ދަނޑުވެރިކަމާއި ލޯކަލް ޓޫރިޒަމްގެ ދާއިރާއިން ތޮއްޑޫ ރައްޔިތުންގެ ފުދުންތެރިކަން އިތުރުކުރުމަށް މަގުފަހިކޮށްދިނުމަށް ސަރުކާރުން އިސްކަންދެއްވާނެ ކަމުގައި ރައީސް ޑރ.މުހައްމަދު މުއިއްޒު ވިދާޅުވެއްޖެއެވެ.
އަރިއަތޮޅު އުތުރުބުރިއާއި މާލެ އަތޮޅުގެ ބައެއް ރަށްތަކަށް މިއަދު ފެއްޓެވި ދަތުރުގެ ފުރަތަމަ މަންޒިލެއްގެ ގޮތުން އއ. ތޮއްޑޫއަށް ވަޑައިގެން އެ ރަށު ރައްޔިތުންނާއި ބައްދަލުކުރައްވައި ދެއްކެވި ވާހަކަފުޅުގައި ރައީސް ވިދާޅުވީ ތޮއްޑޫއަކީ ވަރަށް މަސައްކަތްތެރި، ވަރަށް މުރާލި އާބާދީއެއް އޮތް ރައްޔިތުންތަކެއް ދިރިއުޅޭ ރަށެއް ކަމަށެވެ. އަދި ދަނޑުވެރިކަމާއި ލޯކަލް ޓޫރިޒަމްގެ ދާއިރާއަކީ އެރަށުގެ ރައްޔިތުން، ރަށުގައި ގާއިމުވެ ތިބެގެން ވަރަށް މުރާލިކަމާއެކީގައި މަސައްކަތްކޮށް ފުޅާކުރަމުންދާ ދާއިރާތަކެއްކަން އެ މަނިކުފާނު ފާހަގަކުރެއްވިއެވެ. އެގޮތުން ދަނޑުވެރިކަމާއި ލޯކަލް ޓޫރިޒަމަކީ ތޮއްޑޫގައި އެންމެ ދުވަސްވީ އެންމެ މުހިންމު ދާއިރާތައް ކަމުގައި ވިދާޅުވެ، އެ މަނިކުފާނު ވަނީ ރައްޔިތުންގެ ފުދުންތެރިކަން އިތުރުކުރުމަށްޓަކައި އެ ދާއިރާތަކުން ކުރިއަށް ދިއުމުގައި ސަރުކާރުން އިސްކަންދެއްވައި، މަގުފަހިކޮށްދެއްވާނެ ކަމުގައި ވިދާޅުވެފައެވެ.
ކައުންސިލްގެ ފަރާތުން އުފައްދާފައިވާ ލޯކަލް އޮތޯރިޓީ ކުންފުންޏެއް އޮތްކަން ފާހަގަކުރައްވައި ރައީސް ވަނީ އެ މަނިކުފާނު މާލޭ ސިޓީގެ މޭޔަރަކަށް ހުންނެވިއިރު އެފަދަ ކުންފުންޏެއް އުފެއްދެވުމަށް ކުރެއްވި މަސައްކަތުގައި އޭރު ސަރުކާރުގެ ފަރާތުން ދިމާވި ގޮންޖެހުންތައް ހިއްސާކުރައްވައި، އެފަދަ ކުންފުނިތަކުގެ ކުރިއެރުމަށް މި ސަރުކާރުން ހުރަސްނާޅާނެކަމުގެ ފުރިހަމަ ޔަގީންކަން ދެއްވާފައެވެ. އެގޮތުން ރަށުގެ ރައްޔިތުުންގެ ފުދުންތެރިކަން އިތުރުކުރެއްވުމަށްޓަކައި ހިންގަވަން ބޭނުންވާ މަޝްރޫއުތަކަށް ސަރުކާރުގެ ފުރިހަމަ އެއްބާރުލުން ދެއްވާނެކަމުގައި ރައީސް ވިދާޅުވިއެވެ. އަދި އެއީ އެ ކުންފުންޏަށް އިންވެސްޓްމަންޓް ހަމަޖައްސައިދިނުންކަމުގައި ވިޔަސް، ނުވަތަ އެހެނިހެން މަގުތަކުން މަގުފަހިކޮށްދިނުން ކަމުގައި ވިޔަސް، އެ ކުންފުންޏަށް ކަންކަން މަގުފަހިކޮށްދިނުމަށް ސަރުކާރުން ފުރިހަމަ އެއްބާރުލުން ދެއްވާނެ ކަމުގައި އެމަނިކުފާނު ވިދާޅުވިއެވެ.
ރައީސުލްޖުމްހޫރިއްޔާ ވަނީ އެ މަނިކުފާނުގެ ސަރުކާރުގައި ސިޔާސީ ވިސްނުމެއް ނުގެންގުޅުއްވައި، ހަމަހަމަކަމާއެކު ރައްޔިތުންނަށް ހިދުމަތް ކުރައްވާނެ ކަމުގައި ވިދާޅުވެފައެވެ. އެ ގޮތުން ކައުންސިލާއި އަންހެނުންގެ ތަރައްގީއަށް މަސައްކަތްކުރާ ކޮމިޓީން ކުރާ މަސައްކަތުގައިވެސް ސަރުކާރުގެ ފުރިހަމަ އެއްބާރުލުން ލިބޭނެކަމުގެ ޔަގީންކަން ރައީސް ދެއްވިއެވެ.
ރައީސްގެ ވާހަކަފުޅުގައި، ރަށަށް ދިމާވެފައިވާ ބައެއް ކަންކަމަށް އަލިއަޅުއްވައިލައްވަމުން، ރަށުގެ މަގުތަކުގެ ހާލަތު ފާހަގަކުރައްވައި، ތޮއްޑޫގެ މަގުތައް އަންނަ އަހަރު ހެދޭނެކަމުގެ ޔަގީންކަން ދެއްވިއެވެ. އެގޮތުން 2025 ވަނަ އަހަރަށް ސަރުކާރުން ހުށައެޅުއްވި ބަޖެޓުގައި އެންމެ އިސްކަމެއް ދެއްވާފައިވާނީ ފެނާއި ނަރުދަމާ އެޅުމާއެކު ރަށުގެ މަގުހެދުން ކަމުގައި އެ މަނިކުފާނު ވިދާޅުވިއެވެ. އަދި ރަށުގެ ތަރައްގީއަށްޓަކައި ވައުދުވެވަޑައިގެންފައިވާ ގޮތަށް އަންނަ އަހަރުގެ ބަޖެޓުގައި ހިމެނިގެން ސިއްހީ މަރުކަޒު ފުޅާކުރެވި، ހިދުމަތްތައް އިތުރުކޮށްދެވޭނެ ކަމަށް ރައީސް ވިދާޅުވިއެވެ. އަދޮ ރަށު ސްކޫލް، އެއް ދަންފަޅިއަށް ބަދަލުކޮށް، އޭލެވެލްއަށް ޖާގަ ހެދުމަށް ބޭނުންވާ ކްލާސްރޫމްތަކާއި ވަޞީލަތްތައް ގާއިމުކުރުމުގެ މަސައްކަތް އަންނަ އަހަރު ކުރިއަށްގެންދަވާނެކަން އެ މަނިކުފާނުގެ ވާހަކަފުޅުގައި ފާހަގަކުރެއްވިއެވެ.
މީގެ އިތުރުން ކުނި މެނޭޖްކުރަން ރީޖަންތަކަށް ބަހާލައިއިގެން، ގްރީން ޓެކްސްގެ ބޭނުން ހިއްޕަވައިގެން ކޮންސޮލިޑޭޓަޑް ގޮތެއްގައި ބެލެހެއްޓޭނެ ނިޒާމެއްގެ މަސައްކަތް، މުޅި ރާއްޖޭގައި ފައްޓަވާފައިވާ ކަމުގައި ރައީސް ވިދާޅުވިއެވެ. ރައީސް ވަނީ ތޮއްޑޫގައި ޑޮލަރު އޭޓީއެމް އެއް ގާއިމުކޮށްދެއްވާނެ ކަމަށާއި، ބޭންކިން ހިދުމަތްތައް ރައްޔިތުންނަށް ރަށުގައި ތިބެގެން ލިބޭނެ މަގުފަހިކޮށްދެއްވައި، މުޅި ރާއްޖޭގެ ހުރިހާ ރައްޔިތުންނަށް މި ވަސީލަތްތައް ހޯއްދަވައިދެއްވުމަށް ކުރައްވަމުންގެންދަވާ މަސައްކަތް އެ މަނިކުފާނުގެ ވާހަކަފުޅުގައި ހިއްސާ ކުރައްވާފައެވެ.
