ވިކިލީކްސްގެ ބާނީ ޖޫލިއަން އަސާންޖް އެމެރިކާއާ ހަވާލު ކުރުމާ ދެކޮޅަށް ދިގު މުއްދަތަކަށް ގާނޫނީ ހަނގުރާމައެއް ކުރުމަށް ފަހު އެންމެ ފަހުން އޭނަ މިނިވަންކޮށްފިއެވެ.
އެމެރިކާގެ އަސްކަރީ ސިއްރުތައް ލީކްކުރި ކަމުގެ ތުހުމަތަށް އެމެރިކާއިން ހައްޔަރު ކުރަން ބޭނުންވާތީ އިނގިރޭސި ވިލާތުން ބަންދުގައި ބަހައްޓައިގެން އުޅުނު އަސާންޖް މިނިވަންވުމާ އެކު މިހާރު އޭނާ ވަނީ އިނގިރޭސި ވިލާތުން ފުރާފައެވެ.
ޖޫލިއަން އަސާންޖް އަކީ ކާކު؟
އަސާންޖަކީ އޮސްޓްރޭލިއާގެ ޓައުންސްވިލް އަށް އުފަން މީހެކެވެ. އޭނާގެ މައިންބަފައިން ތިއޭޓަރުގައި ހަރަކާތްތެރިވި މީހުންކަމުގައިވީ ނަމަވެސް ފުރާވަރުގެ އުމުރުގައި އަސާންޖް މަޝްހޫރުވެގެން ދިޔައީ ކޮމްޕިއުޓާ ޕްރޮގްރާމަރެއްގެ ގޮތުގައެވެ. 1995 ވަނަ އަހަރު ކޮމްޕިއުޓަރު ހެކް ކުރުމުގެ ކުށުގައި އަސާންޖް ޖޫރިމަނާ ކުރި ނަމަވެސް ޖަލުން ސަލާމަތްވަނީ ދެން އެފަދަ ކުށެއް ނުކުރާނެ ކަމަށް ޝަރުތުކޮށްފައެވެ. 2006 ވަނަ އަހަރު އަސާންޖީ އުފެއްދި ވިކިލީކްސް، އާއި އެކު އިންޓަނެޓްގައި “ޑެޑް ލެޓާ ޑްރޮޕް” އެއް އުފެއްދާ ކްލަސިފައިޑް ނުވަތަ ސެންސިޓިވް މައުލޫމާތު ލީކުކުރާ މީހުންނަށް އެ ފުރުސަތު ހޯދައިދިނެވެ.
އެމެރިކާގެ އަސްކަރީ ސިއްރު ރިޕޯޓްތައް ލީކުކޮށްލުން؛
އިރާނުގު ހަނގުރާމައިގެ ދުވަސްވަރު އެމެރިކާގެ އަސްކަރީ ހެލިކޮޕްޓަރަކުން ދެ ނޫސްވެރިން ހިމެނޭ ގޮތަށް އާންމުންގެ 11 މީހަކު ބަޑިޖަހައި މަރާލި ވީޑިއޯއެއް ވިކިލީކްސް އިން އާންމުކުރުމާއެކު ގިނަ ބައެއްގެ ސަމާލުކަން އަސާންޖީ އަށް ހުއްޓިގެން ދިޔައެވެ. މި ފޫޓޭޖޭއަކު އެމެރިކާއިން ހަނގުރާމަ ކުރަމުންދާ ގޮތުގެ ހިލަމެއް ދުނިޔެއަށް ލިބި މީޑިއާގެ ތޫފާނެއް ފެށުނެވެ. 2010 ވަނަ އަހަރު އެޕްރީލް މަހު ލީކުކޮށްލި މި ވީޑިއޯ އާއި އެކު ހަމަ އެ އަހަރު ޖުލައި މަހު ވިކިލީކްސް އިން 91،000 އަށް ވުރެ ގިނަ ލިޔެކިޔުން އާންމުކޮށްފައިވާއިރު، އޭގެ ތެރޭގައި ގިނައީ އަފްގާނިސްތާނުގެ ހަނގުރާމައާ ބެހޭ ގޮތުން އެކުލަވާލާފައިވާ އެމެރިކާގެ އަސްކަރީ ސިއްރު ރިޕޯޓްތަކެވެ.
ވިކިލީކްސް އިން 2010 ވަނަ އަހަރު އޮކްޓޯބަރު މަހު އިރާގު ހަނގުރާމައިގެ ތާރީހު ލިޔެފައިވާ 400،000 ކްލަސިފައިޑް އަސްކަރީ ފައިލް އާންމުކޮށްފައިވާއިރު ސެޕްޓެމްބަރު މަހު އެމެރިކާގެ އެތައް ހާސް ޑިޕްލޮމެޓިކް ކޭބަލްތަކެއް ވަނީ އާންމުކޮށްފައެވެ. އޭގެ ތެރޭގައި ބޭރުގެ ލީޑަރުންނާއި، އެހެނިހެން ފަރާތްތަކުން ސަލާމަތާއި ރައްކާތެރިކަމާއި ގުޅޭ ގޮތުން ފާޅުކޮށްފައިވާ ހިޔާލުތައް ހިމެނެއެވެ.
ސްވިޑެންގެ ދެ އަންހެނުންނަށް ޖިންސީ ގޯނާކުރި ކަމުގެ ތުހުމަތާއެކު އަސާންޖް އަށް ގިނަ ފިއްތުންތަކެއް
އެމެރިކާގެ ސިއްރު ލިޔެކިޔުންތައް ލީކުކުރުމާއެކު މުޅި ދުނިޔޭގެ ސަމާލުކަން ލިބިގެން ދިޔަ އަސާންޖްއަށް 2015 ވަނަ އަހަރު އޯގަސްޓަ މަހު ސްވިޑެންގެ ޕްރޮސެކިއުޓަރުންވަނީ އަންހެނަކު ރޭޕްކޮށް އަދި އެހެން އަންހެނަކަށް ޖިންސީ ގޯނާ ކުރި ކަމުގެ ތުހުމަތުކޮށްފައެވެ. އެހެންނަމަވެސް އަސާންޖްގެ މައްޗަށް ކުރި ތުހުމަތުތައް އޭނާ ދޮގުކޮށްފައިވާއިރު، އޭނާއާއި ދެކޮޅަށް އެއްވެސް ހެއްކެއް ނެތުމުން އޭރު ސްވިޑެން އިން ވަނީ އަސާންޖް ދޫކޮށްލާފައެވެ. އެހެންނަމަވެސް ސްވިޑެންގެ ޑިރެކްޓާ އޮފް ޕްރޮސެކިއުޝަންސް އިން އަލުން އޭނާގެ މައްސަލަ ބަލަން ފެށިއިރު އަސާންޖްވަނީ ސްވިޑެން ދޫކޮށް އިނގިރޭސިވިލާތަށް ގޮސްފައެވެ.
ރޭޕްގެ ތުހުމަތުތަކާ ގުޅިގެން ސްވިޑެންގެ ކޯޓަކުން އަސާންޖް ހައްޔަރު ކުރުމަށްކުރި އަމުރާއެކު އިނގިރޭސިވިލާތުން އޭނާ ހައްޔަރު ކުރި ނަމަވެސް ކަފާލާތުގެ ދަށުން ވަނީ މިނިވަންވެފައެވެ. އޭގެ ފަހުންވެސް އަސާންޖްއަށް ގިނަ ފައްތުންތައް ކުރިމަތިވެގެން ދިޔައިރު އެންމެ ފަހުން އޭނާވަނީ ސުވިޑަން އިން ކޮށްފައިވާ ތުހުމަތުތަކާއި ގުޅިގެން އަމިއްލައަށް ލަންޑަނުގައި ފުލުހުންނާ ހަވާލުވެފައެވެ. އަދި ލަންޑަނުގެ އެކްސްޓްރެޑިޝަންގެ އަޑުއެހުމެއް ބާއްވަންދެން އޭނާ ބަންދުކޮށްފައިވާއިރު ހައިކޯޓުން އަސާންޖަށް ކަފާލާތުގެ ދަށުން ވަނީ ދޫކޮށްލާފައެވެ.
އަސާންޖްއާއި ދެކޮޅަށް ކުރި ތުހުމަތުތަކާ ގުޅިގެން ގިނަ ދުވަސްތަކެއް ވަންދެން އެ މައްސަލައިގެ ތެރޭގައި އުޅުމަށްފަހު 2012 ވަނަ އަހަރު އިނގިރޭސި ސުޕްރީމް ކޯޓުން އަސާންޖްގެ އެންމެ ފަހުގެ އިސްތިއުނާފު ބާތިލުކުރިއެވެ. އޭގެ ފަސް ދުވަސް ފަހުން އަސާންޖް ވަނީ ލަންޑަނުގައި ހުންނަ އިކުއެޑޯގެ އެމްބަސީގައި ހިމާޔަތް ހޯދައި ސިޔާސީ ހިމާޔަތް ހޯދިއެވެ. އަސާންޖްގެ ހިމާޔަތުގައި 2012 ވަނަ އަހަރުން ފެށިގެން 2015 ވަނަ އަހަރުގެ ނިޔަލަށް ލަންޑަނުގައި ހުންނަ އިކުއެޑޯގެ އެމްބަސީގެ ބޭރުގައި 24 ގަޑިއިރު ގާޑުން ތިއްބެވެ. މިއާއި އެކު އަސާންޖް އިކުއެޑޯގެ އެމްބަސީގެ ހިމާޔަތުގައި ހުންނަނިކޮށް އެ މައްސަލަ ކުރިއަށް ދިއުމަކީ ކުރެވޭނެ ކަމެއް ނޫން ކަމަށް ބުނެ ސްވިޑެންގެ ޕީޖީން ވަނީ އެ މައްސަލައިގެ ތަހުގީގު ހުއްޓާލާފައެވެ.
އިކުއެޑޯއިން އަސާންޖް އަށް ދެމުން އައި ސިޔާސީ ހިމާޔަތް 2019 ވަނަ އަހަރު އުވާލުމަށްފަހު އޭނާ އެމްބަސީން ބޭރަށް ގެންގޮސް ވަނީ ހައްޔަރުކޮށްފައެވެ. އޭނާގެ މައްޗަށް ކަފާލާތުގެ ދަށުން ދޫކޮށްލުމަށް ހުށަހެޅި ހުށަހެޅުން ބަލައިނުގަނެ، އިނގިރޭސި ކޯޓަކުން ވަނީ 50 ހަފްތާގެ ޖަލު ހުކުމެއް އިއްވާފައެވެ. އަދި އޭނާ ހުކުމް ފުރިހަމަކުރި ނަމަވެސް އެކްސްޓްރެޑިޝަންގެ އަޑުއެހުންތައް ނިމެންދެން ޖަލުގައި ބެހެއްޓިއެވެ. ހަމަ އެ ދުވަސްވަރު ސްވިޑެންގެ ޕީޖީން އެމީހުންގެ ތަހުގީގު އަލުން ހުޅުވާލައި، އަސާންޖް ސްވިޑެންއާ ހަވާލުކުރުމަށް އިނގިރޭސީންގެ ކިބައިން އެދުނެވެ.
އަސާންޖް އެމެރިކާއާއި ހަވާލުކުރުމަށް އިނގިރޭސިވިލާތުގައި ރަސްމީކޮށް އެދުން
2019 ވަނަ އަހަރު ޖޫން މަހު އެމެރިކާގެ ޑިޕާޓްމަންޓް އޮފް ޖަސްޓިސް އިން ވަނީ އެ ގައުމުގެ ސަރުކާރުގެ ކޮމްޕިއުޓަރުތައް ހެކް ކުރަން ރާވާ، ޖާސޫސުކޮށް، ގާނޫނަ ހިލާފުވިކަމަށް ދައުވާ އުފުލުމަށް އަސާންޖު އެމެރިކާ އާއި ހަވާލުކުރުމަށް އިނގިރޭސިވިލާތުގައި ރަސްމީކޮށް އެދިފައެވެ. ކޮވިޑްގެ ސަބަބުން އަސާންޖްގެ ޝަރީއަތުގެ އަޑުއެހުންތައް ލަސްވެގެން ދިޔައިރު ލަންޑަންގެ އޯލްޑް ބެއިލީގައި ގާޒީ ވެނެސާ ބަރައިޓްސާ ވަނީ އަސާންޖްގެ ނަފްސާނީ ސިއްހަތު ނާޒުކުކަމުން އެމެރިކާއަށް ހަވާލުކުރުމަކީ އަނިޔާވެރި ކަމެއް ކަމަށާ އެހެން ކަންތައްކޮށްފިނަމަ އޭނާ އަމިއްލައަށް ފުރާނަ ދުއްވާލާނެކަމަށް ބުނެފައެވެ. ނަމަވެސް ގާޒީ ބަރައިޓްސާ ވަނީ އަސާންޖް ކަފާލާތުގެ ދަށުން ދޫކޮށްލުމަށް އިންކާރުކޮށްފައެވެ.
އެމެރިކާއިން އަސާންޖް އެ ގައުމާއި ހަވާލުކުރުމަށް ހުށަހެޅި މައްސަލަ ދިގުދެމިގެން ދިޔައިރު 2024 ވަނަ އަހަރު މާޗްމަހު ލަންޑަނުގެ ހައިކޯޓުގެ ދެ ފަނޑިޔާރަކު ވަނީ އަސާންޖަށް މަރުގެ އަދަބު ނުލިބޭނެ ކަމުގެ ޔަގީންކަން ހިމެނޭ ގޮތަށް އިތުރު ކަންކަން ހުށަހެޅުމަށް އެމެރިކާގެ ކަމާބެހޭ ފަރާތްތަކަށް ތިން ހަފްތާގެ މުއްދަތެއްދީފިއެވެ.
އެމެރިކާގެ ޖަސްޓިސް ޑިޕާޓްމަންޓުން ކޯޓަށް ހުށަހެޅި ލިޔެކިޔުންތަކުގެ އެގޭ ގޮތުން އަސާންޖް މިނިވަންކޮށްފައިވަނީ އެ އިދާރާއާ އެކު ހެދި އެއްބަސްވުމެއްގެ ދަށުންނެވެ. އެ އިދާރާއާ އެކު ހެދި އެއްބަސްވުމެއްގެ ދަށުން، ގާނޫނާ ހިލާފަށް ސިއްރު ގައުމީ ދިފާއީ މައުލޫމާތު ހޯދައި ފެތުރުމަށް ރޭވި 'ޖާސޫސީ ގާނޫނުގެ' ދައުވާއަށް އިއުތިރާފުވުމުގެ ބަދަލުގައި އަސާންޖަށް މިނިވަންކުރުމުގެ ހުއްދަ ލިބިގެން ދިޔައެވެ. އަސާންޖް މިިގޮތަށް އެއްބަސްވުމުން އޭނާގެ މައްޗަށް 62 މަސް ދުވަހުގެ ޖަލު ހުކުމެއް އަންނާނެ ކަމަށް ބެލެވޭއިރު އިނގިރޭސި ވިލާތުގެ ޖަލުގައި އަސާންޖް ހޭދަކުރި ފަސް އަހަރުގެ މުއްދަތު އަދަބުން އުނިވާ ގޮތަށް އެމެރިކާއާ އެކު އެއްބަސްވެފައިވާތީ ހުކުމަށް ފަހު ވެސް އަސާންޖް މިނިވަނެއްގެ ގޮތުގައި ދޫކޮށްލާނެކަމަށް ބެލެވެއެވެ.
އަސާންޖް ވަނީ އެމެރިކާއިން އިރާގާއި، އަފްގާނިސްތާނުގައި ކުރި ހަނގުރާމައިގެ އެތައް ސިއްރެއް ދުނިޔެއަށް ހާމަކޮށްފައިވާއިރު އޭނާއަކީ ދުނިޔޭގެ ސުލްހަވެރިކަމަށް މަސައްކަތްކުރާ މީހުންނަށް ބަތަލެކެވެ. އެހެންނަމަވެސް އެމެރިކާ ފަދަ ދުނިޔޭގެ ބޮޑެތި ބާރުތަކަށް އަސާންޖްއަކީ ނުރައްކާތެރި މީހެކެވެ. އެމީހުންގެ ބަހުންނަމަ ނުރައްކާތެރި ޓެރަރިސްޓެކެވެ.
