ޕީއެންސީގެ ވެރިކަމެއްގައި ރައީސް އިބްރާހީމް މުހައްމަދު ސޯލިހުގެ ޕާސްޕޯޓް ހިފަހައްޓާނެ ކަމަށާއި އެމަނިކުފާނުގެ ބާއްވަވާނީ ޖަލުގައި ކަމަށް ޕީއެންސީގެ ރައީސް އަބްދުއްރަހީމް އަބްދުالله (އަދުރޭ) ވިދާޅުވެއްޖެއެވެ.
އިދިކޮޅު ރިޔާސީ ކެންޑިޑޭޓް ޑރ. މުހައްމަދު މުއިއްޒުގެ ކެމްޕެއިނަށް މިއަދު ހއ. ހޯރަފުއްޓަށް ވަޑައިގެން އެރަށުގެ ޕީޕީއެމް ޖަގަހައިގައި ބޭއްވި ބައްދަލުވުމެއްގައި އަބްދުއްރަހީމް ވިދާޅުވީ، ރައީސް ސޯލިހް އަނިޔާވެރި ވެވަޑައިގަތީ ދިވެހި ފަސްގަނޑަށް ކަމަށާއި ރާއްޖޭގެ މިނިވަންކަމާއި ސިޔާދަތަކަށް ހިޔާނާތްތެރި ވެވަޑައިގެންފައިވާ ކަމަށެވެ.
މި ރާއްޖޭގައި ވެރިކަން ކުރައްވާ އެންމެ އަނިޔާވެރިއަކީ ރައީސް ސޯލިހު ކަމަށާއި އެމަނިކުފާނު ވެރިކަމުން ބާލަން ގިނަ މަސައްކަތްތަކެއް އެންމެން އެކުގައި ކުރަން ޖެހޭ ކަަމަށް އަދުރޭ ވިދާޅުވިއެވެ.
އިދިކޮޅު ކޯލިޝަނުން ވެރިކަމަށް އަންނަގޮތަށް ރައީސް އިބްރާހިމް މުހައްމަދު ސޯލިހުގެ ޕާސްޕޯޓު ހިފަހައްޓައި، އިދިކޮޅުގެ ދައުރު ނިމެންދެން ރައީސް ސޯލިހު ޖަލަށްލާނެ ކަމަށް ވެސް އަދުރޭ ވިދާޅުވިއެވެ. ރައީސް ސޯލިހްގެ އަނިޔާވެރިކަން، ވޯޓް ލުމާ ހަމައަށް އެންމެންގެ ހިތުގައި ވެސް ބާއްވަން އަދުރޭ އެދިވަޑައިގެންނެވިއެވެ.
އަދުރޭ ވަނީ ރައީސް އަބްދުﷲ ޔާމިން ޖަލުން ނެރެވޭނީ ޑރ. މުއިއްޒު ވެރިކަމަށް ގެނެސްގެން ކަމަށް ވެސް ވިދާޅުވެފައެވެ.
