މި ސަރުކާރުން 22 މިނިސްޓްރީއަކަށް އައްޔަންކުރި 22 މިނިސްޓަރުންނަށް ރުހުންދިނުމުގެ މައްސަލަ މިއަދު ބާއްވަން ތާވަލުކުރި ސަރުކާރުގެ މަސްއޫލިއްޔަތު ބަލާ ކޮމިޓީގެ ބައްދަލުވުން ކޯރަމް ހަމަނުވެގެން ކެންސަލްކޮށްފިއެވެ.
އެ ބައްދަލުވުން ތާވަލުކޮށްފައިވަނީ މިއަދު ހެނދުނު 9 ޖަހާއިރު ކަމަށްވާއިރު އެ ކޮމިޓީ ފެށުމަށް ހަތަރު މެންބަރުން ތިބެން ޖެހޭއިރު ވޯޓަށް އަހާ ވަގުތު ހަ މެންބަރުން ތިބެން ޖެހެއެވެ. އެހެންނަމަވެސް އެ ބައްދަލުވުމަށް މިއަދު ހާޒިރުވެފައިވަނީ ތިން މެންބަރެކެވެ.
މިނިސްޓަރުންނަށް ރުހުން ދިނުމުގެ މައްސަލަ ކޮމިޓީއިން ބެލުމަށްފަހު އެ މައްސަލަ މަޖިލީހުގެ ޖަލްސާގައި މި މަހުގެ 18 ވަނަ ދުވަހު ވަނީ އެޖެންޑާކޮށްފައެވެ. އެހެންނަމަވެސް އެ ދުވަހުގެ ޖަލްސާ ފެށުމާއެކު ތުޅާދޫ ދާއިރާގެ މެންބަރު ހިސާން ހުސައިން ވަނީ ނިޒާމީ ނުކުތާއެއް ނެންގެވުމަށްފަހު މިނިސްޓްރީތަކުގެ މެންޑޭޓު ނުފޮނުވާ ކަމަށާއި އެހެންކަމުން އެ މައްސަލާގއި ވޯޓަށް އެހުމާ މެދު ސުވާލު އުފައްދަވާފައެވެ.
އެއާއެކު މަޖިލީހުގެ ރައީސް މުހައްމަދު އަސްލަމް ވަނީ މަޖިލީހުގެ މެޖޯރިޓީ ލީޑަރު އަދި މައިނޯރިޓީ ލީޑަރާ މަޝްވަރާކުރެއްވުމަށްފަހު އެ މައްސަލަ އެ ދުވަހު ކުރިއަށް ނުގެންގޮސް އަލުން އަނބުރާ ކޮމިޓީއަށް ފޮނުވާލަން ނިންމާފައެވެ. އެއާއެކު ސަރުކާރަށް ތާއީދު ކުރައްވާ މެންބަރުން ވަނީ އެކަމާ މެދު ނުރުހުން ފާޅުކުރައްވާފައެވެ.
ހަމަ އެ ދުވަހު ރައީސް އޮފީހުން ވަނީ މިނިސްޓްރީތަކުގެ މެންޑޭޓުތައް މަޖިލީހަށް ފޮނުވާފައެވެ. މިހެން މިކަން އޮތްއިރު މިދިޔަ ރައީސް އިބްރާހިމް މުހައްމަދު ސޯލިހުގެ ސަރުކާރުގެ އައްޔަންކުރި މިނިސްޓަރުންނަށްވެސް ރުހުންދީފައިވަނީ މިނިސްޓްރީތަކުގެ މެންޑޭޓު ފޮނުވުމުގެ ކުރިންކަން ފާހަގަކުރެވެއެވެ.
މިހާރު އެއްލައްކަ މިވަރަކުންވެސްނުވި ދެން ވޭތޯބަލަން ދެލައްކައައްކަ އައް ބަދަލު ކޮއްލާ