އިސްލާމިކް ޔުނިވާސިޓީ އޮފް މޯލްޑިވްސް، (އައިޔޫއެމް)އިން ގުރުއާން ހިތުދަސްކުރާ ފަރާތްތަކަށް އިތުރު އިމްތިހާނެއް ހެދުމަކާ ނުލައި ހާފިޒުކަމުގެ ސަނަދު ލިބޭގޮތަށް އުސޫލުތައް ބަދަލުކޮށްފިއެވެ.
ހާފިޒުން އިމްތިހާނުކުރުމުގެ އުސޫލަށް ގެނައި މި ބަދަލަކީ ހާފިޒުކަމުގެ އިމްތިހާނު ކުރުމާ، ހާފިޒުކަމުގެ ސަނަދު ދިނުމާ، ޙާފިޒުންނަށް އިނާޔަތްތައް ދިނުމާ، ހާފިޒުންގެ ދަފުތަރު ބެލެހެއްޓުމުގެ މަސައްކަތް ކީރިތި ގުރްއާނާބެހޭ ގައުމީ މަރުކަޒުގެ މެންޑޭޓުގައި ހިމެނިފައިވާ މަސައްކަތެކެވެ. އިސްލާމިކް މިނިސްޓްރީން ބުނީ މި އުސޫލަކީ އެ މަސައްކަތް ކުރިޔަށް ގެންދިއުމުގައި އަމަލުކުރާނެ ގޮތް ބަޔާންކުރުމަށް އެކުލަވާލާފައިވާ އުސޫލެއްކަމަށެވެ.
މީގެކުރިން އޮންނަ ގޮތުން އައިޔޫއެމްއިން ގުރުއާން ހިތުދަސްކުރާ ފަރާތްތައްވެސް ސަނަދު ހާސިލުކުރުމަށް އިތުރު އިމްތިހާންތައް ހަދަންޖެހޭއިރު އިސްލާމިކް މިނިސްޓްރީން ބުނީ ދެން އައިޔޫއެމްއިން ގުރުއާން ހިތުދަސްކުރާ ފަރާތްތަކަށް އިތުރު އިމްތިހާނެއް ހަދަން ނުޖެހޭނެކަމަށެވެ.
މީގެ އިތުރުން މި އުސޫލަށް އުސޫލަށް ގެނައި އެހެން ބައެއް ބަދަލުތަކުގެ ތެރޭގައި ރަށްރަށުގައި ތިބި ގުރުއާން ހިތު ދަސްކޮށް، މުރާޖައާކުރުމަށްފަހު ހަމައެކަނި އިމްތިހާން ހެދުމަށް މާލެ އަންނަ ގޮތަށް އުސޫލު ވަނީ ބަދަލުކޮށްފައެވެ. އަދި ކީރިތި ގުރްއާނާ ބެހޭ ގައުމީ މަރުކަޒުގައި ރަޖިސްޓަރީކޮށްގެން ހިންގާ، ގުރްއާން ހިތުދަސްކޮށްދޭ ކުލާހެއްގެ ދަރިވަރަކު ހާފިޒުކަމުގެ އިމްތިހާނު ކޮށްދިނުމަށް އެދި، އެ މަރުކަޒަށް ނުވަތަ އެ މަރުކަޒުން ކަނޑައަޅައިފައިވާ ކޮމިޓީއަށް ހުށަހެޅުމުން، އެ ދަރިވަރަކު އިމްތިހާނު ކޮށްދޭ ގޮތަށް އުސޫލުވަނީ އެކުލަވާލާފައެވެ.
