އަންނަ އަހަރުގެ ސެޕްޓެމްބަރު މަހުގެ ނިޔަލަށް ވެލާނާ އިންޓަނޭޝަނަލް އެއާޕޯޓު (ވީއައިއޭ) ތަރައްގީ ކުރުމަށް ކުރިއަށްގެންދާ މަޝްރޫއުގެ މަސައްކަތްތައް ނިންމާލައްވާނެ ކަމަށް އިންތިހާބީ ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
މުއިއްޒު މިގޮތަށް ވިދާޅުވެފައި ވަނީ ވިޔަފާރިވެރިންނާ ބައްދަލު ކުރައްވާ މިރޭ ބޭއްވި ޖަލްސާގައި ވާހަކަ ދައްކަވަމުންނެވެ. ރާއްޖޭގެ އިގްތިސާދު ކޮޅަށް ޖެހުމަށް ވަރަށް ގިނަ މަސައްކަތްތަކެއް ކުރައްވަން ޖެހިވަޑައިގަންނަވާކަން ފާހަގަ ކުރައްވާ މުއިއްޒު ވިދާޅުވީ ވިޔަފާރި ވެރިންނަކީ ގައުމު ހަމަ މަގަށް އެޅުމަށް ވަރަށް މުހިންމު ފަރާތްތަކެއް ކަމަށެވެ.
އެގޮތުން ހުރިހާ ދާއިރާއެއްވެސް ކުރިއެރުމަށް މިވަގުތަށް އެންމެ މުހިންމު އެއް މަސައްކަތަކަށް ވެފައި ވަނީ އެއާޕޯޓު ނިންމުމުގެ މަސައްކަތް ކަމަށް ވިދާޅުވިއެވެ. އަދި އިންތިގާލީ މަރުހަލާގެ ތެރެއިން ބެލި ބެލުމަށް އެއާޕޯޓު ނިންމުމަށް ނިންމާފައިވާ ތާރިހަކީ 2025 ވަނަ އަހަރުގެ ޖުލައި މަސް ނަމަވެސް އެއީ ވަރަށް ގިނަ ދުވަސްތަކެއް ކަމަށް މުއިއްޒު ފާހަގަ ކުރެއްވިއެވެ.
އަދި އެއީ ގަބޫލު ކުރެވޭނެ ކަމެއް ނޫން ކަމަށާއި ރާއްޖޭގެ އިގްތިސާދު މިއޮތީ ވަރަށް ބޮޑު އަނދަވަޅެއްގައި ކަމުން އެއާޕޯޓް ވީ އެންމެ އަވަހަކަށް ނިންމެވުމަށް މަސައްކަތް ކުރައްވާނެ ކަމަށް މުއިއްޒު ވިދާޅުވިއެވެވެ. "އެންމެ ލަސްވެގެންވެސް ފެށޭ އަހަރުގެ ސެޕްޓެމްބަރަށް ނިންމާނަން. އެހެންވީމާ އެއީ މިހާރު ނިންމަން އޮތް ތާރީހަށް ވުރެ 8 މަހުގެ އަވަސް ތާރީހެއްގައި ނިންމުމަކީ އަޅުގަނޑުގެ އަމާޒެއް" މުއިއްޒު ވިދާޅުވިއެވެ.
އަދި މިހާރުވެސް މަސައްކަތްތަކެއް ފަށާފައިވާ ކަމަށާއި ހުރިހާ ފަރާތްތަކެއްގެ އެއްބާރުލުމާއެކު އެކަން ކާމިޔާބު ވާނެ ކަމަށް މުއިއްޒު ވިދާޅުވިއެވެ. އަދި ކުރިއަށް އޮތް ދެ ހަފްތާ ތެރޭގައި އެއާޕޯޓްގެ މަސައްކަތް އަމިއްލަފުޅަށް ބައްލަވާލެއްވުމަށް ވަޑައިގަތުމަށް ނިންމަވާފައިވާ ކަމަށާއި އަދި ރަސްމީކޮށް 17 ނޮވެމްބަރު ގައި އެކަމުގެ އަމަލީ މަސައްކަތް ފައްޓަވާނެ ކަމަށް ވިދާޅުވިއެވެ.
އަދި ހަމައެހެންމެ އެ މަސައްކަތް ވަރަށް ގާތުން ބައްލަވާނެ ކަން ފާހަގަ ކުރައްވާ މުއިއްޒު ވިދާޅުވީ ކަމާ ބެހޭ ހުރިހާ ސްޓޭކް ހޯލްޑަރުންގެ އިސްވެރިން ހިމެނޭ ގޮތަށް ހާއްސަ ވަކި ކޮމިޓީއެއް އުފައްދަވާ އެ ކޮމިޓީގެ ޗެއާ އަކަށް އެމަނިކުފާނު ހުންނަވާ މަސައްކަތްތައް ވީހާވެސް އަވަހަށް ނިންމުމަށް ކުރެވެން ހުރި ހުރިހާ މަސައްކަތްތަކެއް ކުރައްވާނެ ކަމަށެވެ.
ކުރީގެ ރައީސް އަބްދުﷲ ޔާމީން ފެއްޓެވި ވީއައިއޭގެ އާ ޕެސެންޖާ ޓާމިނަލަކީ އެއާޕޯޓުގެ އެކްސްޕޭންޝަން ޕްރޮޖެކްޓުގެ ދަށުން ކުރެވޭ މަސައްކަތެކެވެ. ޕެސެންޖާ ޓާމިނަލް ހިމެނޭގޮތަށް މިހާރު ކުރިޔަށްދާ ވެލާނާ އިންޓަނޭޝަނަލް އެއާޕޯޓުގެ އެކްސްޕެންޝަން ޕްރޮޖެކްޓް އެއްކޮށް ނިމުމުން، އެއާޕޯޓުގެ ކެޕޭސިޓީ ދެ ގުނައަށް ވުރެ އިތުރުވެ، އަހަރަކު 7.5 މިލިއަން ފަސިންޖަރުންނަށް ހިދުމަތް ދެވޭ ފެންވަރަށް ވަސީލަތްތައް ތަރައްގީ ވެގެން ދާނެއެވެ.
