އއ. ތޮއްޑޫގެ ކައުންސިލް އޮފީހުގެ ކުރިމައްޗަށް އެ ރަށު އާންމުން އެއްވެ ކުރި މުޒާހަރާގެ ތެރެއިން ހިނގި ހަމަނުޖެހުމެއްގައި ފުލުހަކު ޒަހަމްވެއްޖެއެވެ.
ބައެއް މަސްދަރުތަކުގައިވާ ގޮތުން، ތޮއްޑޫގެ ކައުންސިލް އޮފީހުގެ ކުރިމަތީގައި އެ ރަށު އާންމުން މުޒާހަރާކުރީ، ރަށުގެ ދަނޑުބިންތައް ދަނޑުވެރިން އަތުން ކައުންސިލުން އަތުލަން ނިންމާފައިިވާ ކަމަށް ބުނެއެވެ. މިކަމާ ގުޅިގެން ކައުންސިލްގެ ޖަވާބެއް ލިބޭގޮތެއް އަދި ނުވެއެވެ.
މީޑިއާ އާ ހިއްސާކުރި މައުލޫމާތުގައި ފުލުހުން ބުނީ މިއަދު މެންދުރު 1 ޖަހާކަން ހާއިރު، ތޮއްޑޫ ކައުންސިލް އޮފީހުގެ ކުރިމަތީގައި މުޒާހަރާކޮށް، އާންމު މަސްލަހަތު ނަގާލުމަށް ބަޔަކު މަސައްކަތްކުރަމުން ދިއުމާ ގުޅިގެން އެ ސަރަހައްދުގައި ފުލުހުން ހަރަކާތްތެރިވަމުންދާ ކަމަށެވެ.
އެ ސަރަހައްދުގައި މުޒާހަރާކުރަމުންދާ މީހުންގެ ތެރެއިން ބަޔަކު ކައުންސިލް އޮފީހުގެ ފުރާޅު މައްޗަށް ގާ އުކައި، މަސްލަހަތު ގެއްލުވާލުމަށް މަސައްކަތްކުރަމުންދާ ކަމަށާއި، އެކަން ނުކުރުމަށް ތަކުރާރުކޮށް އެ ސަރަހައްދުގައި ތިބި ފުލުހުން ނަސޭހަތްތެރިވަމުން ދިޔަ ކަމަށް، ފުލުހުން ބުންޏެވެ.
އަދި އެ ސަރަހައްދުގައި ހަރަކާތްތެރިވަމުން ދިޔަ ފުލުހަކަށް އަނިޔާވެފައިވާ ކަމަށާއި، އެ ފުލުހަށް މިހާރު ފަރުވާދެމުންދާ ކަމަށް ވެސް، ފުލުހުން މައުލޫމާތު ދެއެވެ.
މުޒާހަރާ އާ ގުޅިގެން މީހަކު ހައްޔަރުކުރިކަން ނުވަތަ ނޫންކަން ފުލުހުން ހާމައެއް ނުކުރެއެވެ. އަދި މުޒާހަރާ ކޮންޓްރޯލްކުރެވިފައިވާ ކަން ނުވަތަ ނޫންކަން ވެސް ހާމައެއް ނުކުރެއެވެ.
