މުސްލިމުން ޝަހީދު ކޮށް ގާޒާ ތަޅާ ފުނޑުފުނޑު ކުރުމަށް ފަހު ދެން ހަދާނެ ގޮތެއް ޖޫން 8 ގެ ނިޔަލަށް ބުނެ ނުދީފި ނަމަ ނަތަންޔާހޫގެ ސަރުކާރުން އިސްތިއުފާ ދޭނެ ކަމަށް ބުނެ އިދިކޮޅު ލީޑަރު ބެނީ ގޭންޒް އިންޒާރު ދީފިއެވެ.
އޭނާ ބުނީ، ހަނގުރާމަ އަށް ފަހު ގާޒާގެ ކަންކަން ބެލެހެއްޓުމަށް 6 ނުކުތާގެ މައްޗަށް އެކުލެވޭ ހުށަހެޅުމެއް އޭނާގެ ފަރާތުން ހަނގުރާމައިގެ ކެބިނެޓަށް ހުށަހަޅާފައި ވާ ކަމަށާއި އެއް ކަމެއްގެ ގޮތުން ގާޒާގެ ކަންކަން ބެލެހެއްޓުމަށް ބައިނަލްއަގުވާމި ކޯލިޝަނެއް އުފެއްދުމަށް ހުށަހަޅާފައި ވާނެ ކަމަށެވެ.
ކުރިން ޑިފެންސް މިނިސްޓަރުކަން ވެސް ކުރި އަދި ނަތަންޔާހޫއާ އިދިކޮޅު ޕާޓީގެ ލިޑަރަކީ ގާޒާގެ ހަނގުރާމަ އާ ގުޅިގެން މިދިޔަ އަހަރު އެކުލަވާލި އެމަޖެންސީ ކެބިނެޓުގައި ނަތަންޔާހޫއާ ބައިވެރިވެފައި ވާ މީހެކެވެ.
އޭނާ ނަތަންޔާހޫ އާ ބައިވެރިވި ނަމަވެސް ގާޒާގައި އިޒްރޭލުން ހިނގާ ގަތުލުއާންމާ ގުޅިގެން ބޭރާއި އެތެރެއިން ކުރިމަތިވާ ޕްރެޝަރުތަކާ ހެދި އޭނާ ނަތަންޔާހޫއާ ހިޔާލުތަފާތުވަމުން ދެއެވެ. މިހަފަރު އޭނާ އިންޒާރު ދިން މައްސަލަ އަކީ ގާޒާ ހިފާނެ ކަމަށް ނަތަންޔާހޫ ބުނާ ބުނުމާއެކު ހަނގުރާމަ އަށް ފަހު އަމަލު ކުރާނެ ގޮތެއްގެ ސާފު ޕްލޭނެއް ނެތުމުގެ މައްސަލައެވެ.
އޭނާގެ ޕްލޭންގައި ހަމާސްގެ އަތްދަށުގައި ތިބި ރަހީނުން މިނިވަން ކުރުމާއި ހަނގުރާމަ އަށް ފަހު އަސްކަރީ އެއްވެސް ހަރަކާތެއް ނުހިންގޭ ސަރަހައްދެއްގެ ގޮތުގައި ގާޒާ ބޭއްވުމާއި ބައިނަލްއަގުވާމީ ފައުޖެއްގެ ބަލުމުގެ ދަށުން ގާޒާގެ ކަންކަން ގެންދަން ހުށަހެޅިއެވެ. އެ ކޯލިޝަނުގައި އެމެރިކާ، ޔޫރަޕް، އަރަބިން އަދި ފަލަސްތީން ތަމްސީލު ކުރާ ބައެއް ހިމެނުމަށް ހުށަހަޅާފައި ވެއެވެ. އޭގައި ހިމެނޭ ފަލަސްތީން ސަރުކާރަށް އިޝާރާތް ކޮށް އޭނާ ބުނީ، ގާޒާގެ ކަންކަން ބެލެހެއްޓުމުގައި ފަލަސްތީނު ސަރުކާރުގެ ފަރާތުން މަހްމޫދު އައްބާހާއި އަދި ހަމާސްގެ އެއްވެސް މަންދޫބަކަށް ބައިވެރި ނުވެވޭނެ ކަމަށެވެ.
އަދި ހަނގުރާމައިގެ އެއްވެސް ހަރަކާތެއް ނުހިނގާ ސަރަހައްދެއްގެ ގޮތުގައި ގާޒާ ބޭއްވުން އޭނާ މާނަ ކުރަނީ އެކީ އެކަށް ހަމާސް ނައްތާލުން ކަމަށް ވެސް ބުނެފައި ވެއެވެ.
އިޒްރޭލުން ގާޒާއަށް ދެމުން ގެންދާ ހަމަލާތަކުގައި މިހާތަނަށް 35،000 މީހަކު ވަނީ ޝަހީދު ކޮށްލައިފައެވެ. އަދި ޒަހަމް ކޮށްލި މީހުންގެ އަދަދު 90،000 އަށް އަރައެވެ.
