ރައްޔިތުންގެ މަޖިލީހުގެ މެމްބަރުންގެ އަދަދު ދެން އަންނަ ދައުރަކަށް ކުޑަކޮށް 77 އަށް ބަދަލު ކުރައްވާނެކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
މިރޭ ބޭއްވި ޕީއެންސީ ހަރުގެ ޖަލްސާގައި ވާހަކަފުޅު ދައްކަވަމުން ރައީސް ޑރ. މުއިއްޒު ވިދާޅުވީ، ހަރަދު ކުޑަކުރުމަށް ކައުންސިލްތަކުގައި ތިއްބާވާ މެންބަރުންގެ އަދަދު މަދު ކުރުމުގެ އިތުރުން ރައްޔިތުންގެ މަޖިލީހުގެ ސައިޒު ވެސް ހަމަޔަކަށް އަޅުވަން ޖެހޭ ކަމަށެވެ. އަދި މަޖިލީހުގެ މެންބަރުންގެ އަދަދު މަދުކުރުމަށް ޕީއެންސީގެ މެންބަރުން އަމިއްލަ އިސްނެންގެވުމަށް ގަރާރެއް ހުށަހަޅައި ހިޔާލު ހޯއްދަވާފައިވާ ކަމަކީ ވަރަށް އުފަލާއެކު ފާހަގަ ކުރައްވާ ކަމެއް ކަމަށް މުއިއްޒު ވިދާޅުވިއެވެ.
މަޖިލީހުގެ މެންބަރުން އިތުރުކޮށްފައިވާ ގޮތަށް އިޝާރާތް ކުރައްވަމުން ރައީސް ވިދާޅުވީ، މިހާރު މިދާ ގޮތަށް ދަންޏާ 100 އަށް ވުރެ ވެސް މައްޗަށް މެންބަރުންގެ އަދަދު އަރައިގެން ގޮސްދާނެ ކަމަށެވެ. އާބާޑީ ބޮޑުވެގން ދާ މިންވަރަކުން މަޖިލިސް މެންބަރުންގެ އަދަދު އެއަށް ވުރެ ވެސް މައްޗަށް އަރާނެ ކަމަށާއި ނަމަވެސް އެއީ އެއްވެސް މާނައެއް ހުރިކަމެއް ނޫން ކަމަށް ރައިސް ވިދާޅުވިއެވެ. އެމަނިކުފާނު ގަބޫލުފުޅު ކުރައްވާ ގޮތުގައި ކުޑަކުރާ އިރު މާ ކުޑަކޮށްލުމަކީ ވެސް ރަނގަޅުކަމެއް ނޫން ކަމަށާއި އެންމެ ރަނގަޅު ގޮތަކީ 77 ގެ ރޭންޖުގައި މެންބަރުން ހޮވުން ކަމަށް ރައީސް ވިދާޅުވިއެވެ.
މަޖިލީހުގެ މެންބަރުންގެ އަދަދު 77 އަށް ދަށްކުރަން ނިންމާފައިވާ އިރު، މިހާރު މަޖިލީހުގައި ތިއްބަވަނީ 93 މެންބަރުންނެވެ. 19 ވަނަ މަޖިލީހުގައި 87 މެންބަރުން ތިބި އިރު، 18 ވަނަ މަޖިލީހުގައި 85 މެންބަރުން އަދި 17 ވަނަ މަޖިލީހުގައި ތިއްބެވީ 78 މެންބަރުންނެވެ.
އިގްތިސޯދު ރަނގަޅު ކުރުމަށް ސަރުކާރުގެ ފަރާތުން ހަރަދު ކުޑަކުރުމަށް އަޅަން ނިންމާފައިވާ ފިޔަވަޅުތަކުގެ ތަފްސލް މިރޭ ހާމަ ކުރައްވަމުން ކައުންސިލްތަކުގެ މެންބަރުންގެ އަދަދު މަދު ކުރުމަށް ނިންމާފައިވާ ކަމަށް ވެސް ރައީސް ވިދާޅުވިއެވެ. ހަމައެއާއެކު ރިޔާސީ އިންތިހާބަށާއި މަޖިލިސް އިންތިހާބަށް ހިންގި ހަރަދުތަކަށް ބަލާއިރު، 6 މަސް ދުވަހުގެ ފަރަގު އޮވެ ބާއްވަމުންދާ އެ ދެ އިންތިހާޞު އެކުއެކީގައި ބޭއްވުމަކީ ވެސް ހަރަދު ކުޑަކުރުމަށް ކުރެވޭނެ ކަމެއްގެ ގޮތުގައި ރައީސް ވަނީ ވިދާޅުވެފައެވެ.
