ދިވެހިރާއްޖޭގެ ގައުމީ ޔުނިވާސިޓީ (އެމްއެންޔޫ) ގެ ފެކަލްޓީ އޮފް އެގްރިކަލްޗާ އެންޑް ފުޑް ސައިންސަސް ބިނާކުރުމަށް އއ. ތޮއްޑޫއިން 80،000 އަކަފޫޓޫގެ ބިމެއް ހަމަޖައްސައިފިއެވެ.
ތޮއްޑޫ ކައުންސިލްގެ އިދާރާއިން ބިން ހަވާލުކުރުމުގެ ގޮތުން އިއްޔެ ގައުމީ ޔުނިވާސިޓީގެ ސެންޓްރަލް އެޑްމިނިސްޓްރޭޝަންގައި ވަނީ ރަސްމިއްޔާތެއް ބާއްވާފައެވެ.
އެގްރިކަލްޗާ އެންޑް ފުޑް ސައިންސަސް ފެކަލްޓީ އިމާރާތްކުރުމަށް 80،000 އަކަފޫޓުގެ ބިމެއް ހަމަޖެހިފައި ވާއިރު އެގްރިކަލްްޗާ އެންޑް ފުޑް ސައިންސަސް ފެކަލްޓީގެ 4 ޑިޕާޓްމެންޓް ގާއިމްކުރުމަށް ނިންމާފައިވާ ކަމަށް އެމްއެންޔޫއިން ބުނެއެވެ.
ގާއިމްކުރުމަށް ނިންމާފައިވާ ޑިޕާޓްމެންޓްތައް:
- ޑިޕާޓްމެންޓް އޮފް ހޯޓިކަލްޗާ
- ޑިޕާޓްމެންޓް އޮފް ޕްލާންޓް ޕްރޮޓެކްޝަން
- ޑިޕާޓްމެންޓް އޮފް ސޮއިލް އެންޑް ވޯޓާ މެނޭޖްމެންޓް
- ޑިޕާޓްމެންޓް އޮފް ފުޑް އެންޑް ސައިންސަސް ޓެކްނޮލޮޖީ
އެމްއެންޔޫއިން ބުނީ ކޮންމެ ޑިޕާޓްމެންޓްމެންޓެއްގައި ވެސް ޒަމާނީ ވަސީލަތްތަކާއެކު ހާއްސަ ލެބޯޓަރީތައް ގާއިމްކުރެވޭނެ ކަމަށެވެ. އޭގެ ސަބަބުން ދަރިވަރުންނަށް އަމަލީ ތަޖުރިބާ ލިބި ރާއްޖޭގެ ދަނޑުވެރިކަމުގެ ދާއިރާ ތަރައްގީކުރުމަށް ބޭނުންވާ ހުނަރުވެރި ޒުވާނުން ތައްޔާރުކުރުމަށް މަގުފަހިވެގެންދާނެ ކަމަށް ވެސް ޔުނިވާސިޓީއިން ބުނެއެވެ.
މި ފެކަލްޓީތަކާއެކު ރާއްޖޭގެ ދަނޑުވެރިކަމަށް އާ ޓެކްނޮލޮޖީތަކާއި އުފެއްދުންތެރި ހިޔާލްތައް ތައާރަފްވެ، ގައުމުގެ އިގްތިސޯދަށް އިތުރު ފުރުސަތުތަކެއް ހުޅުވިގެންދާނެ ކަމަށާއި ޒުވާނުންނަށް ދަނޑުވެރިކަމުގެ ދާއިރާއިން މަތީ ތައުލީމު ހާސިލުކުރުމުގެ ފުރުސަތު ލިބި، ގައުމުގެ ކާބޯތަކެތީގެ ރައްކާތެރިކަން ކަށަވަރުކުރުމަށް މަގުފަހިވެގެންދާނެ ކަމަށް ވެސް އެމްއެންޔޫއިން ވަނީ ބުނެފައެވެ.
މީގެއިތުރުން މި މަޝްރޫއުގެ ސަބަބުން ރާއްޖޭގެ ދަނޑުވެރިކަމުގެ ދާއިރާ ބައިނަލްއަގްވާމީ ފެންވަރުގައި ވާދަވެރި ދާއިރާއަކަށް ހެދުމަށް މަގުފަހިވެގެންދިއުމާއެކު ގައުމުގެ އިގްތިސޯދު ކުރިއެރުވުމަށް އިތުރު ބާރެއް ލިބިގެންދާނެކަން އެމްއެންޔޫއިން ވަނީ ފާހަގަކޮށްފައެވެ.
އެމްއެންޔޫއިން އިތުރަށް ބުނީ މި ފެކަލްޓީއާއެކު ދަނޑުވެރިކަމުގެ ދާއިރާއިން ދިރާސާތަކާއި ތަހުލީލުތައް އިތުރުކުރެވިގެންދާނެ ކަމަށެވެ. އަދި ދަނޑުވެރިކަމުގެ ދާއިރާ ބައިނަލްއަގްވާމީ ވާދަވެރި ދާއިރާއަކަށް ހެދުމަށް މަގުފަހިވެގެންދާނެ ކަމަށެވެ.
