ރ. އުނގޫފާރުގައި ކަރަންޓުގައި ޖެހިގެން ހާލު ސީރިއަސްވި ޒުވާނާ އިތުރު ފަރުވާއަށް މާލެ ގެންނަން ނިންމާފައިވާ ކަމަށް ރީޖަނަލް ހޮސްޕިޓަލުން ބުނެފިއެވެ.
މި ދިޔަ ބުރާސްފަތި ދުވަހު އުނގޫފާރުގައި މަގުމަތީގައި ކުޅެން އުޅުމުގެ ތެރޭގައި ކަރަންޓުގައި ޖެހުނު ކުއްޖަކު ސަލާމަތް ކުރުމަށް މަސައްކަތްކުރި 18 އަހަރުގެ ފިރިހެން މީހާއަށް ފަރުވާދީފައި ވަނީ ރީޖަނަލް ހޮސްޕިޓަލްގެ އައިސީޔޫގައެވެ.
ކަރަންޓުގައި ޖެހުނު 12 އަހަރުގެ އަންހެން ކުއްޖާއާއި 8 އަހަރުގެ ފިރިހެން ކުއްޖާގެ އިތުރުން އެ ޒުވާނަކު އެ ހޮސްޕިޓަލަށް ގެންގޮސްފައި ވަނީ ބުރާސްފަތި ދުވަހު މެންދުރުފަހު 1:40 ހާއިރެވެ.
އެ ދެ ކުދިންނަށް ފަރުވާ ދިނުމަށްފަހު އެ ދުވަހު ވަނީ ހޮސްޕިޓަލުން ދޫކޮށްލާފައެވެ.
އެ ހާދިސާއާ ގުޅޭ އެންމެ ފަހުގެ މައުލޫމާތު ހިއްސާ ކުރައްވަމުން އުނގޫފާރު ރީޖަނަލް ހޮސްޕިޓަލްގެ މެނޭޖަރު ހުސެއިން އާސިފް 'ދަ ޕްރެސް' ވިދާޅުވީ 18 އަހަރުގެ ޒުވާނާ އިތުރު ފަރުވާއަށް މާލެ ގެންނަން ނިންމާފައިވާ ކަމަށެވެ. އަދި މިއަދު ހަވީރުގެ ވަގުތެއްގައި މާލެ ގެންނާނެ ކަމަށް އާސިފް ވިދާޅުވިއެވެ.
އެގޮތަށް ނިންމާފައި ވަނީ މިހާރުގެ ހާލަތުން ނެފްރޮލޮޖިސްޓެއްގެ ލަފައާއެކު ކަމަށް ފެންނާތީ ކަމަށް އާސިފް ވިދާޅުވިއެވެ. އަދި އެތެރެ ހަށީގެ ގުނަވަންތަކަށް ހާއްސަ ޑޮކްޓަރުންގެ ލަފާވެސް ބޭނުންވާ ކަމަށް ވެސް އާސިފް ވަނީ ފާހަގަ ކުރައްވާފައެވެ.
އެ ހާދިސާ ހިނގާފައި ވަނީ ވިއްސާރަވެގެން ބައްތިއަށް ކަރަންޓް އައިސްފައި ހުރެގެންނެވެ.
