ހާއްސަ ގާނޫނުތަކުން އުފައްދާފައިވާ ބައެއް މުއައްސަސާތަކުގެ މަސައްކަތްތަކުގެ ތެރެއަށް ސިޔާސީ ނުފޫޒު ވަނުމުގެ ސަބަބުން އެ މުއައްސަސާތަކުގެ ޒިންމާ އަދާކުރުމުގައި ދަތިތައް ހުރިކަމަށް ބުނެ ސަރުކާރުގެ ބައެއް މުއައްސަސާތަކުން ކަންބޮޑުވުން ފާޅުކޮށްފައިވާ ކަމަށް، އިންތިގާލީ ރައީސްގެ އޮފީހުން ބުނެފިއެވެ.
އިންތިގާލީ ތަރުޖަމާނު މުހައްމަދު ފިރުޒުލް އަބްދުﷲ ޚަލީލް ވިދާޅުވީ، ސަރުކާރުގެ ގިނަ މުއައްސަސާތަކާއި އިދާރާތަކަށް އިންތިގާލީ ކޮމިޓީތަކުން ޒިޔާރަތްކޮށް ފުރަތަމަ ބައްދަލުވުން ބޭއްވިފައިވާ ކަމަށާއި، އަދި ބައެއް އިދާރާތަކާ އެކު އިތުރު ބައްދަލުވުންތައް ވެސް ބާއްވަމުންދާ ކަމަށެވެ. އޭނާ ވިދާޅުވީ، މެންޑޭޓު ބޮޑު އިދާރާތަކާއި ކުންފުނިތަކާ އެކު ބައްދަލުވުންތައް ބާއްވަމުންދާ ކަމަށާއި، ބައެއް އިދާރާތަކުގެ މަސައްކަތުގެ ޒާތުން ވެސް އިތުރު ބައްދަލުވުންތައް ބާއްވަމުންދާ ކަމަށެވެ.
ފިރުޒުލް ވިދާޅުވީ، ސަރުކާރުގެ އެކި މުއައްސަސާތަކާއި މުސްތަގިއްލު އިދާރާތަކާ އެކު ބޭއްވުނު ބައްދަލުވުންތަކުގެ ތެރެއިން ކަންބޮޑުވާން ޖެހޭ ބައެއް ކަންކަން ފާހަގަކުރެވުނު ކަމަށެވެ. އެގޮތުން ހާއްސަ ގާނޫނެއްގެ ދަށުން އުފެދިފައި ހުންނަ މުސްތަގިއްލު ބައެއް އިދާރާތަކާއި މުއައްސަސާތަކުގެ މަސައްކަތުގެ ތެރެއަށް ސިޔާސީ ނުފޫޒު ވަނުމުގެ ސަބަބުން ގާނޫނުން މަތިކޮށްފައިވާ މަސައްކަތްތައް ކުރުމަށް ދަތިތައް ހުރިކަން އެ މުއައްސަސާތަކުން ފާހަގަކޮށްފައިވާ ކަމަށް ވިދާޅުވިއެވެ.
"އަދި ހަމަ އެހެންމެ އެއާ އެކުއެކީގަ އެ މުއައްސަސާތަކަށް އިދާރާތަކަށް ލިބެން ޖެހޭ ވަސީލަތްތަކާއި ބަޖެޓާއި އިންސާނީ ވަސީލަތް ލިބުމުގެ ދަތިތަކުގެ ސަބަބުން އެ ބޭފުޅުން ކުރަން ބޭނުންވާ އިލްމީ ފަންނީ މަސައްކަތްތަކަށް ވަރަށް ބޮޑަށް ހުރަސް އެޅި ގާނޫނު އެ ތަސައްވަރު ކުރާ ހަގީގީ ޒިންމާ އޭގެ އެންމެ ފުރިހަމަ ގޮތުގައި އަދާކުރުމަށް ދަތިތަކެއް ވަރަށް ބޮޑަށް ކުރިމަތިވެފައި ހުރިކަން އެ މުއައްސަސާތަކުން ފާހަގަކުރައްވާކަން އަޅުގަނޑު ފާހަގަކޮށްލަން ބޭނުން،"
ހަމަ އެއާއެކު، ސަރުކާރު ހިއްސާވާ ބައެއް ކުންފުނިތަކުން ހިންގާ މަޝްރޫއުތައް ނިމުމުން އެ މަޝްރޫއުތަކުގެ އަގު ނުލިބުމުގެ ސަބަބުން އެ ކުންފުނިތަކުގެ ކޭޝް ފްލޯ ދަތިވެފައިވާ ކަން ކުންފުނިތަކުން ފާހަގަކުރި ކަމަށް ވިދާޅުވެ، ކުރިއަށް އޮތް ދެ މަހުގެ ތެރޭގައި ސަރުކާރު ކުންފުނިތަކުން ދުވަހުން ދުވަހަށް ކުރަން ޖެހޭ ކަންކަން ކުރުމަށްޓަކައި ބޮޑެތި އަދަދުތަކުން ކޭޝް ފްލޯ އިންޖެކްޓް ކުރަން ޖެހޭނެ ކަމަށް ފިރުޒުލް ލަފާކުރެއްވިއެވެ.
އޭނާ ވިދާޅުވީ، އިންތިގާލީ މި މުއްދަތުގެ ތެރޭގައި ސަރުކާރުގެ އިދާރާތަކުގެ އިސްވެރިން އިންތިގާލީ ޓީމުތަކާ ބައްދަލުކޮށް، އެއްބާރުލުން ދެމުންދާ ކަމަށެވެ.
މިހާރު ވަންނާނީ ސިޔާސީ ނުފޫޒް ، ދުވަސްކޮޅެއް ނުވެ ދެން ވަންނަނީ ގޭންގު ނުފޫޒު