ސިޔާސީ މުސްތަގުބަލާ ގުޅޭ މުހިއްމު ނިންމުމެއް މާދަމާ އިއުލާން ކުރައްވާނެ ކަމަށް ކުރީގެ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
ޝަހީމް މިފަދައިން ވިދާޅުވެފައި ވަނީ ޕީޕީއެމްގެ ރިޔާސީ ކެންޑިޑޭޓް ރައީސް އަބްދުﷲ ޔާމީންގެ ރަނިން މޭޓަކަށް ކުރީގެ ނައިބު ރައީސް ޑރ. މުހައްމަދު ޖަމީލު އަހުމަދު ކަނޑައަޅުއްވާފައި ވާ ދަނޑިވަޅެއްގައެވެ.
ޝަހީމް އަކީ އިދިކޮޅު ޕްރޮގްރެސިވް ކޮންގްރެސް ކޯލިޝނުގެ އެޑްވައިޒަރު ކަމަށް ވީނަމަވެސް ދާދިފަހުން ސިޔާސީ އެއްވެސް ހަރަކާތެއްގައި ޝަހީމް ބައިވެރި ވެވަޑައިނުގަންނަވާކަން ފާހަގަ ކުރެވެއެވެ. އަދި ޖުމްހޫރީ ޕާޓީއާ ޝަހީމް ގުޅިވަޑައިގަންނަވަން އުޅުއްވާ ކަމުގެ އަޑުތަކެއްވެސް ވަނީ ގަދަވެފައެވެ.
އެހެންނަމަވެސް ޝަހީމް ހަމައެކަނި ވިދާޅުވީ މާދަމާ ސިޔާސީ ނިންމުން އިއުލާން ކުރައްވާނެ ކަމަށެވެ.
މީގެ ކުރިންވެސް ޖަމީލުއާއި ޝަހީމް އާ ދެމެދު ހިޔާތު ތަފާތުވުން ތަކެއްވެސް އުފެދުނުއިރު ގާސިމްގެ ރަނިންމޭޓަކަށް ޝަހީމް ޝައުގުވެރިކަން ފާޅުކުރައްވާފައިވާ ކަމުގެ މައުލޫމާތު ތަކެއްވެސް ވަނީ އިވިފައެވެ.
ކުރީގެ އިސްލާމިކް މިނިސްޓަރުގެ ގޮތުގައި މަސައްކަތް ކުރެއްވި ޝަހީމަކީ 2018 ވަނަ އަހަރު ރައީސް ޔާމީންގެ ރަނިންމޭޓެވެ. އަދި މިއަހަރުވެސް ޝަހީމް އެ މަގާމަށް އުންމީދު ކުރެއްވި ކަމަށް ގިނަ ބަޔަކު އަންނަނީ ބުނަމުންނެވެ.
