ރިޔާސީ އިންތިހާބުގެ ދެވަނަ ބުރެއް ބާއްވަން ޖެހިއްޖެނަމަ، ވޯޓު ލުމުގެ ހައްގު ލިބިފައިވާ މީހުން ރީ-ރަޖިސްޓްރީ ކުރުމަށް އިތުރު ފުރުސަތެއް ދޭގޮތަށް ހަމަޖެހިފައިވާ ކަމަށް އިލެކްޝަން ކޮމިޝަން (އީސީ) އިން ބުނެފިއެވެ.
މިފަހަރުގެ ރިޔާސީ އިންތިހާބުގެ ފުރަތަމަ ބުރު، އަންނަ ސެޕްޓެމްބަރު ނުވަ ވަނަ ދުވަހު ބާއްވަން ހަމަޖެހިފައިވާ އިރު، އިންތިހާބުގެ ދެވަނަ ބުރެއް ބާއްވަން ޖެހިއްޖެނަމަ ދެވަނަ ބުރު ބާއްވަން ހަމަޖެހިފައިވަނީ ސެޕްޓެމްބަރު 30 ވަނަ ދުވަހުއެވެ.
އީސީ އިން ބުނީ ފުރަތަމަ ބުރުގައި ރީ ރެޖިސްޓްރޭޝަން ކުރިއިރު ދެބައެއް އޮންނާނެ ކަމަށާ އެއީ އިންތިހާބު އޮންނަ ދުވަސް ކަމަށްވާ، ސެޕްޓެމްބަރު 9 ވަނަ ދުވަހު ހުންނާނެ ތަނަކާ، ދެވަނަ ބުރެއް ބާއްވަން ޖެހިއްޖެ ނަމަ އެމަހުގެ 30 ވަނަ ދުވަހު ހުންނާނެތަނެއް ހިމެނޭގޮތަށް ކަމަށެވެ. އިންތިހާބުގެ ދެވަނަ ބުރެއް ބާއްވަން ޖެހިއްޖެ ނަމަ ރީރެޖިސްޓްރޭޝަނަށް އިތުރު ފުރުސަތެއް ދޭން ނިންމާފައިވާއިރު އެއީ ވަރަށް ކުޑަ ފުރުސަތެއްކަމަށް އީސީ އިން ވަނީ ބުނެފައެވެ.
ރައީސުލްޖުމްހޫރިއްޔާގެ މަގާމަށް މީހަކު އިންތިހާބު ކުރެވޭނީ، ވޯޓުލާ މީހުންގެ 50 ޕަސެންޓަށްވުރެ ގިނަ ވޯޓު ލިބިގެންނެވެ. އެއްވެސް ކެނޑިޑޭޓަކަށް 50 ޕަސެންޓަށް ވުރެ ގިނަ ވޯޓު ނުލިބިއްޖެނަމަ، ރިޔާސީ އިންތިހާބުގެ ދެވަނަ ބުރެއް ބާއްވަން ޖެހޭނެއެވެ.
