ޕީޕީއެމް ޕީއެންސީ ވެރިކަމަށް އަންނަ ކޮންމެ ފަހަރަކު 'ސަރުކާރުން' މަޖިލީހުގެ ޖަލްސާތައް ހުއްޓުވާލާ ކަމަށާއި ޕީޕީއެމްގެ ވެރިކަމުގައި ވެސް މަޖިލީސް ހުއްޓުވީ ސީދާ ސަރުކާރުން ބޭނުންވެގެންކަމަށް އެމްޑީޕީގެ ޗެއާޕާސަންގެ ނާއިބު އިބްރާހީމް ވަހީދު (އިބުރޭ) ވިދާޅުވެއްޖެއެވެ.
ރޭ އެމްޑީޕީ ހަރުގޭގައި ބޭއްވި ޖަލްސާގައި މި ސަރުކާރަށް ވަރަށް ބޮޑަށް ފާޑުވިދާޅުވަމުން އިބްރާހިމް ވަހީދު ވިދާޅުވީ މި ސަރުކާރަށް ނިސްބަތްވާ މަޖިލިސް މެންބަރުން، ވަޒީރުންނަށް ރުހުން ދިނުމުގެ މައްސަލައަށް ހުރަސް އަޅަނީ ރައީސް ޑރ.މުހައްމަދު މިއިއްޒު ބޭނުންފުޅުވާ ބަޔަކު ވަޒީރުކަމުން ބޭރުކުރަން އެމްޑީޕީން އެއްބަސްނުވެގެން ކަމަށެވެ.
މީގެ އިތުރުން އިބްރާހީމް ވަހީދު ވިދާޅުވީ މިހާރު ވަޒީރުންނަށް ރުހުން ނުދޭން މަސައްކަތް ކުރަނީ ވެސް ޕީޕީއެމް ޕީއެންސީއިން ކަމަށާ މިއީ ރޭވުމެއްގެ ތެރެއިން ކުރާ ކަމެއްކަމަށެވެ.
ދައުރުން ބޭރުން އާދިއްތަ ދުވަހު މަޖިލީހުގެ ޖަލްސާ އެއް ބާއްވަން މަސައްކަތް ކުރުމުން، އެ ޖަލްސާ ކުރިއަށް ގެންދިޔަ ނުދީ ސަރުކާރު މެންބަރުން މަޖިލީހުގެ ނިޒާމް ގެއްލުވާލާފައިވާތީ އެކަމަށް ފާޑުވިދާޅުވަމުން އިބްރާހީމް ވަހީދު ވަނީ އެއީ ސިދާ ސަރުކާރުން ކުރަމުން ދާ ކަމެއް ކަމުގައި ތުހުމަތުކޮށްފައެވެ. އަދި ޕީޕީއެމް ޕީއެންސީ ވެރިކަމުގައި ކޮންމެ ފަހަރަކު މަޖިލީސް ހުއްޓުވާލާކަން ފާހަގަކޮށް އިބްރާހީމް ވަހީދު ވިދާޅުވީ ޕީޕީއެމްގެ ވެރިކަމުގައި ކުރިންވެސް ސަރުކާރުން ނުފޫޒު ފޯރުވައިގެން މަޖިލީސް ހުއްޓުވީ ސަރުކާރު މެންބަރުން ކަަމަށާއި މިހާރުވެސް ކަންކަން ހިނގަނީ އެހެންކަމަށެވެ.
