53.33 މިލިއަން ރުފިޔާއަށް ށ.ނޫމަރާ ބަނދަރު ތަރައްގީ ކުރުމުގެ މަޝްރޫއު ސަރުކާރުން އެމްޓީސީސީއާ ހަވާލުކޮށްފިއެވެ.
މި މަޝްރޫއުގެ ދަށުން 5076 ކިއުބިކް މީޓަރު ކުރިން ފުންކޮށްފައިވާ ފަޅު އަލުން ފުންކުރުމާއި، 34,386 ކިއުބިކް މީޓަރު ސަރަހައްދެއްގެ އާ ހާބަރު ބޭސިން ފުންކުރުން ހިމެނެއެވެ. އަދި 2920 ކިއުބިކް މީޓަރު ސަރަހައްދެއްގެ ނެރު ފުންކުރުމާއި، 302.60 މީޓަރުގެ ސަރަހައްދެއްގެ ބޭރުތޮށި ލުމާއި، 64 މީޓަރުގެ ސަރަހައްދެއްގައި ރިވެޓްމެންޓް ޖެހުންވެސް ހިމެނެއެވެ.
މީގެ އިތުރުންވެސް 177 މީޓަރު ސަރަހައްދެއްގެ އެއްގަމުތޮށި ލުމުގެ އިތުރުން، 32 މީޓަރުގެ މިހާރު ހުރި އެއްގަމުތޮށި މަރާމާތު ކުރުމާއި، މޫރިންގެލް ބޯއީސް ހަރުކުރުމާއި، 11 މީޓަރު ދިގު އަދި 11 މީޓަރު ފުޅާ ރޭމްޕެއް ހެދުންވެސް ހިމެނެއެވެ. އަދި ދެ ޖެޓީއެއް ހެދުމާއި، ބަނދަރު ބައްތި ހަރުކުރުމާއި، 1652 އަކަ މީޓަރުގެ ސަރަހައްދެއްގައި ޕޭވްމަންޓް ހެދުމާއި، 311 މީޓަރުގެ ސަރަހައްދެއްގައި ކާބްސް ހަރުކުރުމުގެ މަސައްކަތްވެސް މި މަޝްރޫއުގެ ދަށުން ކުރުމަށް ވަނީ ހަމަޖެހިފައެވެ.
މި މަޝްރޫއުގެ ސަބަބުން 500 އަށްވުރެ ގިނަ އާބާދީ އޮންނަ ށ.ނޫމަރާ އަށް މީގެ ކުރިން ދިމާވަމުން އަންނަ ބޭރު ތޮށީގެ މައްސަލަތަކާއި ނެރު ފުން ކުރަންޖެހުމުގެ މައްސަލަތަކަށް ހައްލެއް ލިބިގެންދާނެ ކަމަށް އެ ރަށު ކައުންސިލުން ބުނިއެވެ. މީގެ އިތުރުންވެސް ޖާގަ ތަނަވަސް ޒަމާނީ ބަނދަރެއް ލިބި ފަރަށް އެރުމުގެ ހާދިސާ ތަކަަށް ނިމުމެއް އަންނާނެ ކަމަށް ކައުންސިލުން ވަނީ ބުނެފައެވެ.
މި މަޝްރޫއު ހަވާލުކުރުމަށް ހާއްސަ ރަސްމިއްޔާތެއް ބާއްވާފައިވާއިރު އެމްޓީސީސީގެ ފަރާތުން ސޮއި ކުރެއްވީ ސީއީއޯ އާދަމް އާޒިމްއެވެ. އަދި ހައުސިންގް މިނިސްޓްރީގެ ފަރާތުން ސޮއި ކުރެއްވީ ޕާލިމަންޓް ސެކްރަޓަރީ ޒީނިޔާ ހަމީދެވެ.
