ރޭ ފަތިހުގެ ވަގުތެއްގައި މޮސްކޯއަށް ޑްރޯން ހަމަލާތަކެއް ދީފި ކަމަށާއި، އެކަކު ޒަހަމްވި ކަމަށް އެގައުމުގެ ދިފާއީ ވިޒާރާއިން ބުނެފިއެވެ.
ޔޫކްރައިން އިން ދިން ކަމަށް ބުނާ މިހަމަލާގައި 3 ޑްރޯނެއް ބޭނުން ކުރި ކަމަށާއި 1 ޑްރޯން މޮސްކޯގެ ބޭރުން ވައްޓާލި އިރު 2 ޑްރޯން ޖޭމް ކޮށްލި ކަމަށް ބުނެއެވެ. މޮސްކޯގެ އިމާރާތަކަށް ވެއްޓުނީ ޖޭމް ކޮށްލި 2 ޑްރޯންއެވެ.
މިހާދިސާ އާ ގުޅިގެން މޮސްކޯގެ ވަށައިގެން އޮންނަ 4 އެއާޕޯޓުގެ ތެރެއިން 1 އެއާޕޯޓް މިހާރު ވަނީ ވަގުތީ ގޮތުން ބަންދުކޮށްފައެވެ.
މިއީ މި ނިމެމުން ދާ ޖުލައި މަހުގެ ތެރޭގައި މޮސްކޯއަށް އަމާޒުކޮށް ދޭ ޑްރޯން ހަމަލާގެ 4 ވަނަ ހަމަލާއެވެ. މި ހަމަލާތަކާއެކު ރަޝިއާގެ ގާބިލު ކަމާމެދު މުރާސިލުން ސުވާލު އުފައްދަމުން ދާއިރު 18 މަސްވީ ޔޫކްރައިން ހަނގުރާމައިން ރަޝިއާ އަށް ކުރި ހޯދިދާނެ ކަމާމެދުވެސް ދަނީ ސުވާލު އުފައްދަމުންނެވެ.
އެމެރިކާއާއި ހުޅަނގުން ފޯރުކޮށްދޭ ޒަމާނީ ހަތިޔަރާ އެކު ޔޫކްރައިންގެ ހަމަލާތައް ވަރުގަދަ ކުރަމުން ދާ މި ދަނޑިވަޅުގައި ދާދި ފަހުން ޔޫކްރައިން އިން ވަނީ މިހާނަތަށް ކަޅުކަނޑުގައި އެންމެ ބާރަށް ދުވާ ސީ ޑްރޯން ތައާރަފު ކޮށް، އޭގެ އެހީގައި ރަޝިއާގެ މަނަވަރުތަކަށް ވެސް ހަމަލާ ދޭން ފަށާފައެވެ. ކަނޑުގެ ކަޅުކުލައިގައި އޮންނަ ތިރި އެ ޑްރޯން އަކީ އަމާޒަށް ހަމަލާ ދިނުމުގެ ގާބިލުކަން ހިމެނޭ ގޮވާތަކެއްޗާއެކު ރިމޯޓުން ކޮންޓްރޯލް ކުރެވޭ ގޮތަށް ވޭލަރު ބައްޓަމަށް ތައްޔާރު ކޮށްފައި އޮންނަ ޑްރޯނެކެވެ.
ރޭ ފަތިހު މޮސްކޯއަށް އަމާޒުކޮށް ދިން ހަމަލާ އެރީ މޮސްކޯގެ ރަށް ބޭރުގައި ހުންނަ އުސް ދެ އިމާރާތަކަށެވެ. އާންމުވެފައި ވާ ފޮޓޯތަކުން ފެންނަ ގޮތުގައި، އިމާރާތުގެ އެއް ފްލޯއަށް ވަނީ ގެއްލުން ލިބިފައެވެ.
