މާލެ އާއި ހުޅުމާލެއިން ކަރަންޓު ބިލު އިންތިހާއަށް ބޮޑު ގެތަކުން އެނާޖީ އޮޑިޓެއް ހަދަން ސްޓެލްކޯއިން ނިންމައިފިއެވެ.
މިއަދު ސްޓެލްކޯއިން ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ސްޓެލްކޯގެ މެނޭޖިން ޑިރެކްޓަރު ހުސައިން ފަހުމީ ވިދާޅުވީ މާލެއަށް ބަލާއިރު 6 އިންސައްތަގެ ކަރަންޓު ބިލުތައް އިންތިހާއަށް ބޮޑުވެފައިވާކަމަށާއި، އެކަމުގެ ތަފްސީލެއް އެ ކުންފުނިން ބަލާ މައުލޫމާތު ހިއްސާކުރާނެ ކަމަށެވެ.
މާލޭގެ އިތުރުން ހުޅުމާލޭގެ ވެސް 15 އިންސައްތަ ބިލުތައް ބޮޑުކަމަށާއި މި ކަން ބެލުމަށް ސްޓެލްކޯގެ ޓީމެއް އެ އެޕާޓްމެންޓުތަކަށް ފޮނުވާނެ ކަމަށް ފަހުމީ ވަނީ ވިދާޅުވެފައެވެ.
ފަހުމީ ވިދާޅުވީ މާލެ އަދި ހުޅުމާލޭގެ ބިލްތައް އާދަޔާ ހިލާފަށް ބޮޑުވެފައިވާ އެޕާޓްމެންޓުތަކަށް ސްޓެލްކޯގެ ޓީމެއް ގޮސް އެނާޖީ އޮޑިޓެއް ހަދާނެ ކަމަށާއި އެގޮތުން އެ އެޕާޓްމެންޓުތަކުގައި ބޭނުން ކުރަނީ ކޮން ކަހަލަ އާލާތްތަކެއްތޯ އަދި އެ އެޕާޓްމެންޓު ތަކުގެ ވެންޓިލޭޝަންތައް ޗެކު ކުރާނެ ކަމަށެވެ.
ނަމަވެސް ފަހުމީ ވިދާޅުވީ ޖުމްލަ ކޮށް އެހެން މަސްތަކާ އަޅާބަލާއިރު މި މަހު ކަރަންޓު ބިލާ ބެހޭ ގޮތުން ލިބުނު ޝަކުވާގެ އަދަދުވެސް މަދު ކަމަށާއި، މިދިޔަ މަހާ އަޅާބަލާއިރު މި މަހު 94 އިންސައްތަ ކަރަންޓު ބިލްތައް ވަނީ ކުޑަވެފަކަމަށެވެ.
ނަމަވެސް ސޯޝަލް މީޑިއާގައި އެކި ފަރާތްތަކުން ދަނީ ކަރަންޓު ބިލުތަކުގެ ފޮޓޯ ހިއްސާކުރުމަށް ފަހު، ކަރަންޓު ބިލު ބޮޑުވާ ކަމުގެ ޝަކުވާތައް ކޮށްފައެވެ. މިކަމާ ގުޅިގެން ސްޓެލްކޯއިން ވަނީ ސޯޝަލް މީޑިއާގައި ދައުރުވާ ހުރިހާ ވާހަކައަކީ ތެދެއް ނޫން ކަމަށާއި ބައެއް ފަހަރު ބައެއް ފަރާތްތަކުން ކަރަންޓު ބޭނުންކުރުމުގައި ގަވައިދާ ހިލާފުވުމުން ޖޫރިމަނާ ކުރާކަން ފާހަގަކޮށް އެ ޖޫރިމަނާ ބިލުގައި ހިމެނުމުންވެސް ބިލު ބޮޑުވާކަން ފާހަގަކޮށްފައެވެ. އެހެންކަމުން ބިލުބޮޑުވާން ދިމާވާ ސަބަބު ދެނެގަތުމަށް އެނާޖީ އޮޑިޓަކީ މުހިންމު ކަމަކަށް ވާނެ ކަމަށް ސްޓެލްކޯއިން ވަނީ ބުނެފައެވެ.
މިގޭ ބިލް 4000 ގައި ހުރެފާ، ކުއްލިއަކަށް 5،900 އަށް. ޢަދި މި ބޮޑުވީ ގެ ތަޚުލާފަ، 15 ދުވަހު އެންމެން ރަށަކަށް ދިޔަ މަހު! ދެން ޖެހުނު މަހު ވެސް 5400 އަށް! ދެން މިބުނަނީ މިހާރު ބިލް ތިރިވިއްޔޭ! ދުވަހަކު މިގޭ ބިލް 4000، 4200 މިއަށް ވުރެން ކުރީގެ އެއްވެސް ސަރުކާރެއްގައި ބޮޑެއްނުވޭ!