ސިވިލް ސާވިސް ކޮމިޝަނަށް މެންބަރަކު އަދި ޖުޑިޝަލް ސާވިސް ކޮމިޝަނަށް ދެ މެންބަރުން ރައީސުލްޖުމްހޫރިއްޔާ ޑރ. މުހައްމަދު މުއިއްޒު، މިއަދު އައްޔަން ކުރައްވައިފިއެވެ.
މި ތިން ބޭފުޅުން މަގާމަށް އައްޔަން ކުރައްވާފައި ވަނީ ރައީސް އޮފީހުގައި ބޭއްވި ހާއްސަ ރަސްމިއްޔާތެއްގައެވެ. އެގޮތުން ސިވިލް ސާވިސް ކޮމިޝަނުގެ މެންބަރުކަމަށް ރައީސް އައްޔަން ކުރެއްވީ ދަފްތަރު. ނަންބަރު ރސ 9472، ފާތިމަތު ހަބީބާއެވެ.
އަދި ޖުޑިޝަލް ސާވިސް ކޮމިޝަނަށް އައްޔަންކުރެއްވި ދެ މެންބަރުންނަކީ ރައްޔިތުންގެ މަޖިލީހުގެ ރައީސް ލ.ފޮނަދޫ، އަރާއިރު، އަބްދުއްރަހީމް އަބްދުﷲގެ އިތުރުން ރައްޔިތުންގެ މަޖިލީހުގެ މާފުށި ދާއިރާގެ މެންބަރު ކ.ގުރައިދޫ، ސީވީޑް ހުސެއިން ރިޟާ އާދަމެވެ.
އަބްދުއްރަހީމް އެ މަގާމަށް އައްޔަންކުރައްވާފައި ވަނީ ރައްޔިތުންގެ މަޖިލީހުގެ ރައީސްގެ ހައިސިއްޔަތުންނެވެ. އަދި ހުސެއިން ރިޟާ އައްޔަންކުރައްވާފައި ވަނީ ރައްޔިތުންގެ މަޖިލީހުގެ މެންބަރުންގެ ތެރެއިން، އެ މަޖިލީހުން ކަނޑައަޅާ މެންބަރެއްގެ ހައިސިއްޔަތުންނެވެ.
މި ތިން ބޭފުޅުންނަށް ޖުޑިޝަލް ސާވިސް ކޮމިޝަނުގެ މެންބަރުކަމުގެ ހުވާލައިދެއްވީ ސުޕްރީމް ކޯޓްގެ ފަނޑިޔާރު ޑރ. މުހައްމަދު އިބްރާހީމެވެ. މި ރަސްމިއްޔާތުގައި މެންބަރު ކަމަށް އައްޔަން ކުރެއްވި ކަމުގެ ލިޔުން، މި ތިން ބޭފުޅުންނަށް ރައީސުލްޖުމްހޫރިއްޔާ ވަނީ އަރުވާފައެވެ.
