ދިވެހި ރާއްޖެއާއި އިންޑިއާ އާ ދެމެދު ފަތުރުވެރިކަމުގެ ގުޅުން އިތުރަށް ބަދަހި ކުރުމަށް، އިންޑިއާގެ ޓޫރިޒަމް މިނިސްޓަރު ޝްރީ ގަޖެންޑްރަ ސިންގް އާއެކު މުހިންމު މަޝްވަރާތަކެއް ކޮށްފިއެވެ.
މި ބައްދަލުކުރުމާ ގުޅޭގޮތުން ފައިސަލް ވިދާޅުވީ އުންމީދަކީ މުސްތަގުބަލުގައި ދެ ގައުމުގެ ފަތުރުވެރިކަމުގެ ދާއިރާ އިތުރަށް މުއްސަނދިވެގެން ދިއުން ކަމަށާއި، ދެ ގައުމުގެ ދެމެދު ފަތުރުވެރިކަމުގެ ގުޅުން ބަދަހި ކުރުމަށް ކުރެވިދާނެ މުހިންމު ކަންތައްތަކާ މެދު މަޝްވަރާ ކުރެވިފައިވާ ކަމަށެވެ.
އިންޑިއާގައި ރާއްޖޭގެ ފަތުރުވެރިކަން އިސްތިހާރުކުރުމަށް ބާއްވާ "ވެލްކަމް އިންޑިއާ" ރޯޑްޝޯގައި ބައިވެރިވެވަޑައިގަތުމަށް ޓޫރިޒަމް މިނިސްޓަރު އިބްރާހިމް ފައިސަލް އިއްޔެ ވަނީ އިންޑިއާއަށް ފުރާވަޑައިގެންފައެވެ.
އެމްއެމްޕީއާރްސީއިން ބުނީ "ވެލްކަމް އިންޑިއާ" ރޯޑްޝޯގެ މަގްސަދަކީ ރާއްޖޭގެ ރީތި ގޮނޑުދޮށްތަކާއި ލަގްޒަރީ ރިސޯޓްތަކާއި ހިތްގައިމު ގެސްޓްހައުސްތަކާއި މުއްސަނދި ސަގާފީ ތަރިކަތައް ދައްކާލުން ކަމަށެވެ. އަދި އިތުރުވަމުންދާ ޑިމާންޑްގެ ބޭނުން ހިފައި، އިންޑިއާގެ ފަތުރުވެރިންގެ މެދުގައި އެންމެ މަގޫބުލު މަންޒިލެއްގެ ގޮތުގައި ރާއްޖެ ހެދުމަކީ މަގުސަދެއް ކަމަށް ވެސް އެމްއެމްޕީއާރްސީއިން ވަނީ ބުނެފައެވެ.
އިންޑިއާގެ ޓޫރިޒަމް މިނިސްޓަރު ޝްރީ ގަޖެންޑްރަ ސިންގް އާއި ފައިސަލް ބައްދަލުކުރައްވާފައިވާއިރު، ދާދި ފަހުން ފައިސަލް ވަނީ އިންޑިއާ އިން ރާއްޖެއަށް ކަނޑައަޅާފައިވާ ސަފީރު މުނޫ މަހާވަރާ އެކުވެސް ދެ ގައުމުގެ ފަތުރުވެރިކަމުގެ ގުޅުން އިތުރަށް ބަދަހި ކުރުމަށް މުހިންމު މަޝްވަރާތަކެއް ކޮށްފައެވެ.
