ހެންވޭރުގެ ގެއެއްގައި 3 ދިވެހިން ރަހީނު ކޮށްފައި ތިއްބާ ސަލާމަތް ކޮށްފިއެވެ.
- އެމީހުން ރަހީނު ކުރުމުގެ ތުހުމަތުގައި 18 ނުފުރޭ ކުއްޖަކާއި އިތުރު ދިވެއްސަކު ފުލުހުން ވަނީ ހައްޔަރު ކޮށްފައެވެ.
- ރަހީނު ކުރި 3 މީހުންނަށް އެކި ވަރުގެ އަނިޔާ ލިބިފައި ވާތީ އައިޖީއެމްއެޗަށް ގެންގޮސް ދަނީ ފަރުވާ ދެމުންނެވެ.
ފުލުހުން ބުނީ ހެންވޭރު އަބަދަށް އުފާ މަގުގައި ހުރި ގެއެއްގައި ބަޔަކު ރަހީނުކޮށްފައި ތިބި ކަމުގެ މައުލޫމާތު މިއަދު ފުލުހުންނަށް ލިބުމާ ގުޅިގެން އެ ތަނަށް ފުލުހުން ގޮސް ބާރުގެ ބޭނުންކޮށްގެން އެތަނުގެ އެތެރެއަށް ވަދެފައި ވާކަމަށެވެ.
އިތުރަށް ފުލުހުން ބުނީ އެ ތަނުގައި ރަހީނުކޮށްފައި ތިބި ދިވެހި ތިން ފިރިހަނުން ތިބި ކަމަށާ އެމީހުންނަށް އެކިވަރުގެ އަނިޔާ ލިބިފައިވާ ކަމަށެވެ. އަދި އެމީހުން ސަލާމަތްކޮށް ޑޮކްޓަރަށް ދެއްކުމަށް އެމީހުން އައިޖީއެމްއެޗް އަށް ގެންގޮސްފައި ވާކަމަށްވެސް ބުންޏެވެ.
މީގެ އިތުރުން ފުލުހުން ބުނީ މި މައްސަލަ އާ ގުޅިގެން ދިވެހި ފިރިހަނަކާއި އަށާރަ އަހަރުން ދަށުގެ ފިރިހެން ކުއްޖަކު ފުލުހުންގެ ބެލުމުގެ ދަށަށް ގެންގޮސްފައިވާ ކަމަށެވެ.
މި މައްސަލައާ ގުޅޭ އިތުރު ތަފްސީލެއް ފުލުހުން ހާމަކޮށްފައި ނުވާއިރު ފުލުހުން އަންނަނީ އިތުރަށް މި މައްސަލަ ތަހުގީގު ކުރަމުންނެވެ.
