ޗިކުންގުންޔާ އާއި ޑެންގީ ފެތުރުން ކޮންޓްރޯލް ކުރުމަށް ކުރަން ޖެހޭ ހުރިހާ ކަމެއް ކުރައްވާނެ ކަމަށާއި އަމިއްލަ ފަރުދުން ވެސް މި ބަލި ނައްތާލުމަށް މަސައްކަތް ކުރަން ޖެހޭ ކަމަށް ހެލްތް މިނިސްޓަރު ޑރ. އަބްދުﷲ ހަލީލް ވިދާޅުވެއްޖެއެވެ.
ހެލްތް މިނިސްޓްރީން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ހަލީލް ވިދާޅުވީ، މިދުވަސްވަރު ޗިކުންގުންޔާއާއި ޑެންގީ ފެތުރުން އިތުރުވެފައި ވާތީ، މި ބަލިތައް ރާއްޖޭގައި ކޮންޓްރޯލް ކުރުމަށް ކުރަންޖެހޭ ހުރިހާ ކަމެއް ސަރުކާރުން ކުރާ ކަމަށެވެ. އަދި ސަރުކާރެކޭ އެއްގޮތަށް އަމިއްލަ ފަރުދުންވެސް މި ބަލިތައް ނައްތާލުމަށް މަސައްކަތް ކުރަންޖެހޭ ކަމަށާއި، ވަށައި ޖެހޭ ގޮތަކަށް މަސައްކަތް ކޮށްގެން ނޫނީ މި ބަލިތައް ކޮންޓްރޯލް ނުކުރެވޭނެ ކަމަށް ހަލީލް ވިދާޅުވިއެވެ.
މި ބަލިތަކުން ރައްކާތެރިވުމަށްޓަކައި މަދިރި އާލާވާ ތަންތަން ނައްތާލުމާއި ސާފުތާހިރުކޮށް ގޯތިގެދޮރު ބެލެހެއްޓުމަކީ އެންމެންވެސް ކޮންމެހެން ކުރަންޖެހޭ ކަންކަން ކަމަށް ހަލީލް ވިދާޅުވިއެވެ. އެހެންކަމުން ދިވެހި ކޮންމެ ފަރުދަކު ވެސް މިގޮތަށް މަސައްކަތް ކުރުމަށް ހަލީލް ގޮވާލެއްވިއެވެ.
ހަމައެއާއެކު ރާއްޖޭގައި ގިނަ އަދަދެއްގެ ބިދޭސީން މަސައްކަތް ކުރަމުން ދާތީ އެމީހުންނަށް އާމާޒުކޮށްގެން ވެސް ޗިކުންގުންޔާ އާއި ޑެންގީއަށް ހޭލުންތެރި ކުރުމުގެ ޕްރޮގްރާމުތައް ފަށާފައިވާ ކަމަށް ހަލީލް ވިދާޅުވިއެވެ. އެގޮތުން އެމީހުންގެ ބަހުން އަތޮޅުތަކާއި، މާލޭގައި ހޭލުންތެރިކުރުމުގެ ޕްރޮގްރާމުތައް ވަނީ ފަށާފައެވެ.
ޑެންގީއާއި ޗިކުންގުންޔާ ފެތުރުން މިދުވަސްވަރު އިތުރުވެފައިވާތީ މި ބަލިތައް ކޮންޓްރޯލްކުރުމަށް ސަރުކާރުން ގެންދަނީ ގިނަ މަސައްކަތްތަކެއް ކުރަމުންނެވެ. އެގޮތުން މާލެއާއި އަތޮޅުތަކުގެ ބައެއް ރަށްރަށުގައި ފޮގް ކުރުމާއި މަދިރި އާލާވާ ތަންތަން ނައްތާލުމާއި ކުނި އުފެދޭ ތަންތަން ސާފުކުރުމާއި، ހޭލުންތެރިކަމުގެ ޕްރޮގްރާމްތައް އަންނަނީ ހިންގަމުންނެވެ.
ހެލްތް މިނިސްޓްރީން އާންމުކުރި މައުލޫމާތަށް ބަލާއިރު. މި މަހުގެ 11 ވަނަ ދުވަހާ ހަމައަށް ވަނީ ޑެންގީ ހުމުގެ 747 ކޭސް ވަނީ ފެނިފައެވެ. ހަމައެއާއެކު ޗިކުންގުންޏާގެ 389 ކޭސް ވަނީ ފެނިފައެވެ. މި ދެ ބައްޔަކީވެސް އީޑީސް މަދިރިން ޖެހޭ ބައްޔަށް ވާއިރު، ޒިކާ ވައިރަސް ފެތުރެމުންދާ ކަމަށް ވެސް ވަނީ އަޑުތައް ފެތުރިފައެވެ. ނަމަވެސް ހެލްތް މިނިސްޓްރީން ވަނީ އީޑީސް މަދިރިން ޖެހޭ ޒިކާ ވައިރަސް ފަތުރެމުންދާ ކަމަށް ދެކެވޭ ވާހަކަތައް ދޮގު ކޮށްފައެވެ.
