މަސްތުވާތަކެތީގެ ފަރުވާއާ ގުޅޭ އެންމެހާ މަސައްކަތްތައް ރާއްޖޭގެ ޕްރައިމަރީ ހެލްތްކެއާ ނިޒާމުގެ ތެރެއަށް ވައްދާނެ ކަމަށް ޑިމޮކްރަޓްސް އިން ބުނެފިއެވެ.

ޑިމޮކްރެޓްސް އިން ބުނީ، ދިވެހިރާއްޖޭގެ މަސައްކަތު އާބާދީގެ ބޮޑުބައެއް މަސްތުވާތަކެތީގެ ވަބާގައި ތާށިވެ، އަލުން އެނބުރި އާންމު ދިރިއުޅުމުގެ ތެރެއަށް އާދެވޭނެ މަގެއް ނުފެނި މާޔޫސްކަމުގެ ތެރޭގައި ކަމަށެވެ. މިއީ ރާއްޖޭގެ އުފެއްދުންތެރިކަން ކުރިއަރާ ދިއުމަށް ވެސް އޮތް އެންމެ ބޮޑު އެއް ހުރަސް ކަމަށާއި ޑިމޮކްރަޓުންގެ އަމާޒަކީ އިސްލާމީ ރިވެތި އުސޫލުތައް ސްކޫލްތަކާއި އާއިލީ ދިރުއުޅުމުގެ ތެރޭގައި އާލާކޮށް، ސިއްހީ ނިޒާމުގެ ތެރެއިން މަސްތުގެ ވަބާއަކީ ފަރުވާ ދޭންޖެހޭ ބައްޔެއްކަމަށް ދެނެތިބެ، އެމަގަށް ފަރުވާގެ ނިޒާމާއި، އޮނިގަނޑު ތަރުތީބު ކުރުން ކަމަށް އެޕާޓީން ބުނެއެވެ.

މިގޮތުން ޑިމޮކްރަޓުން ހުށަހަޅާ ސިޔާސަތުތަކުގެ ތެރޭގައި ފަރުވާ ބޭނުންވާ ބައްޔެއްކަން ދެނެގަނެ އެމަގަށް ގާނޫނުތަކާއި ސިޔާސަތުތަކާއި މަސައްކަތްތައް އަލުން އެކީ ތަރުތީބުކުރުމާއި މަސްތުވާތަކެތީގެ ފަރުވާއާއި ގުޅޭ އެންމެހާ މަސައްކަތްތައް ރާއްޖޭގެ ޕްރައިމަރީ ހެލްތްކެއާ ނިޒާމުގެ ތެރެއަށް ވެއްދުން ހިމެނެއެވެ.

މީގެ އިތުރުން ކައުންސިލްތަކާއި، އަމިއްލަ ޖަމިއްޔާތަކާއި، ދާއިރާތަކުގެ ފަންނީ މާހިރުންނާއި އަދި އެހެންވެސް މަސްލަހަތުވެރިންގެ ބައިވެރިވުން ކަށަވަރުވާނެހެން ނެޝަނަލް ޑްރަގް އެޖެންސީ (އެންޑީއޭ) އެކުލެވޭގޮތް ގާނޫނުގައި ކަނޑައެޅުމާއި ފަނޑިޔާރުންނާއި، ތަހުގީގުކުރާ އޮފިސަރުންނާއި އެ އިދާރާތަކުގެ މުވައްޒަފުންނަކީ ސަބްސްޓެންސް އެބިއުސްގެ އަސަރުތައް ދެނެގަންނަން ބޭނުންވާ ތަމްރީނާއި ތަޖުރިބާހުރި ބައެއްކަމުގައި ގާނޫނުން ކަށަވަރުކުރުން ވެސް ޑިމޮކްރަޓުން ހުށަހަޅާ ސިޔާސަތުތަކުގެ ތެރޭގައި ހިމެނެއެވެ.

އިތުރު ސިޔާސަތުތަކުގެ ތެރޭގައި ސަބްސްޓެންސް އެބިއުސްގެ މައްސަލަތަކުގައި ކުރާ ހުކުމްތައް ފަންނީ ލަފައަށް ބިނާކުރަން ލާޒިމުވާނެގޮތަށް ގާނޫނު އިސްލާހުކުރުން އަދި ފަރުވާގެ މަރުހަލާ ވެސް ފަންނީ ލަފާއާއި އެއްގޮތަށް ކުރިއަށް ގެންދާކަން އެންޑީސީސީ އާއީ އެންޑީއޭއިން ކަށަވަރުކުރަން ގާނޫނުން ލާޒިމުކުރުން ހިމެނެއެވެ.

ހަމައެހެންމެ ރިމާންޑް ސެންޓަރުތަކާއި، ޖަލުތަކާއި އަދި ފަރުވާގެ މަރުކަޒުތަކުގައި އަންހެންނާއި ކުޑަކުދިންނަށް ބޭނުންވާނެ ހިދުމަތްތަކާއި ވަސީލަތްތައް، ތަމްރީނު ދެވިފައިވާ މުވައްޒަފުންނާއެކު ރާއްޖޭގެ ހުރިހާ ސަރަހައްދެއްގައި ގާއިމުކުރުމާއި މަސްތުވާތަކެތިން ސަލާމަތްވެ އާއިލާއާއި މުޖުތަމައުގެ ތެރެއަށް ރީއިންޓަގްރޭޓްވުމަށް ބޭނުންވާ ހުރިހާ ހަރުފަތެއްގެ ފަރުވާދޭނެ ހެލްތު-ކެފޭތައް އެކަށީގެންވާ އިންސާނީ ވަސީލަތްތަކާއެކު ގާއިމުކުރުން ވެސް މި ސިޔާސަތުގެ ތެރޭގައި ވަނީ ހިމަނާފައެވެ.

އިތުރު ސިޔާސަތުތަކުގެ ތެރޭގައި ޑްރަގުގެ ފަރުވާއާ ގުޅޭ ގާނޫނީ ނިޒާމު ތަރުތީބުކޮށް ލައިސަންސް ދޫކުރުމާއި ފަރުވާ ލިބެންޖެހޭ ކޮންމެ މީހަކަށް ފަސޭހަކަމާއެކު ވަގުތުން ފަރުވާގެ މަރުހަލާ ފެށޭގޮތަށް ގާއިމްކުރުމުގެ އިތުރުން ފަރުވާގެ ހަރުފަތްތައް ނިންމާ ރީއިންޓަގްރޭޝަން މަރުހަލާއަށް އަންނަ ފަރާތްތަކަށް ވަޒީފާއާއި މަސައްކަތްތަކުގެ ފުރުސަތު ހޯދައިދޭނެ ޕްރޮގްރާމެއް ތައާރަފުކުރުން ހިމެނެއެވެ.

މީގެ އިތުރުން ރާއްޖެއަށް މަސްތުވާތަކެތި އެތެރެވާ ދޮރުތައް ބަންދުކުރުމާއި އަތުލައިގަނެވޭ މަސްތުވާތަކެތި ހާމަކަން ބޮޑުގޮތެއްގައި ނައްތާލެވޭނެ ނިޒާމެއް ގާއިމުކޮށް، އެކަން ކުރަންޖެހޭ ވަގުތު ކަނޑައަޅާ ފާރަވެރިވެވޭނެ އިންތިޒާމެއްގެ ތެރެއިން ގުޅިފައިވާ މުއައްސަސާތައް ހިމެނޭހެން ތަންފީޒީ ބޯޑެއް އެކުލަވާލުން ވެސް ޑިމޮކްރެޓްސް އިން އެސިޔާސަތުގެ ތެރޭގައި ވަނީ ހިމަނާފައެވެ.

އަދި އިސްލާމްދީނުގައި މިކަން ހުއްޓުވުމަށް ދީފައިވާ އަހަންމިއްޔަތުކަމާއި، ސްކޫލް ކުދިން ދުންފަތުގެ ބާއްވަތްތައް ބޭނުންކުރުން ހުއްޓުވުމަށް ޓީޗަރުންނާއި ބެލެނިވެރިންނަށް އަމާޒުކޮށް ޕްރޮގްރާމެއް ފެށުން ހިމެނެއެވެ.

ޑިމޮކްރެޓްސް އިން ބުނީ، މަސްތުވާތަކެއްޗާއި ގުޅޭ ގައުމީ ސިޔާސަތާއި ފަރުވާގެ ނިޒާމު މައްސުނިވެ، ކޮރަޕްޝަން އާންމުވުވެފައިވާ ކަމަށެވެ. އަދި ފަރުވާއާއި ގުޅޭ މަސްއޫލިއްޔަތުތައް އަދާކުރުމަށް މުއައްސަސާތައް ނުކެޅެދިފައިވާ ކަމަށެވެ.

ހަބަރު ރިޔާސީ އިންތިހާބު 23 ދަ ޑިމޮކްރެޓްސް