ވާރޭ ވެހި މާލޭގެ ބައެއް ސަރަހައްދުތަކުގައި ފެންބޮޑުވުމާ ގުޅިގެން، އައިޖީއެމްއެޗް ކައިރީގައި ފެންހިންދުމުގެ މަސައްކަތް އެމްއެންޑީއެފުން ކޮށްފިއެވެ.
އެމްއެންޑީއެފް އިން ބުނީ ފެންބޮޑުވުމާ ގުޅިގެން އެމްއެންޑީއެފްގެ ފަޔާ އެންޑް ރެސްކިޔު ސާވިސްގެ ސިފައިން ހަރަކާތްތެރިވާން ފަށާފައިވާ ކަމަށެވެ.
ބޯކޮށް ވާރޭވެހޭނެ ކަމަށާއި ގުގުރާނެ ކަމަށް ލަފާކޮށް މެޓު އޮފީހުން ވަނީ ބ އަތޮޅުން ފެށިގެން ލ އަތޮޅަށް މިއަދުގެ 19:00 އިން ފެށިގެން މާދަމާގެ 1:00 އަށް ހުދު ސަމާލުވެސް ނެރެފައެވެ. މެޓު އޮފީހުން ބުނީ ވައިގަދަވާނެ ކަމަށް ލަފާކުރެވޭ ކަމަށާއި އެގޮތުން 40 މޭލަށް ވައި ގަދަވާނެ ކަމަށް ލަފާކުރެވޭ ކަމަށެވެ.
މާލޭގެ ފެންބޮޑުވުމުގެ މައްސަލަ ހައްލުކުރަން ޑިފެންސް މިނިސްޓްރީ އާއި އިމާރާތް ކުރުމާއި ބިނާރާ ބެހޭ ވުޒާރާގެ އިތުރުން ރޯޑްޑިވެލޮޕްމަންޓް ކޯޕަރޭޝަން (އާރްޑީސީ) ގުޅިގެން ވަނީ މެއި މަހުގެ 9 ވަނަ ދުވަހު މަޝްރޫއެއް ފަށާފައެވެ.
މި މަޝްރޫއުގެ ދަށުން ފުރަތަމަ ފެންބޮޑުވުމުގެ މައްސަލަ ހައްލުކުރަން ނިންމާފައި ވަނީ ވެސްޓް ޕާކު ސަރަހައްދެވެ. މިއީ މާލޭގެ މަގުތަކުގައި ފެންބޮޑުވެ ރައްޔިތުންނަށް ދިމާވާ ތަކުލީފުތައް ކުޑަކޮށްދެއްވުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އެންގެވުމަށް ކުރިއަށްގެންދާ މަޝްރޫއެކެވެ.
ބޯކޮށް ވާރޭވެހި މާލޭގައި ފެންބޮޑުވާ މައްސަލައަކީ އަހަރުތަކެއް ވަންދެން ހައްލެއް ނުލިބި އޮތް މައްސަލައެކެވެ. ވެރިކަމަށް އަންނަ ކޮންމެ ސަރުކާރަކުންވެސް މި މައްސަލަ ހައްލު ކުރުމަށް އެކި މަސައްކަތްތައް ކުރި ނަމަވެސް މިހާތަނަށް މިކަމެއް ހައްލެއް ލިބިފައި ނުވެއެވެ.
މިކަމުގެ ސަބަބުން އާންމު ރައްޔިތުންނަށް ވެސް ބޮޑެތު ގެއްލުންތަކާ ކުރިމަތިލާން ޖެހެއެވެ. އެގޮތުން ވާރޭވެހިި މަގުތަކުގައި ފެންބޮޑުވެ ގޭގޭއަށް ފެންވަދެ ހިފާ ގެންގުޅޭ ސާމާނުތަކަށް ފެނުގެ އަސަރުކުރުމަކީ އާންމުކޮށް ދިމާވާ ކަންކަމެވެ.
