން ދަނީ ގިނަ މަސައްކަތްތަކެއް ކުރަމުންނެވެ.
އެގޮތުން އިއްޔެ ވެސް ޓޭކްއަވޭ 7 ތަނެއް ބަލާ ފާސްކޮށް 4 ބިދޭސީން ހައްޔަރުކޮށްފައިވާއިރު ދާދިފަހުން ވަނީ ވީރާނާވެފައިވާ ގެއެއްގައި ވިޔަފާރިއަށް ކާބޯތަކެތި ތައްޔާރު ކުރަމުން ދިޔަ 3 ބިދޭސީއަކުވެސް ހައްޔަރުކޮށްފައެވެ.
އިމިގްރޭޝަންއިން ބުނީ ކާބޯތަކެތި ތައްޔާރުކުރަމުންދިޔަ އެ ގެ ބަލައި ފާސްކޮށްފައި ވަނީ "އިމިގްރޭޝަން ވޮޗް"އަށް ލިބުނު ރިޕޯޓަކާ ގުޅިގެން ކަމަށެވެ. އެ ރެއިޑުގައި ގިނަ އަދަދަކަށް އާންމުން ފިހާރަތަކުން ގަނެއުޅޭ ކާބޯތަކެތި ވަނީ ފެނިފައެވެ.
ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލު ކުރުމަށް ރައްޔިތުން ދޭ އެއްބާރުލުން ފާހަގަކޮށް އިމިގްރޭޝަނުން ވަނީ ޝުކުރު އަދާކޮށްފައެވެ. އަދިވެސް މިފަދަ މައްސަލަތައް "އިމިގްރޭޝަން ވޮޗް" މެދުވެރިކޮށް ރިޕޯޓު ކުރަމުން ދިއުމަށް ވެސް އިމިގްރޭޝަނުން ވަނީ އެދިފައެވެ.
