މި އަހަރުގެ މިހާތަނަށް 64.84 ކިލޯގެ މަސްތުވާތަކެތި އަތުލައިގަނެފައިވާ ކަމަށް މޯލްޑިވްސް ކަސްޓަމްސް އިން ބުނެފިއެވެ.
ކަސްޓަމްސްގެ ތަފާސް ހިސާބުތައް އާންމުކުރަމުން މިއަދު ބޭއްވި ނޫސްވެރިންގެ ބައްދަލުވުމެއްގައި ކަސްޓަމްސް އިން ބުނީ މި އަހަރުގެ މިހާތަނަށް 64.84 ކިލޯގެ މަސްތުވާތަކެތި އަތުލައިގަނެފައިވާކަމަށާއި، އޭގެ ލަފާކުރާ މަގުމަތީ އަގު 106،358،952 ދިވެހި ރުފިޔާއަށް އަރާ ކަމަށެވެ.
ކަސްޓަމްސްގެ ތަފާސް ހިސާބުތަކުން ހާމަވާ ގޮތުގައި މި އަހަރު އެންމެ ގިނައިން އަތުލައިގަނެފައިވަނީ ކެނަބިސްގެ ބާވަތްތަކެވެ. އެގޮތުން 17.38 ކިލޯގެ ކެނަބިސް އަތުލައިގަނެފައިވާ އިރު، 5 ކޭސް އަކުން 11.60 ކިލޯގެ ހެރޮއިން ވެސް ވަނީ އަތުލައިގަނެފައެވެ. މީގެއިތުރުން ކޮކައިން ގެ 15.64 ކިލޯވެސް ވަނީ އަތުލައިގަނެފައެވެ.
މަސްތުވާތަކެތީގެ މައްސަލަތައް ހައްލުކުރުމަށް ފުލުހުން ހާއްސަ އޮޕަރޭޝަންތައް ހިންގަމުން ދާއިރު، މި މަހުގެ 27 ވަނަ ދުވަހުވެސް ވަނީ ދެ މިލިއަން ރުފިޔާގެ މަސްތުވާތަކެތި އެތެރެކުރި މައްސަލައެއްގައި ދެ ދިވެއްސަކާއި ބިދޭސިއަކު ހައްޔަރުކޮށްފައެވެ. ކަސްޓަމްސް އިން ބުނީ މި މައްސަލައިގައި އަތުލައިގަނެފައިވަނީ ޕާކިސްތާނުގެ މީހެއްކަމަށާއި، އެތެރެކުރެވުނު މަސްތުވާތަކެތީގެ މަގުމަތީގެ އަގަކީ 2.12 މިލިއަން ރުފިޔާ ކަމަށެވެ.
މި ތިން މީހުންގެ ބަންދަށްވެސް ވަނީ 15 ދުވަހުގެ މުއްދަތެއް ޖަހާފައެވެ.
