ކުރިއަށް އޮތް ރިޔާސީ އިންތިހާބުގައި ރައްޔިތުންގެ ތާއީދު އޮތް މިންވަރެއް އަންދާޒާ ކޮށްލުމަށް "ދަ ޕްރެސް" އިން ހިންގި ޕޯލްއިން ޕީއެންސީގެ ކެންޑިޑޭޓް، މާލޭ ސިޓީގެ މޭޔަރު ޑރ. މުހައްމަދު މުއިއްޒު ކުރި ހޯއްދަވައިފިއެވެ.
މިމަހު 9 ވަނަ ދުވަހު ސޯޝަލް މީޑިއާގައި ފެށި މި ޕޯލް މިހާރު ބަންދުކޮށްފައި ވާއިރު ޖުމްލަ 3288 މީހަކު ވަނީ ވޯޓު ދީފައެވެ. މި ޕޯލްގެ ފައިނަލް ނަތީޖާ ދައްކާ ގޮތުން ޑރ މުއިއްޒު ކުރިހޯއްދަވާފައި ވަނީ 51.2 ޕަސެންޓު ވޯޓާއެކުއެވެ. ދެ ވަނައަށް އެންމެ ގިނަ ވޯޓު ލިބިވަޑައިގެންފައި ވަނީ އެމްޑީޕީގެ ރިޔާސީ ކެންޑިޑޭޓު ރައީސް އިބްރާހިމް މުހައްމަދު ސޯލިހްއަށެވެ. އެއީ ވޯޓުލީ މީހުންގެ 30.3 ޕަސެންޓެވެ.
ދަ ޑިމޮކްރެޓްސްގެ ރިޔާސީ ކެންޑިޑޭޓު އިލްޔާސް ލަބީބަށް 9.2 ޕަސެންޓު ވޯޓު ލިބިފައި ވާއިރު ޖުމްހޫރީ ޕާޓީގެ ރިޔާސީ ކެންޑިޑޭޓު ގާސިމް އިބްރާހިމް އަށް ލިބިވަޑައިގެންފައި ވަނީ 3.8 ޕަސެންޓު ވޯޓެވެ.
އަމިއްލަ ގޮތުން ވާދަކުރައްވާ ކެނޑިޑޭޓު އުމަރު ނަސީރު، 3 ޕަސެންޓު ވޯޓާއެކު ފަސްވަނާގައި އޮތް އިރު 6 ވަނައިގައި އޮތީ އެމްއެންޕީގެ ރިޔާސީ ކެންޑިޑޭޓު މުހައްމަދު ނާޒިމްއެވެ. ނާޒިމަށް 2.7 ޕަސެންޓު ވޯޓު ލިބިފައި ވާއިރު އަމިއްލަ ގޮތުން ވާދަ ކުރައްވާ ކެންޑިޑޭޓް ހަސަން ޒަމީލްއަށް 2.2 ޕަސަންޓު ވޯޓު އަދި އަމިއްލަ ގޮތުން ވާދަ ކުރައްވާ ކެންޑިޑޭޓު ފާރިސް މައުމޫނުއަށް ލިބިވަޑައިގެންފައި ވަނީ ވޯޓުލީ މީހުންގެ 2.1 ޕަސެންޓެވެ.
ކުރިއަށް އޮތް ރިޔާސީ އިންތިހާބުގައި ވޯޓުލުމުގެ ހައްގު 282،672 މީހުންނަށް ލިބިގެންވާ ކަމަށް، އިލެކްޝަންސްގެ ތަފާސްހިސާބުތަކުން ދައްކައެވެ. އަދި ރާއްޖެއާއި ރާއްޖޭން ބޭރުގައި 600 އަށްވުރެ ގިނަ ވޯޓުފޮށި ބެހެއްޓުމަށް އިލެކްޝަންސް ކޮމިޝަނުން ނިންމާފައި ވާއިރު އޭގެ ތެރޭގައި މާލޭ ސަރަޙައްދުގައި ބެހެއްޓުމަށް ނިންމާފައިވާ 187 ފޮށްޓަކާއި، އަތޮޅުތަކުގައި ވޯޓުލުމަށް ބަހައްޓާ 397 ފޮށްޓެއް ހިމެނެއެވެ.
