އާބަންކޯއިން ހުޅުމާލޭގައި ތަރައްގީކުރަމުން އަންނަ ކޮންޓެއިނާ ޕާކުގައި ކޯ-ވާކިންގް ސްޕޭސް އެއް ހެދުމަށް އެއްބަސްވުމުގައި ސޮއިކޮށްފިއެވެ.
އަލަށް ފަށައި ގަންނަ، ކުދި އަދި މެދު ފަންތީގެ ވިޔަފާރިތަކަށް ހާއްސަކޮށްގެން ތަރައްގީކުރާ މި ކޯ-ވާކިން ސްޕޭސްގެ އެއްބަސްވުމުގައި އާބަންކޯގެ ފަރާތުން ސޮއިކުރެއްވީ ކުންފުނީގެ މެނޭޖިން ޑިރެކްޓަރު އަހުމަދު އާތިފެވެ. އިކޮނިމިކް މިނިސްޓްރީގެ ފަރާތުން ސޮއިކުރެއްވީ ސްޓޭޓް މިނިސްޓަރު ނީޒާ އިމާދެވެ. އަދި ބީސީސީގެ ފަރާތުން ސޮއިކުރެއްވީ މެނޭޖިން ޑިރެކްޓަރު ފަޒްލީނާ ފާކިރެވެ.
އާބަންކޯ އިން ބުނީ ހުޅުމާލޭގައި ތަރައްގީކުރަމުން އަންނަ ކޮންޓެއިނާ ޕާކުގައި ކޯ-ވާކިންގް ސްޕޭސް އެއް ތަރައްގީކުރުމަށް ނިންމީ އެ ތަނަށް އިތުރު ފުރިހަމަކަމެއް ގެނެސްދީ، އެތަނުން ލިބޭ ހިދުމަތްތައް އިތުރުކުރުމުގެ ގޮތުން ކަމަށެވެ.
އާބަންކޯ އިން ބުނީ ފަށައިގަންނަ ވިޔަފާރިތަކަކީ ވަކި އޮފީސް ސްޕޭސްއެއް ހިންގުމުގެ ބުރަތައް އުފުލަން އެންމެ އެކަށީގެންވާ ވަރަށް ތައްޔާރުވެފައި ނުވާނެ ވިޔަފާރިތަށް ކަމަށެވެ. އެހެންކަމުން އެފަދަ ވިޔަފާރިތައް ކުރިއެރުމަށް ބޭނުންވާ އެންމެ މުހިންމު އެއްކަމަކީ މަސައްކަތްކުރަން އެކަށީގެންވާ މާހައުލެއް ފޯރު ކޮށްދިނުންކަމަށެވެ. އަދި ހުޅުމާލޭގައި ތަރައްގީކުރާ ކޮންޓެއިނާ ޕާކުގައި މިފަދަ ތަނެއް ހެދުމުގެ މައިގަނޑު މަގްސަދަކީ ހުޅުމާލޭގެ ތަރައްގީ އާއި ޒުވާނުންގެ ކުރިއެރުމަށްވެސް މަގުފަހިކުރުންކަމަށް އާބަންކޯ އިން ވަނީ ބުނެފައެވެ.
ރެޑްވޭވް މެގަމޯލް ފަހަތުގައި ތަރައްގީކުރަމުން އަންނަ ކޮންޓެއިނާ ޕާކަކީ ރާއްޖެގައި ތަރައްގީކުރާ ފުރަތަމަ ކޮންޓެއިނާ ޕާކެވެ. އެތަނުގެ މަސައްކަތް މިހާރު ނިމުމަކާ ގާތްވެފައިވާއިރު، އެތަނުގައި ހަދާ ކޯ-ވާކިން ސްޕޭސްއަކީ ރާއްޖޭގައި ހުޅުވާ މިފަދަ ދެވަނަ ތަނެވެ.
ކޯ-ވާކިންގް ސްޕޭސެއްގެ އިތުރަށް މި ކޮންޓެއިނާ ޕާކުގައި އިތުރަށް ދެ ކެފޭ ވެސް ހިންގުމަށް ވަނީ ނިންމާފައެވެ. އަދި ކެފޭ ހިންގުމަށް ޝައުގުވެރިކަން ހުރި ފަރާތްތަކަށް މިހާރު ވަނީ އެ ފުރުސަތު ހުޅުވާލާފައެވެ.
