ވައިގެ މަގުން ރާއްޖެ އެތެރެކުރަން އުޅުނު 15.38 ކިލޯގެ މަސްތުވާތަކެތި އަތުލައިގެންފިއެވެ.
ފުލުހުންނާއި ކަސްޓަމްސް ގުޅިގެން ހިންގި އޮޕަރޭޝަނެއްގައި 15.38 ކިލޯގެ މަސްތުވާތަކެތި އަތުލައިގަނެ ދެ މީހަކު ވަނީ ހައްޔަރު ކޮށްފައެވެ. މިކަމާ ގުޅިގެން މައުލޫމާތު ދެއްވަމުން ކަސްޓަމްސްގެ އެސިސްޓަންޓް ކޮމިޝަަނާ މުހައްމަދު މަސީހު ވިދާޅުވީ މިމަހުގެ 27 ވަނަ ދުވަހުގެ ހެނދުނު ރާއްޖެއައި އުމުރުން 44 އަހަރުގެ މީހެއްގެ ފޮށިތަންމަތި ކަސްޓަމްސްއިން ބެލިބެލުމުން ގާނޫނާއި ގަވާއިދާއި ހިލާފު ތަކެތި އެފޮށިން ފެނިފައިވާކަމަށާއި އެ ފޮށިން ފެނުނު ތަކެތީގެ ފުރަތަމަ މަރުހަލާގައި މަސްތުވާތަކެތީގެ ބާވަތެއްކަމުގައިވާ ކެނެބިސް އަށް ޕޮޒިޓިވްވެފައިވާކަމަށެވެ.
މިއީ މިއަހަރު މިހާތަނަށް ކަސްޓަމްސް އަތުލައިގަނެވުނު މަސްތުވާތަކެތީގެ އެންމެ ބޮޑު މައްސަލަކަން ފާހަގަކުރައްވާ މަސީހު ވިދާޅުވީ އަތުލައިގަނެވުނު 15.38 ކިލޯގެ މަސްތުވާތަކެތީގެ މަގުމަތީ އަގު 12.3 މިލިއަން ދިވެހި ރުފިޔާއަށް އަރާކަމަށެވެ.
ކަސްޓަމްސްގެ ސްޕްރިންޓެންޑެންޓް މުހައްމަދު އަފްޒަލް ވިދާޅުވީ، މިއޮޕަރޭޝަނުގައި ރާއްޖެ އައި މީހަކީ މެލޭޝިޔާ މީހެއްކަމަށާއި އޭނާ އަތުން ފޭކް ޓިކެޓެއްވެސް ފެނިފައިވާކަމަށެވެ. އަދި އޭނާގެ ޓްރެވަލް ރޫޓް އޮޅުވާލުމަށް މަސައްކަތްކޮށްފައިވާކަމަށާއި، މިއީ ރާއްޖެއަށް އައި މެލޭޝިއާ ޕަސިންޖަރެއްގެ އަތުން މަސްތުވާތަކެތި ފެނުނު ފުރަތަމަ ފަހަރުކަމަށްވެސް އަފްޒަލް ވަނީ ވިދާޅުވެފައެވެ.
މި ކޭސް އާ ގުޅިގެން މައުލޫމާތު ދެމުން ފުލުހުން ބުނީ މި އޮޕަރޭޝަންގައި ހައްޔަރު ކުރެވުނު މީހާއާއި އަތުލައިގަނެފައިވާ ތަކެއްޗާއި ގުޅުންހުރި 41 އަހަރުގެ މެލޭޝިއާ ފިރިހެނަކު ހައްޔަރުކޮށްފައިވާކަމަށާއި އެދެމީހުންގެ ބަންދާއިމެދު ގޮތެއް ނިންމުމައްޓަކައި ކްރިމިނަލްކޯޓަށް ހާޒިރުކުރުމުން ފަސް ދުވަހުގެ ބަންދުގެ މުއްދަތެއް ދީފައިވާކަމަށެވެ.
