އިތުރު ބަޔަކާ ގުޅިގެން މާލެ ގެއެއްގެ ތެރޭގައި ފިރިހެނަކު ހިފަހައްޓާ އޭނާއަށް އަނިޔާކޮށް، އޭނާގެ އެކައުންޓުން ފައިސާތަކެއް ފޭރުނު މައްސަލައެއްގައި އަލީ ޝާހިދު (ސްޓެޕް އައްޔަ) ހައްޔަރު ކޮށްފިއެވެ.
ފުލުހުންގެ މީޑިއާ އޮފިޝަލް ވިދާޅުވީ ފިރިހެނަކު ހިފަހައްޓާ އޭނާއަށް އަނިޔާކޮށް، އޭނާގެ އެކައުންޓުން ފައިސާތަކެއް ފޭރުނު މައްސަލަ މި މަހުގެ 4 ވަނަ ދުވަހު އެ އިދާރާއަށް ހުށަހަޅާފައިވާ ކަމަށެވެ. އަދި އެ މައްސަލައާއި ގުޅިގެން ކޯޓު އަމުރެއްގެ ދަށުން އުމުރުން 43 އަހަރުގެ މީހަކު ހައްޔަރު ކޮށްފައިވާ ކަމަށް ފުލުހުން ވަނީ ބުނެފައެވެ.
މި މައްސަލަ ފުލުހުން ދަނީ އިތުރަށް ތަހުގީގުކުރަމުންނެވެ.
ފުލުހުން ވަނީ މި މަހުގެ 16 ވަނަ ދުވަހު އައްޔަ ހޯދުމަށް އިއުލާންކޮށްފައެވެ. އޭރު ފުލުހުން ބުނީ އޭނާ ހޯދަމުން ދަނީ ފުލުހުންގެ އިކޮނޮމިކް ކްރައިމް ޑިޕާޓްމަންޓުން ބަލަމުން އަންނަ ފޯޖަރީގެ މައްސަލައެއްގައި ތަހުގީގަށް ހާޒިރު ކުރުމަށް އުޅޭ ތަނެއް ނޭގުމުގެ ސަބަބުން ޗިޓު ހަވާލު ނުކުރެވިގެން ކަމަށެވެ.
