މިދިޔަ އަހަރުގެ ފުރަތަމަ ހަ މަސްދުވަހާ އަޅާ ބަލާއިރު، މިދިޔަ ހަ މަހު މާލެ ސިޓީ ކައުންސިލްގެ ހަރަދު ކުޑަކުރެވި އާމްދަނީ އިތުރު ކުރެވިފައި ވާ ކަމަށް، މޭޔަރު އާދަމް އާޒިމް ރޭ ވިދާޅުވެއްޖެއެވެ.
މާލޭގެ ރައްޔިތުންނާ އެކު ކައުންސިލުން ރޭ ބޭއްވި ބައްދަލުވުމުގައި ވާހަކަ ދައްކަވަމުން އާޒިމް ވިދާޅުވީ، މޭޔަރުކަމާ ހަވާލުވެ ވަޑައިގަތުމަށް ފަހު މުޅި އާންމުންނާ ވަކިވަކިން ބައްދަލުކުރައްވައި، މުޅި މާލެ ސަރަހައްދަށް ދިމާވެފައިވާ މައްސަލަތަށް ހައްލު ކުރުމަށްޓަކައި މަސައްކަތް ކުރައްވަމުން ގެންދަވާ ކަމަށެވެ.
އެގޮތުން މާލެއަށް ދިމާވެފައިވާ ބޯހިޔާވަހިކަމުގެ މައްސަލަ ހައްލުކޮށް މާލޭގެ ރައްޔިތުންނަށް ބޯހިޔާވަހިކަން ހޯދައިދިނުމަށާއި، މަސްތުވާތަކެތީގެ މައްސަލަ ހައްލުކުރުމަށް ސަރުކާރާ ގުޅިގެން މާލެ ސިޓީ ކައުންސިލުން މަސައްކަތްކުރަމުން ދާނެ ކަމަށް ވިދާޅުވެ، ޗައިނާގެ ސަރުކާރާ ގުޅިގެން މާލޭގެ މަގުތައް ރަނގަޅު ފެންވަރަކަށް ހެދުމަށް ސަރުކާރުން ކުރަމުންދާ މަަސައްކަތަށް އެއްބާރުލުން ދެއްވާނެ ކަމަށް އޭނާ ވިދާޅުވިއެވެ.
ހަމަ އެހެންމެ، ސަރުކާރުގެ ކިބައިން އާޒިމް ބައެއް ކަންކަމަށް އެދިވަޑައިގެންފައިވެއެވެ. އެ ކަންކަމަކީ:
- މާލޭގައި ދައުލަތުގެ ކުންފުނިތަކަށް ދީފައި ހުރި ބިންތައް ގިރާވަރާއި ގުޅީފަޅަށް ބަދަލުކުރުމަށް
- މިހާރު ހުރި ލޯންޗުތައް ގުޅީފަޅާއި ގިރާވަރުފަޅުގައި އަޅާފައި ބެހެއްޓޭނެ މެރީނާ އަކަށް ހެދުމަށް
- ޝޯ ތަކާއި ބައްދަލުވުންތައް ބޭއްވޭނެ ގޮތަށް ކާނިވާ ސްޓޭޖު ތަރައްގީކުރުމަށް
މި ބައްދަލުވުމުގައި، ބުޅާ ފެސިލިޓީ ނުވަތަ ކެޓް ޝެލްޓަރު އިމާރާތްކުރުމުގެ މަޝްރޫއުގެ 70 ޕަސެންޓު މަސައްކަތް ނިމިފައިވާ ކަމަށް އާޒިމް ވިދާޅުވިއެވެ.
މީގެ އިތުރުން، މި ބައްދަލުވުމުގައި އާޒިމް ވިދާޅުވީ، ވޭތުވެދިޔަ އަހަރުގެ ފުރަތަމަ ހަ މަހާ އަޅާ ބަލާއިރު މި އަހަރުގެ މި މުއްދަތުގައި ކައުންސިލްގެ ހަރަދުން 20 މިލިއަން ރުފިޔާ ސަލާމަތްކުރެވި، އާމްދަނީ އަށް 30 މިލިއަން ރުފިޔާ އިތުރުކުރެވިފައިވާ ކަމަށެވެ.
އަދި ކައުންސިލްގެ މަސައްކަތްތައް އަވަސްކޮށް، ކައުންސިލުން ދޭ ހިދުމަތް އިތުރަށް ރަނގަޅުކުރުމަށްޓަކައި މި އަހަރު ނިމުމުގެ ކުރިން މަސައްކަތްތައް އޮޓޮމޭޓްކުރުމަށް މަސައްކަތްކުރަމުންދާ ކަމަށް އޭނާ ވިދާޅުވިއެވެ.
މާލެ އަށް ދިމާވެފައިވާ ދަތިތައް ހައްލުކޮށް މާލެ އަކީ އާންމުންނަށް އުޅެވޭނެ ތަނަކަށް ހެދުމަށްޓަކައި އާންމުންގެ އެއްބާރުލުން ބޭނުންވާ ކަމަށް ވިދާޅުވެ، އާންމުންގެ އެހީތެރިކަމަށް އާޒިމް ވަނީ އެދިވަޑައިގެންފައެވެ.
