ރޭ ގާޒާގެ މެދުތެރޭގައި ހުރި ހޮސްޕިޓަލަށް ބޮން އަޅާ 900 މީހުން ޝަހީދު ކޮށްލިތާ 24 ގަޑި އިރު ނުވެ އިޒްރޭލަށް ވަޑައިގެން ހިފެހެއްޓުމެއް ނެތި މަދަދާއި އެހީތެރިން ދެއްވާނެ ކަމަށް އެމެރިކާގެ ރައީސް ޖޯ ބައިޑަން ވިދާޅުވެއްޖެއެވެ.
އިޒްރޭލުގެ ވެރިކަން ކުރާ ރަށް ތެލްއަވީވަށް ވަޑައިގެން ޔަހޫދީ ބޮޑުވަޒީރު ބެންޖަމިން ނަތަންޔާހޫހާ ކަރާ ކަރު ޖައްސަވާ ސަލާމް ކުރެއްވުމަށް ފަހު ބަައިޑަން ވިދާޅުވީ، ހޮސްޕިޓަލް ގޮއްވާލި ކަމަށް ބެލެވެނީ ކޮންމެވެސް އެހެން ފަރާތަކުން ކަމަށާއި އެއީ 'ކަލޭ' [ނަތަންޔާހޫ] ކުރިކަމެއް ނޫން ކަމަށެވެ.
އަދި އިޒްރޭލުގެ ރައްޔިތުންނާއި އިޒްރޭލު ދިފާއު ކުރުމަށް އިޒްރޭލުން ބޭނުންހާ ތަކެއްޗަކާއި މަދަދާއި އެހީތެރިކަން ދެއްވާނެ ކަމަށް ވެސް ވިދާޅުވިއެވެ.
އޭނާ އިތުރަށް ވިދާޅުވީ، އިޒްރޭލަށް ވަޑައިގަތީ އެ ހަނގުރާމައިގައި އެމެރިކާ އޮތީ އިޒްރޭލާއެކުކަން ހާމަ ކުރެއްވުމަށް ކަމަށާއި އިޒްރޭލުގެ ރައްޔިތުންގެ ހިތްވަރާއި ކެރުމާއި ސާބިތުކަމަށް ސެލިއުޓް ކުރައްވާ ކަމަށާއި އިޒްރޭލުގައި ހުންނެވޭތީ ވަރަށް އުފާކުރައްވާ ކަމަށެވެ.
އިޒްރޭލު ބޮޑުވަޒީރު ބުނީ، ހަމާސް ނައްތާލުމަށް ދުނިޔެ އަތުގުޅާލަން ޖެހޭ ކަމަށާއި ހަމާސް ބަލިކޮށް އެމީހުންގެ [ޔަހޫދީންގެ] ދިރިއުޅުމުން ހަމާސް ފުހެލާނެ ކަމަށެވެ.
އަދި ހަނގުރާމައިގެ މި ވަގުތުގައި ބައިޑަން ވަޑައިގެންނެވުމުން ހާއްސަ ޝުކުރެއް އަދާ ކުރާ ކަމަށާއި އޭނާ އަކީ 'ތެދުވެރި ފްރެންޑް' އެއް ކަމަށް ވެސް ބުންޏެވެ.
މިމަހުގެ 7 ވީ ހޮނިހުރު ދުވަހު ފެށި ހަމަލާތަކަށް 2 ހަފްތާ ވާން ދާ އިރު އިޒްރޭލުން ވަނި ފަލަސްތީނުގެ 3،300 މީހުން ޝަހީދު ކޮށްލާފައެވެ. ޝަހީދުވި ކުޑަކުދިންގެ އަދަދު 1000 އިން މައްޗަށް އަރާފައި ވާ އިރު ރޭ ގާޒާގެ މެދުތެރޭގައި ހުރި ހޮސްޕިޓަލަށް ބޮން އަޅާ 900 މީހުން ވަނީ ޝަހީދު ކޮށްލާފައެވެ.
މި ހަމަލާ އާ ގުޅިގެން ދުނިޔޭގެ އެކި ގައުމުތަކާއި ނުފޫޒު ގަދަ އެކިއެކި ފަރާތްތަކުން އިޒްރޭލަށް ފާޑު ކިޔަމުން ދަނިކޮށް އެއި ހަމާސް ފޮނުވާލި ރޮކެޓެއް މިސްރާބުން ކަސިޔާރުވެ އެރި ހަމަލާއެއް ކަމަށް ބުނެ އިޒްރޭލުން ވަނީ ދޮގު ހަބަރު ފަތުރާފައެވެ. އަދި އެ ރޮކެޓް ދާ މަންޒަރުތައް ކަމަށް ބުނެ ހަދާފައި ވާ މަންޒަރުތައް ވެސް ޔަހޫދީ އޮފިޝަލުން އާންމު ކުރިއެވެ. ނަމަވެސް ހަމާސް އިން ފޮނުވާލައި ރޮކެޓް ވެއްޓި ގޮވާ ގޮވުމާއި މާސިންގާ ބޮމެއް ވައްޓާލީމައި ގޮވާ ގޮވުމުގެ ތަފާތު ބުނެދީ ގިނަ ބަޔަކު ވީޑިއޯތައް ހިއްސާ ކުރަން ފެށުމުން އިޒްރޭލުން ވަނީ އެމީހުން އާންމު ކުރި ފޭކް ހަބަރު އެކްސް އިން ނަގާފައެވެ.
މި ނުރައްކާތެރި ހަމަލާގެ ޒިންމާ އެމެރިކާއިން ވެސް ހަމާސް ގެ ބޮލަށް ކަނޑާލުމުގެ ރޫހެއްގައި ވާހަކަ ދައްކާފައި ވާ އިރު، ރާއްޖެއާ އަވަށްޓެރި އިންޑިއަގެ ޗެނަލްތަކުންވެސް ބުނެފައި ވަނީ އެއީ ހަމާސް އިން ކުރި ކަމެއް ކަމަށެވެ.
ޝޯޝަލްމީޑިއާގެ އެކި ޕްލެޓްފޯމްތަކާއި އަދި ރަސްމީ ޗެނަލްތަކުން ދޮގު ހަބަރުތައް ފަތުރަމުން ދާ މިދަނޑިވަޅުގައި ހަމާސް އާ ގުޅުވައި އެންމެ ގިނައިން ދޮގު ހަބަރު ފަރުތަނީ އިންޑިއާއިން ކަމަށް އަލްޖަޒީރާގައި ރިޕޯޓް ކޮށްފައި ވެސް ވެއެވެ. އިންޑިއާ އަށް ނިސްބަތްވާ އެކިއެކި އެކައުންޓް ތަކުން ފޭކް ހަބަރު ފަތުރާ ރުޅިވެރިކަން އުފައްދަމުން ގެންދާކަމަށް ވެސް ބުނެފައި ވެއެވެ.
އިޒްރޭލުން ގާޒާގެ އިތުރުން ހުޅަނގު އައްސޭރި އާއި ރާމައްލޯ އަށް ވެސް ހަމަލާ ދެމުން ގެންދެއެވެ. ގާޒާއާ އެއްވަރަށް ހަމަލާ ނުދިންނަމަވެސް ދޭ ހަމަލާތަކުގައި އިމާރާތްތައް ފުނޑުފުނޑު ވަމުން ދާ އިރު އެއްގަމު މަގުން އަރާ ހިންގާ އޮޕަރޭޝަންތަކުގައި ހުޅަނގު އައްސޭރިން އެކަނިވެސް މިހާތަނަށް 750 މީހަކު ހައްޔަރު ކޮށްފިއެވެ.
އިޒްރޭލުގެ މި އުދުވާނުގައި އެމެރިކާގައި އުފައްދާފައި ވާ ހަތިޔާރު ބޭނުން ކުރަމުން ގެންދާ އިރު، މިއަދު ބައިޑަން ވަނި ނަތަންޔާހޫ ބޭނުންވާ ގޮތަކަށް ހަމަލާތައް ކުރިއަށް ގެންދިޔުމަށް ވެސް ހިތްވަރު ދެއްވާފައެވެ.
