އެމެރިކަން އެކްސްޕްރެސް ކާޑު ބޭނުންކޮށްގެން އާރްޓީއެލް ބަސް ޓިކެޓަށް ފައިސާ ދެއްކޭނެ އިންތިޒާމް އެމްޓީސީސީ އިން ހަމަޖައްސައިފި އެވެ.
މި ހިދުމަތުގެ ދަށުން ކޮންޓެކްޓްލެސް އެމެރިކަން އެކްސްޕްރެސް ޑެބިޓް އަދި ކްރެޑިޓް ކާޑު އޮންނަ ކޮންމެ ފަރާތަކަށް އެ ކާޑު ޖައްސާލުމަށްފަހު ބަސްތަކުގައި ދަތުރުކުރެވޭނެ ކަމަށް އެމްޓީސީސީން ބުނެއެވެ.
މިއީ އާންމު ދަތުރުފަތުރުކުރުމަށް ވީހާވެސް ފަސޭހަ އިންތިޒާމްތަކެއް ފަހިކޮށްދިނުމަށް ކުރަމުންދާ މަސައްކަތުގެ ތެރެއިން ތައާރަފް ކުރި ހިދުމަތެއް ކަމަށް މާލެ އާއި އަތޮޅު ތެރޭގައި ބަހުގެ ހިދުމަތް ދެމުން އަންނަ އެމްޓީސީސީން ބުނެއެވެ.
ކޭޝް ކާޑު ބޭނުންކޮށްގެން އާރްޓީއެލް ބަސް ޓިކެޓު ނެގޭނެ އިންތިޒާމު ފުރަތަމަ ހަމަޖެއްސީ 2023 ވަނަ އަހަރުގެ ޖެނުއަރީ މަސް ތެރޭގައެވެ. ކޭޝް ކާޑުން ނަމަ އޭރު ފައިސާ ދެއްކުނީ ހަމައެކަނީ ވިސާ ކާޑު ބޭނުންކޮށްގެންނެވެ. ނަމަވެސް މިއަދު ތައާރަފް ކުރި މި ހިދުމަތާއެކު ބަހުގައި ދަތުރު ކުރާ ފަރާތްތަކަށް އިތުރު ލުޔެއް ލިބިގެންދާނެ އެވެ.
ބަސްދަތުރު ތަކުގައި މިހާރު ތިން ގޮތަކަށް ފައިސާ ދެއްކޭނެ އެވެ. އެއީ ނަގުދު ފައިސާ ދެއްކުމާއި، ވެބްސައިޓް ބޭނުންކޮށްގެން ޓިކެޓް ރިޒަވޭޝަން ހައްދާއިރު ފައިސާ ދެއްކުމުގެ އިތުރުން އަތުގައި އޮންނަ ކޭޝް ކާޑު ބޭނުންކޮށްގެން ފައިސާ ކެނޑުމެވެ.
ބަހުގެ ހިދުމަތް ހޯދާ 65 އަހަރުން މަތީގެ މީހުންނާއި، 3 އަހަރުން ދަށުގެ ކުޑަކުދިންނަށް އައިޑީ ކާޑު ދެއްކެމުން ހިލޭ ދަތުރުކުރެވޭނެ އިންތިޒާމުވެސް އެމްޓީސީސީން ވަނީ ހަމަޖައްސާފައެވެ. އަދި ހާއްސަ އެހީއަށް ބޭނުންވާ ފަރާތްތަކުން އެންސްޕާއިން ދީފައިވާ ކާޑު ދެއްކުމުން ވެސް ހިލޭ ދަތުރު ކުރެވެއެވެ. މީގެ އިތުރުން، ޔުނިފޯމްގައި ތިބޭ ސްކޫލް ކުދިންނަށާއި ކޮލެޖް ޔުނިވަރސިޓީގައި ކިޔަވާ ދަރިވަރުން ސްޓޫޑެންޓް ކާޑު ދެއްކުމުންވެސް ފެރީގައި ހިލޭ ދަތުރު ކުރެވޭނެއެވެ.
