މަޝްހޫރު ވިޔަފާރިވެރިޔާ، މ.މެޑޯޒް، އަބްދުއްލަތީފު ހުސައިން މަނިކު (އަތަމާ އަބްދުއްލަތީފް) ގެ ޖަނާޒާ މާދަމާ ބާއްވަން ހަމަޖައްސައިފިއެވެ.
އަބްދުއްލަތީފްގެ ކަށުނަމާދު ބޭއްވުމަަށް ހަމަޖެހިފައި ވަނީ މާދަމާ މެންދުރު ނަމާދަށްފަހު އިސްލާމީ މަރުކަޒުގައެވެ. މައްޔިތާގެ މޫނު ދެއްކުން މާދަމާ ހެނދުނު 8:00 އިން ފެށިގެން އިސްލާމީ މަރުކަޒުގައި ކުރިއަށް ގެންދިއުމަށް ވަނީ ހަމަޖެހިފައެވެ. އަބްދުއްލަތީފް ފަސްދާނު ލުމަށް ހަމަޖެހިފައި ވަނީ ގަލޮޅު ސަހަރާގައެވެ.
އަތަމާ އަބްދުއްލަތީފް އަވަހާރަވީ އިރު އުމުރުފުޅަކީ 94 އަހަރެވެ. އާލާސްކަންފުޅާ އުޅުއްވައި އޭޑީކޭ ހޮސްޕިޓަލްގައި ފަރުވާ ހޯއްދަވަމުން ދަނިކޮށް އޭނާ އަވަހާރަވީ މިއަދު މެންދުރުގެ ވަގުތެއްގައެވެ.
އަބްދުއްލަތީފް އަވަހާރަވީ އިރު ހަތަރު ކައިވެންޏެއް ކުރައްވާފައި ވެއެވެ. އަދި އޭނާގެ ނުވަ ބޭފުޅުން ލިބިވަޑައިގެންފައިވާ އިރު، ފަސް ފިރިހެން ބޭފުޅުންނާއި ހަތަރު އަންހެން ބޭފުޅުން ހިމެނެއެވެ.
ވިޔަފާރީގައި ވަރަށް ފުޅާ ދާއިރާއެއްގައި މަސައްކަތް ކުރައްވާ އަބްދުއްލަތީފަކީ ދިވެހިންނަށް އެކި ކަންކަމުގައި އެހީތެރިކަން ފޯރުކޮށް ދެއްވުމުގައި ނަމޫނާ ބޭފުޅެކެވެ. އެގޮތުން ދިވެހިން ހައްޖަށް ގެންދިއުމުގެ ހިދުމަތުގައި ވެސް އޭނާ ވަނީ ގިނަ އަހަރުތަކެއް ވަންދެން މަސައްކަތް ކުރައްވާފައެވެ.
މަޖީދިއްޔާ ސްކޫލުގައި ހިސާބު ޓީޗަރެއްގެ ވަޒީފާ އަދާ ކުރެއްވުމަށްފަހު ސަރުކާރުން މާލޭގައި ހިންގި މަޝްހޫރު ގައުމީ ހޮޓަލުގެ މެނޭޖަރުކަން އަބްދުއްލަތީފު ވަނީ ކުރައްވާފައެވެ. އެއަށް ފަހު އަމިއްލަ ވިޔަފާރީގެ މަސައްކަތް ފެއްޓެވި އިރު އެންމެ ފުރަތަމަ ފެއްޓެވީ ހާޑްވެއާ ސާމާނު ވިއްކުމެވެ. އެއަށް ފަހު ހައްޖަށް މީހުން ގެންދިއުމާއި ޓޫރިޒަމްގެ ވިޔަފާރީގެ ތެރެއަށް ވެންނެވިއެވެ.
އަބްދުއްލަތީފް ވަނީ ވިޔަފާރީގެ ނަފާއިން މާލެ އާއި އަތޮޅުތެރޭގައި މިސްކިތްތަކެއް ވެސް ބިނާކޮށް ދެއްވާފައެވެ. އޭނާގެ ހިދުމަތުގެ އަގު ވަޒަންކޮށް ސަރުކާރުން ވަނީ ގައުމީ އިނާމް ވެސް ދީފައެވެ.
