ހއ. ފިއްލަދޫ، ހިތަށްފިނިވާގޭގައި ރޭ މެންދަމުގެ ވަގުތުގައި ހިނގި އަލިފާނުގެ ހާދިސާގައި އެ ގެ އެއްކޮން އަނދާ ހުލިވެއްޖެއެވެ.
އެ ހާދިސާއާ ގުޅޭ ގޮތުން "ދަ ޕްރެސް" އަށް މައުލޫމާތު ދެއްވަމުން އެ ރަށު ކައުންސިލްގެ ރައީސް ފަތުހުﷲ ހަސަން ވިދާޅުވީ އެ ހާދިސާ ހިނގާފައިވަނީ ރޭ މެންދަމު 1 ޖަހާ ހާއިރު ކަމަށާއި އެ ގޭގައި 7 މީހުން ދިރިއުޅުން ދިޔަ ކަމަށެވެ. އޭގެ ތެރޭގައި ތިން ކުޑަކުދިންނާއި ދެ އަންހެނެއްގެ އިތުރުން އުމުރުން ދުވަސްވީ ދެ މީހަކު ދިރިއުޅުމުން ދިޔަ ކަމަށް ފަތުހުﷲ ވިދާޅުވިއެވެ.
އެ ހާދިސާގައި މުޅި ގެ އެއްކޮށް އަނދާ ހުލިވެފައިވާ އިރު ލިބުނު ގެއްލުމުގެ އަގު އަދި އެނގިފައިނުވާ ކަމަށާއި ލިބުނު ގެއްލުމާއި ހަލާކުވީ ކޮން އެއްޗެއްސެއްތޯ ބެލުމުގެ މަސައްކަތް މިހާރު ކުރަމުންދާ ކަމަށް ފަތުހުﷲ ވިދާޅުވިއެވެ.
އެ ހާދިސާ ހިނގި އެ ވަގުތު އެ ގޭގެ އެންމެން ތިބީ ނިދާފައި ކަމަށާއި އެ ގޭގައި އުޅޭ އަންހެނަކަށް ހޭލެވުނީ ހޫނުވެގެން ކަމަށް ފަތުހުﷲ ވިދާޅުވިއެވެ. އަދި ކޮޓަރިން ނިކުމެ ބެލި އިރު މީޓަރު ބޯޑުގައި އަލިފާންރޯވެ ސީލިންގާއި ސޯފާއެއްގައިވެސް އަލިފާން ހިފާފައިވާ ކަަމަށް އެ މީހާއާ ހަވާލާދީ ފަތުހުﷲ ވިދާޅުވިއެވެ.
ފަތުހުﷲ އިތުރަށް ވިދާޅުވީ ކައުންސިލްގެ ބެލުމުގެ ދަށުން މިހާރު އެ މީޙުން ތިބީ ވަގުތީ ހިޔާއެއްގައި ކަމަށެވެ.
އެކަމާ ގުޅިގެން އެންޑީއެމްއޭއިން ބުނީ އެ ހާދިސާގައި ދިިރިނޫޅެވޭ ވަރަށް އެ ގެ އަނދައިގެން ގޮސްފައި ވާތީ އާާއިލާއަށް ބޭނުންވާ އެހީތެރިކަން ދެނެގަތުމުގެ މަސައްކަތް ކައުންސިލާ ގުޅިގެން އެ އޮތޯރިޓީން ކުރަމުން އަންނަ ކަމަށެވެ.
