މުދައްރިސުންނާއި ބެލެނިވެރިން މުއާމަލާތު ކުރުމަށް ކްލާސްތަކުން ވަކިވަކި ގްރޫޕްތައް ނުހެދުމަށް އެޑިއުކޭޝަން މިނިސްޓްރީން ސްކޫލްތަކަށް އަންގައިފިއެވެ.

ބެލެނިވެރިންނާއި މުދައްރިސުން މުއާމަލާތް ކުރުމަށް ކޮންމެ ކްލާހެއްގައި ވެސް ވައިބާ ގްރޫޕެއް އޮވެއެވެ. އެ ގްރޫޕްތަކުގައި ދަރިވަރުންނާ ގުޅުންހުރި މައުލޫމާތުތައް މުދައްރިސުން ދެއެވެ.

އިއްޔެ ސްކޫލްތަކަށް ފޮނުވި ސާކިއުލާއެއްގައި އެޑިއުކޭޝަން މިނިސްޓްރީން ބުނީ، ދަރިވަރުންނަކީ އަމިއްލަ އުނގެނުމަށް ޒިންމާވާ ބަޔަކަށް ހެދުމަށްޓަކައި ސްކޫލްތަކުން ހަރުދަނާ އުސޫލުތަކެއް ގާއިމްކުރަންޖެހޭ ކަމަށެވެ. އެ ސާކިއުލާގައި ސްކޫލްތަކަށް އަންގާފައި ވަނީ ބެލެނިވެރިންނާ މުއާމަލާތްކުރަން ބޭނުންކުރާ ވައިބާ ގްރޫޕްތައް ކޮމިއުނިޓީ ގްރޫޕްތަކަށް ބަދަލުކުރުމަށެވެ. އަދި އެ ގްރޫޕްތައް ޑިޖިޓަލް ނޯޓިސް ބޯޑުގެ ގޮތުގައި ބޭނުންކުރެވިދާނެ ކަމަށް ވެސް ބުނެފައިވެއެވެ.

މީގެ އިތުރުން، އެ ސާކިއުލާގައި އަންގާފައިވަނީ:

  • ރަސްމީ މުއާމަލާތުތައް ކުރުމަށް އިތުރު ގްރޫޕެއް ހަދާނަމަ، ވަކިވަކި ކީސްޓޭޖުތަކަށް ނުވަތަ ގްރޫޕްތަކަށް ހާއްސަކުރުމަށް
  • މުދައްރިސުންނާއި ބެލެނިވެރިން މުއާމަލާތުކުރުމަށް ވަކިވަކި ގްރޫޕްތައް ބޭނުންނުކުރުމަށް
  • ކޮމިއުނިޓީ ގްރޫޕް މެދުވެރިކޮށް މެސެޖު ފޮނުވާ އެންމެ ލަސް ގަޑިއަކީ ސްކޫލް ދަންފަޅި ނިމޭތާ ދެ ގަޑިއިރަށް ވުރެ ލަސް ގަޑިއަކަށް ނުހެދުމަށް

އަދި ދަރިވަރުންނާ ހަވާލުކުރެވޭ މަސައްކަތްތައް ބެލެނިވެރިޔާއަށް އެންގުމަށް ގްރޫޕްތައް ބޭނުންކުރުމުގެ ބަދަލުގައި، ދަރިވަރުންގެ އަމިއްލަ އުނގެނުމަށް ޒިންމާވާން ދަސްވާނެ ފަދަ އާދަތައް އަށަގެންނެވުމަށް މަސައްކަތްކުރުމަށް ވެސް އެ ސާކިއުލާގައި މިނިސްޓްރީން ސްކޫލްތަކަށް އަންގާފައިވެއެވެ.

ހަބަރު އެޑިއުކޭޝަން މިނިސްޓްރީ