ޑިޖިޓަލް ޓްރާންސްފޯމޭޝަންގައި ރާއްޖެ ދައްކުވައި ދެނީ ދިމާވާ ގޮންޖެހުން ތަކުން އަރައިގަނެ، ފަރަގު ނައްތާލަން މަސައްކަތް ކުރާ ގައުމެއްގެ ގޮތުގައި ކަމަށާއި މި ބަދަލަކީ ރާއްޖެއަށް އެކަނި ވާނެ ކަމެއް ނޫން ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ހަތަރުވަނަ އިންޓަނޭޝަނަލް ކޮންފަރެންސް އޮން ސްމޯލް އައިލެންޑް ޑިވެލޮޕިން ސްޓޭޓްސް (ސިޑްސް)ގައި ވާހަކަފުޅު ދައްކަވަމުން މުއިއްޒު ވިދާޅުވީ، ޑިޖިޓަލް ސޮލިއުޝަންތަކުގެ ބޭނުން ހިފުމުން މޫސުމަށް އަންނަ ބަދަލުތަކަށް އަހުލުވެރިވެ، ސިއްހީ ހިދުމަތާއި ތައުލީމު ކުރިއެރުވުމާއި، އާންމު ހިދުމަތް ފޯރުކޮށްދިނުން ހަރުދަނާ ކުރުމާއި، އިގްތިސޯދުތައް ޑައިވާސިފައިކޮށް، ދިރިއުޅުމުގެ އިތުރު ފުރުސަތުތައް ތަނަވަސްވެގެންދާ ކަމަށެވެ. މީގެ އިތުރުން މިހާރަށް ވުރެ ހަރުދަނާ ވެރިކަމެއް ހިންގުމަށް މަގުފަހިވެ، ރައްޔިތުންގެ ބައިވެރިވުން އިތުރުވެގެންދާ ކަން ރައީސް ފާހަގަ ކުރެއްވިއެވެ.
އިނޮވޭޝަނާއި ޓެކްނޮލޮޖީގެ ރޮނގުން ހުރި ގޮންޖެހުންތައް ފުރުސަތަކަށް ބަދަލުކޮށް، އެންމެންނަށް ދެމެހެއްޓެނިވި އަދި ތަނަވަސް މުސްތަގުބަލަކަށް މަގު ފަހިކޮށްދެވިދާނެ ކަމަށް ރައީސް ވިދާޅުވިއެވެ. ރާއްޖެއަކީ އެންމެ ކުޑަކޮށް ތަރައްގީވެފައި އޮތް ގައުމެއްގެ ގޮތުގައި އޮތްއިރު، ހުރިހާ ރަށަކަށް ޔުނިވާސަލް ޓެލެފޯން ކަވަރޭޖް ހާސިލްކޮށްފައިވާ ކަން ރައީސް ފާހަގަ ކުރެއްވިއެވެ. މިއަދު ވަރަށް ގިނަ ވެބް އެޕްލިކޭޝަންތަކާއި ޕޯޓަލްތައް މެދުވެރިކޮށް، ޔުޓިލިޓީސް، ހެލްތްކެއާ، އެޑިޔުކޭޝަން، ހައުސިން، ސޯޝަލް ވެލްފެއާގެ ހިދުމަތް ފަދަ މުހިންމު ހިދުމަތްތައް، ރާއްޖޭގެ ހުރިހާ ރައްޔިތުންގެ އިނގިލިކުރިއާ ހަަމމައަށް ގެނެސްދެވިފައިވާ ކަމަށް މުއިއްޒު ވިދާޅުވިއެވެ. ކުރިއަށް ބަލައިލާއިރު، 5ޖީއަށް ބޭނުންވާ އިނޮވޭޓިވް ބޭނުންތައް ހޯދުމުގެ ތެރޭގައި ޑްރޯން ނެޓްވޯކެއް މެދުވެރިކޮށް މެޑިކަލް ސާމާނު ފޯރުކޮށްދެވޭނެ ނިޒާމެއް، ސްމާޓް ރޯޑް ސިސްޓަމް، އޭއައި އިންޓަގްރޭޓެޑް ޖީއައިއެސް ފޯ ގިރަޝަން ޑިޓެކްޝަން އަދި އެންވަޔަރަންމަންޓަލް މޮނިޓަރިން ފަދަ ވަސީލަތްތައް ވެސް ތައޜާަފްކުރަމުން އަންނަ ކަން ރައީސް ފާހަގަކުރެއްވިއެވެ.
ޔޫއެންޑީޕީ އޮން ސްމޯލް އައިލެންޑް ޑިޖިޓަލް ސްޓޭޓްސް އިން ދާދި ފަހުން ނެރުނު ރިޕޯޓުގައި ވަނީ ޑިޖިޓަލް ޓްރާންސްފޯމޭޝަނާއި ސައިބާ ސެކިއުރިޓީއާ ގުޅިފައިވާ ހަގީގަތްތަކާއި ގޮންޖެހުންތައް ފާހަގަކޮށްފައެވެ. އެ ރިޕޯޓަށް އަލިއަޅުއްވާ ލައްވަމުން ރައީސް ވިދާޅުވީ، ސައިބާ ސެކިއުރިޓީގެ ކަންބޮޑުވުންތަކަކީ މުޅި ދުނިޔޭގައި ވެސް ދިމާވެފައިވާ މައްސަލައެއް ކަމަށެވެ. ހުއްދަ ނޫން އެކްސެސް، އެކައުންޓް ހައިޖެކް ކުރުން އަދި ޑޭޓާ ޕްރައިވެސީ ބްރީޗްވުން ފަދަ މައްސަލަތައް ކޮްނެ ދުވަހަކު ފެންނަމުން އަންނަ އިރު، ހަރުދަނާ ސައިބާ ސެކިއުރިޓީ އިންފްރާސްޓްރަކްޗަރަކީ ހަމައެކަނި އެދޭ ކަމެއް ނޫން ކަމަށާއި އެއީ އަސާސީ ކަމެއް ކަމަށެވެ.
ޑިޖިޓަލް އިންގިލާބުގެ ސަބަބުން ޑިޖިޓަލް ރޮނގުތައް އުނގަންނައިދީ ހަރުދަނާ ކުރުމުގެ މަސްއޫލިއްޔަތެއް އެ އިންގިލާބުގެ ސަބަބުން ޑިޖިޓަލްގެ ބޭނުން ނުބައި މަގްސަދުތަކަށް ހިފާނެ ފަރާތްތަކާ ދެކޮޅަށް ހަރުދަނާ ކުރުމުގެ ފިޔަވަޅުތައް އަޅަމުން އަންނަ ކަމަށް އެމަނިކުފާނު ވިދާޅުވިއެވެ. އެގޮތުން ނެޝަނަލް ސެންޓަ ފޯ އިންފޮމޭޝަން ޓެކްނޮލޮޖީގެ ދައުރު އިތުރަށް ފުޅާކުރައްވަމުން ގެންދަވާކަމަށާއި އަދި ނެޝަނަލް ސައިބާ ސެކިއުރިޓީ އޭޖެންސީ އުފައްދައި، ޑިޖިޓަލް ދާއިރާއިން މިހާރު އުފެދިފައިވާ ސަލާމަތީ ކަންބޮޑުވުންތަކާއި، ނުރައްކާތަކާއި ޓްރެންޑްތަކަށް ހައްލެއް ގެނައުމަށްޓަކައި ހަދަންޖެހޭ ޤާނޫނުތައް ތައާރަފްކުރާނެ ކަމަށް ވެސް ރައީސް ވިދާޅުވިއެވެ.
ޑިޖިޓަލް އިގްތިސޯދަކަށް ބަދަލުވުމުގެ މަސައްކަތް އަދިވެސް މިދަނީ ކުރަމުން ކަމަށާއި މިކަމަކީ އެކަނި ހާސިލް ވާނެ ކަމެއް ނޫން ކަމަށް ރައީސް ވިދާޅުވިއެވެ. މި ބަދަލަށް ދިއުމަށް ބައިނަލްއަގްވާމީ އެއްބާރުލުމާއި، ގިނަ އަދަދެއްގެ އިންވެސްޓްމަންޓްތަކާއި ޕާޓްނާޝިޕްތައް ބޭނުންވާ ކަން ރައީސް ފާހަގަ ކުރެއްވިއެވެ.
އެމަނިކުފާނުގެ ސަރުކާރަކީ، ރާއްޖޭގެ އެންމެހާ ރައްޔިތުންނަށް ފައިދާ ކުރާނެ ޑިޖިޓަލް ހިދުމަތްތައް އިތުރަށް އަޕްގްރޭޑްކޮށް، އާ ޑިޖިޓަލް ހިދުމަތްތަކެއް ތައާރަފްކުރުމަށް މަސައްކަތް ކުރާ ސަރުކާރެއް ކަމަށް ރައީސް ވިދާޅުވިއެވެ ކޮންމެ ގައުމެއްގެ ވެސް އަމިއްލަ ލިމިޓޭޝަންތަކެއް އޮންނައިރު، ރާއްޖެ ފަދަ ކުދި ޖަޒީރާ ގައުމުތަކަށް އަހަންމިއްޔަތުކަން ދޭން ބޭނުންފުޅުވާ ކަމަށް ރައީސް ވިދާޅުވިއެވެ. އެގޮތުން ބައިނަލްއަގްވާމީ މުޖުތަމައަށް ދައްކައިދޭން ބޭނުންވަނީ، ރާއްޖެއަކީ ކުރިމަތިވަމުން އަންނަ ގޮންޖެހުންތަކާ އެކު ވެސް، އެ ގޮންޖެހުންތަކުން އަރައިގަނެ، ފަރަގުތައް ނައްތާލެވޭނެކަމުގެ ސާބިތުކަމާއެކު ހަރުދަނާ އަޒުމެއްގައި ތިބެ ނަތީޖާ ނެރޭ ގައުމެއްގެ ގޮތުގައި ކަމަށް ރައީސް ވިދާޅުވިއެވެ.
