މިންހެޔޮ ކާނާ ތައްޔާރުކުރާނެ ގޮތް ކިޔައިދިނުމަށް ޔޫއެންއެފްޕީއާއި ގުޅިގެން އިސްރަށްވެހިންގެ ނާދީން ކުރިއަށް ގެންދާ "ހައްޓަށް" ސިލްސިލާގެ ދެވަނަ ސެޝަން ނިންމާލައިފިއެވެ.
މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމަންޓް އިން ބުނީ މި ސެޝަނުގައި ހަށިގަނޑުގެ ހަޖަމުކުރުމުގެ ނިޒާމް މަސައްކަތް ކުރާ ގޮތާ، ކާނާ ކެއުމުގައި ހަށިގަނޑަށް ބޭނުންތެރި ފައިދާހުރި ތަކެތި ކެއުމާއި ގުޅޭ މައުލޫމާތު ހިއްސާކޮށްފައިވާ ކަމަށެވެ. އެގޮތުން ކާނާގައި ފައިބާ އަދި ޕްރޮޓިން ހިމެނޭ ބައިތައް ގިނަކުރުމުގެ މުހިންމުކަމަށް އަލި އަޅުވާލާފައިވާނެކަމަށް އެ މިނިސްޓްރީން ވަނީ ބުނެފައެވެ.
އިތުރަށް މިނިސްޓްރީން ބުނީ މި ކައްކާ ކްލާސްތަކުގައި ހައްޓަށް ހެޔޮ، އަނގަޔަށް މީރު މިންހެޔޮ ކާނާ ތައްޔާރުކުރާނެ ގޮތް ބައިވެރިންނަށް ކިޔައިދީ، އެއާއެކު އަމަލީ ގޮތުން އެ ބާވަތްތައް ތައްޔާރުކުރާނެ ގޮތްތައް ވެސް މި ކްލާސްތަކުގައި ބައިވެރިންނަށް ދަސްކޮށްދީފައިވާނެކަމަށެވެ. އަދި ފެހި ކުލައިގެ ކާތަކެތި ހުރިހާ ވަގުތެއްގައި ކެއުމަށް އާދަކުރުމުގެ މުހިންމުކަމާ، ވަކިން ހާއްސަކޮށް ކޮޕީ ފަތާއި، މުރަނގަ ފަތް ފަދަ ފައިދާހުރި ކާނާގެ ބާވަތްތައް ކެއުމުގައި ހިމެނުމުގެ މުހިންމު ކަމުގެ އިތުރުން ކެއުމަށް ރަނގަޅު ގަޑިތައް ކިޔާދީފައިވާނެކަމަށް މިނިސްޓްރީން ވަނީ ބުނެފައެވެ. އެގޮތުން ހަޖަމު ކުރުމަށް ވަގުތު ދިނުމަށްފަހު ނިދާ ގަޑީގެ 3 ނުވަތަ 4 ގަޑިއިރު ކުރިން ކާން ވާނެކަން ވަނީ ފާހަގަކޮށްފައެވެ.
މިއީ އިސްރަށްވެހިންގެ ނާދީ އާއި ޔޫއެންއެފްޕީއޭ ގުޅިގެން އިސްރަށްވެހިންގެ ނާދީގައި ކުރިއަށް ގެންދާ ޕްރޮގްރާމެކެވެ. މިގޮތުން މި ކްލާހަކީ ހަފްތާއަކު އެއްދުވަހު 2 ގަޑިއިރަށް ކުރިއަށް ގެންދާ ދުޅަހެޔޮ ކާނާ ކައްކާނޭ ގޮތް ދަސްކޮށްދޭ ކްލާހެކެވެ. ޖުލައި 20 ގައި ކުރިއަށް ގެންގޮސްފައިވާ ފުރަތަމަ ބެޗްގެ 2 ވަނަ ކްލާހުގައި 21 ފަރާތެއް ވަނީ ބައިވެރިވެފައެވެ.
އުމުރުން ދުވަސްވާއިރު ދުޅަހެޔޮކަންމަތީގައި ހުރުމަށް މިންހެޔޮ ކާނާއާއި ކަސްރަތަކީ މުހިންމު ރޯލެއް އަދާކުރާ ކަންކަމެވެ. އެހެންކަމުން މިންހެޔޮ ކާނާއާއި ގުޅޭގޮތުން މައުލޫމާތު ދިނުމުގެ ސެޝަންތައް އިސްރަށްވެހިންގެ ނާދީން ގެންދަނީ ސިލްސިލާގޮތެއްގައި ކުރިއަށް ގެންދަމުންނެވެ.
