ރާއްޖޭގެ 7 ސަރަހައްދެއްގައި ޑޮމޮސްޓިކް އެއާޕޯޓް ތަރައްގީކުރަން ނިންމާ އެއާޕޯޓް ތަރައްގީކުރުމަށް ނުވަތަ ތަރައްގީ ފައިނޭންސް ކުރުމަށް ޝައުގުވެރިވާ ފަރާތްތަކަށް އެ ފުރުސަތު ހުޅުވާލައިފިއެވެ.
ހައުސިން މިނިސްޓްރީން ކުރި އިއުލާނުގައި ވަނީ ކްރޮސް ސަބްސިޑީގެ ގޮތުގައި ފަތުރުވެރިކަމުގެ ބޭނުމަށް ރަށް، ބިން ނުވަތަ ފަޅު ކުއްޔަށް ދިނުމާބެހޭ ގަވައިދުގެ ދަށުން 7 ސަރަހައްދުގައި ޑޮމެސްޓިކް އެއާޕޯޓް ތަރައްގީކުރުމަށް ނުވަތަ ތަރައްގީ ފައިނޭންސް ކުރުމަށް ޝައުގުވެރިވާ ފަރާތްތަކަށް ޕްރޮޕޯސަލް ހުށަހެޅުމުގެ ފުރުސަތު ހުޅުވާލާކަމަށެވެ.
މި މޮޑެލްގެ ދަށުން އެއާޕޯޓް ތަރައްގީކުރުމަށް ނިންމާފައިވާ ރަށްތަކަކީ:
- ހދ. މަކުނުދޫ (މަޝްރޫއަށް ހޭދަވާނެކަމަށް ލަފާކުރެވެނީ އެމެރިކާ ޑޮލަރު 29,900,000)
- ށ. ބިލެތްފަހި (މަޝްރޫއަށް ހޭދަވާނެކަމަށް ލަފާކުރެވެނީ އެމެރިކާ ޑޮލަރު 30,600,000)
- ބ. ތުޅާދޫ (މަޝްރޫއަށް ހޭދަވާނެކަމަށް ލަފާކުރެވެނީ އެމެރިކާ ޑޮލަރު 36,000,000)
- ތ.ވިލުފުށި (މަޝްރޫއަށް ހޭދަވާނެކަމަށް ލަފާކުރެވެނީ އެމެރިކާ ޑޮލަރު 38,200,000)
- ފ. މަގޫދޫ (މަޝްރޫއަށް ހޭދަވާނެކަމަށް ލަފާކުރެވެނީ އެމެރިކާ ޑޮލަރު 40,000,000)
- ރ. އަތޮޅު ދެކުނުބިތް (މަޝްރޫއަށް ހޭދަވާނެކަމަށް ލަފާކުރެވެނީ އެމެރިކާ ޑޮލަރު 35,000,000)
- ވ. ފޮއްތެޔޮފަޅު (މަޝްރޫއަށް ހޭދަވާނެކަމަށް ލަފާކުރެވެނީ އެމެރިކާ ޑޮލަރު 38,000,000)
އިތުރަށް އެ މިނިސްޓްރީން ބުނީ ހދ. މަކުނުދޫ، ށ. ބިލެތްފަހި، ބ. ތުޅާދޫ، ތ. ވިލުފުށި، ފ. މަގޫދޫ އަދި ރ. އަތޮޅު ދެކުނު ބިތުގެ އެއާޕޯޓް ފައިނޭންސް ކުރުމަށް އެންމެ ދަށްވެގެން ހުށަހެޅޭނެ އަދަދަކީ 3 މިލިއަން އެމެރިކާ ޑޮލަރު ކަމަށެވެ. އަދި ވ. ފޮއްތެޔޮފަޅު އެއަރޕޯޓް ފައިނޭސް ކުރުމަށް އެންމެ ދަށްވެގެން ހުށަހެޅޭނެ އަދަދަކީ 5 މިލިއަން އެމެރިކާ ޑޮލަރުކަށް ހައުސިން މިނިސްޓްރީން ވަނީ ބުނެފައެވެ.
މިކަމަށް އެދި ކުރިމަތިލުމަށް ވަކިމުއްދަތެއް ކަނޑައަޅާފައި ނުވާއިރު ހައުސިން މިނިސްޓްރީން ބުނީ މި އިއުލާނުގެ ދަށުން ހުށަހެޅުންތައް ހުށައެޅުމުގެ ފުރުސަތު، އާންމުކޮށް އަންގާ އެންގުމަކުން ބަންދު ނުކުރާ ހާ ހިނދެއްގައި ދެމިއޮންނާނެ ކަމަށެވެ.
ބ. ތުޅާދޫ، ށ. ބިލެތްފަހި، ތ. ވިލުފުށި، ހދ. މަކުނުދޫ، ފ. މަގޫދޫގެ އިތުރުން ރ. އަތޮޅުގެ ދެކުނު ބިތުގައި އެއާޕޯޓް އެޅުމަށް އެންމެ ފުރަތަމަ ހުޅުވާލީ ޑިސެމްބަރު 21، 2021 ވަނަ އަހަރުއެވެ. އެހެންނަމަވެސް އެ މަޝްރޫއުގެ އަގު ފަސް މިލިއަން ޑޮލަރުން ތިން މިލިއަން ޑޮލަރަށް ކުޑަކުރުމަށް ފަހު އަލުން އެ މަޝްރޫއަށް ކުރިމަތިލުމަށް ހުޅުވާލީ ފެބްރުއަރީ 15، 2022 ގައެވެ. އެހެންނަމަވެސް މި މަޝްރޫއުގެ އަމަލީ މަސައްކަތް ނުފެށި ލަސްތަކެއް ވެފައި ވާއިރު ހައުސިން މިނިސްޓްރީން ވަނީ އިއްޔެ މިކަމަށް އެދި ހުށަހެޅުމަށް ވަކި މުއްދަތެއް ނެތްގޮތަށް ހުޅުވާލާފައެވެ.
