ވ. ފެލިދޫ އިން ކުއްޔަށް ދޫކޮށްފައިވާ ބިންތަކުގެ ކުލި ނުދައްކާ ފަރާތްތަކުގެ އާއިލާތަކަށް ކައުންސިލުން ދެމުން އަންނަ ހިދުމަތްތައް ކަނޑާލުމަށް ފެލިދޫ ކައުންސިލުން ނިންމައިފިއެވެ.
ފެލިދޫ ކައުންސިލުން މިދިޔަ ބުދަ ދުވަހު ބޭއްވި އެ ކައުންސިލްގެ 29ވަނަ އާންމު ޖަލްސާގައި މި ގޮތަށް ނިންމާފައިވާއިރު ފެލިދޫ ކައުންސިލުން ވަނީ މިކަމާ ގުޅިގެން ބަޔާނެއް ނެރެފައެވެ. މި ނިންމުމާ ގުޅިގެން އެރަށު ކައުންސިލުން ނެރުނު ބަޔާނެއްގައި ވަނީ، ރައްޔިތުންނަށް ލިބެންޖެހޭ ފައިސާ ނުދައްކާ މީހުންގެ އަތުން ފައިސާ ހޯދުމަށް އެ ކައުންސިލުން ގިނަގުނަ މަސައްކަތްތަކެއް ކޮށްފައިވާކަމަށެވެ. އެހެންނަމަވެސް އެކަމަށް އެކަށީގެންވާ ހައްލެއް ލިބިފައިނުވާކަމަށް ކައުންސިލުން ވަނީ ފާހަގަކޮށްފައެވެ.
ފެލިދޫ ދޯނި އެހެލާ ސަރަހައްދުން ދޫކޮށްފައިވާ ބިންތައް ކުއްޔައް ނަގާފައިވާ ފަރާތްތަކުން އެ ބިންތަކުގެ ކުލި ނުދެއްކުމުގެ މައްސަލަ ބޮޑުވެފައިވާއިރު ފެލިދޫ ކައުންސިލުން ބުނީ ބައެއް މީހުން ކުލި ނުދައްކާތާ 3 އަހަރު ވެފައިވާކަަމަށެވެ. އެމީހުން ދައްކަން ޖެހޭ ކުލީގެ އަދަދު 40،000 ރުފިޔާއަށް އަރާފައިވާއިރު ކުލި ނުދައްކާ މީހުންނަށް ކޮންމެ 3 މަހަކުން ނޯޓިސް ފޮނުވާފައިވާނެކަމަށް ކައުންސިލުން ވަނީ ބުނެފައެވެ.
މީގެ އިތުރުން ފެލިދޫ ކައުންސިލުން ބުނީ އެހެންކަމުން ދަރަނި އަދާކޮށް ނިންމަންދެން އެފަދަ މީހުންގެ އަނބި/ފިރި އަދި ދަރިންނަށް ކައުންސިލުން ދޭންޖެހޭ އެއްވެސް ހިދުމަތެއް ނުދިނުމަށް ނިންމާފައިވާކަމަށެވެ. އަދި ފައިސާ ދައްކަންޖެހޭ މީހުން ފައިސާ ދެއްކުމަށް ފަސް ދުވަހުގެ މުހުލަތެއް ދިނުމަށް ފަހު، ފައިސާ ނުދައްކާ މީހުންގެ ލިސްޓު ކޮންމެ މަހަކު އާންމު ކުރާނެ ކަމަށެވެ.
