ރާއްޖޭގެ މިނިވަންކަމާއި އިސްތިގުލާލު ހިމާޔަތްކޮށް، އިގްތިސޯދީ އަނދަވަޅުން އަރައިގަނެވޭނެ ކަމާއި، އިންޑިއާގެ ސަރުކާރާ ވާހަކަ ދައްކައިގެން އެ ގައުމުގެ ސިފައިން ރާއްޖޭގައި ތިބޭ ތިބުމުގެ މައްސަލަ ހައްލުކުރައްވާނެ ކަމުގެ ޔަގީންކަން، އިންތިހާބީ ރައީސް ޑރ. މުހައްމަދު މުއިއްޒު ދެއްވައިފިއެވެ.
ކުރިއަށް އޮތް ފަސް އަހަރަށް އިންތިހާބުވުމުގެ ކުރިން، މިހާރު އިދިކޮޅުގައި އޮތް ޕްރޮގްރެސިވް ކޮންގްރެސް ކޯލިޝަނުން މައިގަނޑު ގޮތެއްގައި ގޮވާލާފައި ވަނީ ރާއްޖޭގައި ތިބި އިންޑިއާ ސިފައިން އަނބުރާ ފޮނުވާލުމަށެވެ. އިންތިހާބުގެ ދުވަސްވަރު މުއިއްޒު ވަނީ، ރާއްޖޭގައި ތިބި އިންޑިއާ ސިފައިން އަނބުރާ ފޮނުވާލައްވާނެ ކަމަށް ވައުދުވެވަޑައިގެންފައެވެ.
ދައުލަތުގެ މީޑިއާ ޕީއެސްއެމަށް ދެއްވި ބަސްދީގަތުމެއްގައި މުއިއްޒު ވިދާޅުވީ، ރާއްޖެ އަށް ދިމާވެފައިވާ އިގްތިސޯދީ ހާލަތުން އަރައިގަތުމަށް ބުރަ މަސައްކަތެއް ކުރަން ޖެހިވަޑައިގަންނަވާ ކަމަށާއި، އެކަމަކު އަރައިގަނެވޭނެ ކަމުގެ ފުރިހަމަ ޔަގީންކަން އެބައޮތް ކަމަށެވެ. އެމަނިކުފާނު ވިދާޅުވި ގޮތުގައި، ބޭރު ގައުމުތަކުން ބޭނުންވަނީ:
- ރާއްޖެ އަކީ ސުލްހައަށާއި ތަރައްގީއަށާއި ޑިމޮކްރަސީ އަށް ލޯބިކުރާ ގައުމަކަށް ވާން
- ތަރައްގީވަމުން އަންނަ، ތަރައްގީ ހާސިލްކުރާ ގައުމަކަށް ވާން
ރައްޔިތުން ވަނީ ސެޕްޓެމްބަރުގައި ގޮތް ނިންމާފައި ކަމަށާއި، އެ ނިންމުމަށް ބޭރު ގައުމުތަކުން އިހްތިރާމްކުރާނެ ކަމުގެ ޔަގީންކަން އެބައޮތް ކަމަށް މުއިއްޒު ވިދާޅުވިއެވެ.
މިވަގުތު ރާއްޖޭގައި ތިބި އިންޑިއާގެ ސިފައިންނާ ބެހޭގޮތުން ވެސް މުއިއްޒު ވަނީ ވާހަކަފުޅު ދައްކަވައިފައެވެ. މުއިއްޒު ވިދާޅުވީ، އެމަނިކުފާނު ވެރިކަމާ ހަވާލުވުމުން ލަސްތަކެއް ނުވެ އިންޑިއާގެ ސިފައިން އަނބުރާ ފޮނުވާލުމުގެ މަސައްކަތް ފަށްޓަވާނެ ކަމަށާއި، އެ މަސައްކަތްކުރާނީ ދެ ގައުމަށް ވެސް ފައިދާވާ ގޮތަށް ކަމަށެވެ. އެއީ ރާއްޖެ އާއި އިންޑިއާ އަކީ ގާތް ދެ ގައުމުކަމަށް ވާތީ ކަމަށާއި، އަބަދު ވެސް އިންޑިއާއިން ރާއްޖެ އަށް އެހީތެރިކަން ދެމުން ގެންދާތީ ކަމަށް ވިދާޅުވިއެވެ.
މުއިއްޒު ވަނީ ކުރިއަށް އޮތް ތަނުގައި ވެސް ރާއްޖެ އާއި އިންޑިއާ އާ ދެމެދު އޮންނަ ގުޅުން ހަމަ އެ ގޮތުގައި ދެމި އޮންނާނެ ކަމުގެ ޔަގީންކަން ދެއްވައިފައެވެ. އެމަނިކުފާނު ވިދާޅުވި ގޮތުގައި، މިހާރު އޮތް ސަރުކާރުގެ ހާރިޖީ ސިޔާސަތާއި އިގްތިސޯދީ ސިޔާސަތުގެ ސަބަބުން އުފެދިފައިވާ މައްސަލަތައް ނޫނީ އެއްވެސް މައްސަލައެއް ނެތެވެ.
މި ހުރިހާ ކަމެއް ވެސް ހައްލުކޮށް، އެހެން ގައުމުތަކާ ގުޅިގެން ރާއްޖޭން ކުރިއަށް ދާނީ، އެމަނިކުފާނު ވިދާޅުވި ގޮތުގައި ދިވެހި ގައުމު އިސްކުރައްވައިގެންނެވެ.
މުއިއްޒު ވިދާޅުވީ، ބޭނުންފުޅު ވަނީ އިންޑިއާ އާ ގާތުން ވާހަކަ ދައްކައިގެން އެ ގައުމުގެ ސިފައިން ތިބި މައްސަލަ ހައްލުކުރުމަށް ކަމަށާއި، މިއީ މަގުމަތިން ހާސިލްކުރެވޭނެ ކަމެއް ނޫން ކަމަށެވެ.
އިންތިގާލީ މަރުހަލާގައި އިންޑިއާގެ ސަފީރު މޫނޫ މަހާވަރާ ބައްދަލުކުރެއްވުނު ކަމަށާއި، ދެ ފަހަރު ބޭއްވި ބައްދަލުވުންތަކުގައި މުހިންމު ބިނާކުރުވަނިވި ވާހަކަތައް ދެކެވުނު ކަމަށް އެމަނިކުފާނު ވިދާޅުވިއެވެ. މުއިއްޒު ވަނީ، ރާއްޖޭގައި ތިބި އިންޑިއާގެ ސިފައިން އަނބުރާ ފޮނުވާލެވޭނެ ކަމުގެ ޔަގީންކަން ދެއްވައިފައެވެ.
އެމަނިކުފާނު ވިދާޅުވީ، އިންޑިއާގެ އިތުރުން އެހެން ގައުމެއްގެ ސިފައިން ވެސް ރާއްޖޭގައި ގާއިމްވެ ތިބެން ދިވެހިން ބޭނުންނުވާ ކަމަށާއި، ކުރިއަށް ވަޑައިގަންނަވާނީ އެ މަގުން ކަމަށެވެ.
މުއިއްޒުގެ ތަޖްރިބާ މަދުކަމުންނޭ އިންޑިއާ މައްސަލަ ސުލްހަވެރިކޮށް ހައްލުވާނޭ ކަމަށް އެބުނަނީ މަމެން ދަންނަމޭ އިންޑިއަން އެޓިޓިއުޑް އެން ބިހޭވިއަރ ވަރަށް ރަނގަޅަށް އެމެން ދައްކާ ވާހަކަ ދިމާނުވާނެއޭ އިންޑިއާ ސިފައިން ބޭލޭނީ އިންޑިއާ ގާތުން އެހެން އެއްވެސް ކަމެއް ކޮށްދޭން ނޭދި ފުރަތަމަ ކަމަކަށް ވެސް އިންޑިއާ ސިފައިން މިގައުމުން ބާލަން ޖެހޭނެ ކަމަށް އިންޑިއާ ގާތު ބުނެގެންނޭ އެކަން އެމެން ނުކޮށްފިނަމަ ދެން ދާން ޖެހޭނީ ރައްޔިތުންގެ ފެންނަ ނުފެންނަ ވޯޓަކަށޭ އެނޫން ގޮތަށް މިކަން މުއިއްޒު އަށް ނުވާނެއޭ