މާލޭގެ ފަޅު ގެއެއްގައި ޖަމާކޮށްފައި ހުރި ކުނިތަކެއްގައި ރޯވެ، އަލިފާނުގެ ހާދިސާއެއް ހިނގައިފިއެވެ.
ސިފައިން ބުނީ، ރޯވެފައި ވަނީ ބުރުޒުމަގުގައި ހުންނަ މ. އޯކިޑްޕްލާޒާގޭގައި ކަމަށެވެ.
ސޯޝަލް މީޑިއާގައި އާންމުވެފައިވާ ބައެއް މަންޒަރުތަކުން ފެންނަ ގޮތުގައި، ރޯވެފައިވަނީ އޯކިޑްޕްލާޒާގޭގެ ފުރަތަމަ ފަންގިފިލާގައެވެ. އެ ސަރަހައްދުގައި ފުލުހުން ވެސް އެވަގުތު ހަރަކާތްތެރިވަމުން ދިޔައެވެ.
އެ ހާދިސާގެ މައުލޫމާތު ރޭ ފަތިހު 3:30 ހާއިރު ލިބުމުން، ސިފައިން އެ ސަރަހައްދަށް ގޮސް ކުރި މަސައްކަތުން އަލިފާން އެއްކޮށް ނިއްވާލެވުނީ ފަތިހު 4:50 ހާއިރު ކަމަށް، ސިފައިން މައުލޫމާތު ދެއެވެ.
މި ހާދިސާގެ ސަބަބުން އެއްވެސް މީހަކަށް އަނިޔާއެއް ނުވާ ކަމަށް ސިފައިން ބުންޏެވެ.
