ސިނަމާލެ ބްރިޖާ ދިމާ ކަނޑުމަތިން އޮޔާ ދަނިކޮށް ފެނިފައި ވަނީ ބިދޭސީ އަންހެނެއް ކަމަށް އައިޖީއެމްއެޗް އިން ބުނެފިއެވެ.
ސިނަމާލެ ބްރިޖާ ދިމާ ކަނޑުމަތިން އެ މީހާ އޮޔާދަނިކޮށް ފެނިފައި ވަނީ އިއްޔެ މެންދުރުގެ ވަގުތެއްގައެވެ.
އައިޖީއެމްއެޗްގެ މީޑިއާ އޮފިޝަލް "ދަ ޕްރެސް"އަށް ވިދާޅުވީ އެއީ ބިދޭސީއެއްކަން މިހާރު ޔަގީން ކުރެވިފައިވާ ކަމަށެވެ.
މި މައްސަލައާ ގުޅިގެން ފުލުހުން މީގެކުރިން ބުނެފައިވަނީ ސިނަމާލެ ބްރިޖާ ދިމާ ކަނޑުމަތިން މީހަކު އޮޔާ ދާ ކަމުގެ މައުލޫމާތު އިއްޔެ 12:35 ހާ އިރު ލިބިފައިވާ ކަމަށެވެ.
އެ މީހާ ނަގައިގެން ވަނީ އައިޖީއެމްއެޗް ހޮސްޕިޓަލަށް ގެންގޮސްފައިވާއިރު، އައިޖީއެމްއެޗްގެ އޮފިޝަލު ވިދާޅުވި ގޮތުގައި އޭނާ ހޮސްޕިޓަލަށް ގެންދިޔަ އިރު ވެސް ވަނީ މަރުވެފައެވެ.
މައުލޫމާތު ލިބިފައިވާ ގޮތުން އޭނާގެ ހަށިގަނޑު ފެނުނީ އެ ސަރަހައްދުން ދުއްވާފައި ދިޔަ ލޯންޗަކަށެވެ. އޭނާ މަރުވެގެން މައްޗަށް އަރާފައި އޮތުމުން ޑިންގީ އަކަށް އަރުވައިގެން ހޮސްޕިޓަލަށް ގެންދިޔައީ އެވެ.
