ރޯޑް ޑިވެލެޕްމެންޓް ކޯޕަރޭޝަން (އާރްޑީސީ)ގެ މެނޭޖިން ޑިރެކްޓާ މޫސާ އަލި މަނިކު (މޫކޭ) އަށް މަރުގެ އިންޒާރު ދިން މައްސަލައެއް ފުލުހުން ބަލަން ފަށައިފިއެވެ.
މިކަމާ ގުޅިގެން ފުލުހުން ބުނީ މޫކޭއަށް ހަމަލާދީ، މާރާމާރީ ހިންގާ މަރުގެ އިންޒާރު ދިން މައްސަލައެއް ރޭ ފުލުހުންނަށް ހުށަހަޅާފައިވާ ކަމަށެވެ. އަދި މި މައްސަލަ ފުލުހުން ތަހުގީގު ކުރަމުންދާ ކަމަށެވެ.
މޫކޭ ވަނީ އޭނާއަށް ހަމަލާދިން ކަމަށް ބުނެ އެކްސްގައި މީހެއްގެ ފޮޓޯވެސް ހިއްސާ ކުރައްވާފައެވެ. ރޭ ހިއްސާ ކުރެއްވި އެ ފޮޓޯއާއެކު އޭނާ ވިދާޅުވީ އިއްޔެ ހަވީރު ދަރިފުޅާއެކު ސައިކަލުގައި ދަނިކޮށް އަވަގުރާނަ ގޮވާ ގަޔަށް އަތްލާ އެމީހާ މާރާމާރީ ހިންގާފައިވާ ކަމަށެވެ.
ދަރިފުޅާއި މޫކޭ މަރާލާނެ ކަމަށް ބުނެ އެ މިހާ އިންޒާރު ދިން ކަމަށާއި އެ މައްސަލަ މިހާރު ފުލުހުންނަށް ހުށަހަޅާފައިވާ ކަމަށް ވެސް އޭނާ ވަނީ ވިދާޅުވެފައެވެ.
އާރްޑީސީގެ ކޮރަޕްޝަންގެ މައްސަލައެއް ވެސް ފުލުހުން ބަލަމުންދާއިރު މޫކޭ ވިދާޅުވެފައިވަނީ އާރްޑީސީއިން ވައްކަންކޮށް އަމިއްލަ އެކައުންޓަށް ފައިސާ ޖަމާކުރައްވާފައި ނުވާނެ ކަމަށެވެ. ފުލުހުން ބަލަމުން ދަނީ މޫކޭ އާއި އެ ކުންފުނީގެ ޗީފް ފައިނޭންޝަލް އޮފިސަރު ޔާސިރު ހަސަން ގުޅިގެން އެ ކުންފުނީގެ އެކައުންޓުން ނެގި ކަމަށް ތުހުމަތު ކުރެވޭ 13.8 މިލިއަން ރުފިޔާގެ މައްސަލައެކެވެ.
