ކާރެއް ކޮންޓްރޯލްނުވެ، ހައިވޭގައި އެކްސިޑެންޓެއް ހިނގައިފިއެވެ.
މިއަދު ހެނދުނު ހިނގި އެ ހާދިސާއާ ގުޅިގެން ފުލުހުން ބުނީ ބްރިޖް ހައިވޭއިން ދުއްވާފައި ދިޔަ ކާރެއް ހޮޅިދަނޑިއެއްގައި ޖެހި އެކްސިޑެންޓެއް ހިނގާފައިވާ ކަމަށް މިއަދު ރިޕޯޓް ކޮށްފައިވާ ކަމަށެވެ.
އެ އެކްސިޑެންޓްގައި އެއްވެސް މީހަކަށް އަނިޔާވެފައި ނުވާ ކަމަށް ފުލުހުން ވަނީ ބުނެފައެވެ.
މިހާރަކަށް އައިސް އެކްސިޑެންޓްތައް ގިނަވެފައިވާއިރު މި މަހުގެ 20 ވަނަ ދުވަހުގެ ރޭ ހުޅުމާލެ ސެންޓްރަލް ޕާކު ކައިރީގައި ކާރަކާއި 3 ސައިކަލު ޖެހި ހިނގި ނުރައްކާތެރި އެކްސިޑެންޓުގައި ހަތަރު މީހަކަށް އަނިޔާވެގެން ފަރުވާދީފައިވާއިރު އޭގެ ތެރެއިން އެކަކު ވަނީ މިދިޔަ ހޯމަ ދުވަހުގެ ރޭ ދަންވަރުގެ ވަގުތެއްގައި ނިޔާވެފައެވެ.
މިދިޔަ ހޯމަ ދުވަހު ތިން އެކްސިޑެންޓް ހިނގާފައިވާއިރު ފުރަތަމަ އެކްސިޑެންޓް ހިނގާފައިވަނީ އެ ދުވަހު މެންދުރު 12:09 ހާއިރެވެ. އެ އެކްސިޑެންޓުގައި ދެ ސައިކަލު ދުއްވި ދެ މީހުންނަށް އަނިޔާވެގެން ހުޅުމާލެ ހޮސްޕިޓަލުގައި ވަނީ ފަރުވާދީފައެވެ. އަދި އެ ދުވަހުގެ ދެ ވަނަ އެކްސިޑެންޓް ހިނގާފައިވަނީ ހުޅުމާލޭ ފުރަތަމަ ފިޔަވަހީގެ ރީތިގަސްމަގުގައި ކާރަކާއި ސައިކަލެއް ޖެހިއެވެ. އެ އެކްސިޑެންޓުގައި އެއްވެސް މީހަކަށް އަނިޔާވެފައެއް ނުވެއެވެ.
ހުޅުމާލެ ނިރޮޅުމަގުގައި ދެ ސައިކަލެއް ޖެހި އެ ދުވަހުގެ ތިންވަނަ އެކްސިޑެންޓް ހިނގާފައިވާއިރު އެ ހާދިސާ ހިނގާފައި ވަނީ މެންދުރު ފަހު 3 ޖަހާހާއިރުއެވެ. އެ އެކްސިޑެންޓްގައި ސައިކަލު ދުއްވަން އިން ދެ ފިރިހެނުންނަށް ވެސް އެކި ވަރުގެ އަނިޔާތައް ލިބި، ހުޅުމާލެ ހޮސްޕިޓަލުގައި ވަނީ ފަރުވާދީފައެވެ.
