ރައީސް އަބްދުﷲ ޔާމީންގެ މައްޗަށް އުފުއްލާފައިވާ މަނީ ލޯންޑަރިންނާއި ރިޝްވަތު ހިފުމުގެ ކުށުގެ މައްސަލަ އަނބުރާ ގެންދިއުމަށް އެދި ޕީޕީއެމުން ޕްރޮސެކިއުޓާ ޖެނެރަލް ހުސައިން ޝަމީމުއާ ބައްދަލު ކުރައްވައިފިއެވެ.
އިދިކޮޅު ޕީޕީއެމުން ބުނީ ޕީޖީގެ އަރިހަށް ދިޔަ މައިގަނޑު ސަބަބަކީ އެމްއެމްޕީއާރުސީ ހިޔާނާތުގެ މައްސަލައިގައި ހިމެނޭ ބޭފުޅުންނަށް ދައުވާ ކުރުމުގައި ތަފާތު ކުރުންތައް ގެންގުޅޭތީ ކަމުގައެވެ. އަދި އެ މައްސަލައިގައި ހިމެނޭ ބައެއް ބޭފުޅުންގެ މައްސަލަ އަނބުރާ ގެންދިޔަ ގޮތަށް ރައީސް ޔާމީނުގެ މައްސަލަ ވެސް އަނބުރާ ގެންދިއުމަށް ޕީޖީގެ އަރިހުން އެދިފައިވާ ކަމަށެވެ.
ޕީޖީއާ ބައްދަލުކުރުމަށްފަހު ވާހަކަ ދައްކަވަމުން ޕީއެންސީގެ ރައީސް އަބްދުއްރަހީމް އަބްދުﷲ (އަދުރޭ) ވިދާޅުވީ އެބޭފުޅުންގެ ސުވާލުތަކަށް ޕީޖީ ޝަމީމު ދެއްވީ ޖުމްލަ ޖަވާބެއް ކަމަށާއި އެއީ ޝަމީމު ބައްލަވަނީ މެންޑޭޓުގައި ހިމެނޭކަންކަން ކަމުގައެވެ. ރައީސް ޔާމީނުގެ މައްސަލައިގައި ގޯސްތަކެއް ހަދާފައިވާކަން ޝަމީމު ގަބޫލު ކުރާކަން އޭނާގެ ވާހަކައިން އެނގޭ ކަމަށް ވެސް އަދުރޭ ވިދާޅުވިއެވެ.
މީގެ އިތުރަށް އަދުރޭ ވިދާޅުވީ ޝަމީމު ހުރި މަގާމުގެ ގޮތުން އެ ވާހަކަ ވިދާޅުވާން ދަތިވަނީ ކަމުގައެވެ. މިކަމަށް ހެއްކެއްގެ ގޮތުގައި އަދުރޭ ފާހަގަކުރެއްވީ ރައީސް ޔާމީންގެ 52.6 މިލިއަން ރުފިޔާ ދައްކަން ކުރި އަމުރު ބާތިލުކުރުން ސްޕުރީމް ކޯޓުގައި އެޕީލް ނުކުރެއްވީ މައްސަލަ ނިންމާފައިވަނީ ރަނގަޅަށް ކަމަށް ގަބޫލު ކުރެވޭތީ ކަމަށެވެ.
މިހާރު އޮތް ރައީސް ޔާމީނުގެ މައްސަލަ ވެސް ސަރުކާރުން ނުފޫޒު ނުފޯރުވައިފިނަމަ ނިމޭނީ ރައީސް ޔާމީނުގެ ކޮޅަށް ކަަމަށް ޝަމީމާ ހަވާލާދީ އަދުރޭވަނީ ވިދާޅުވެފައެވެ. އަދި ރައީސް ޔާމީންގެ މައްސަލަ ރިޔާސީ އިންތިހާބުގައި ބައިވެރިވުމުގެ ފުރުސަތު އޮއްވާ ނިމެންޖެހޭނެ ކަމަށް ގަބޫލުކުރައްވާ ކަމަށް ވެސް ޝަމީމާ ހަވާލާދީ އަދުރޭ ވިދާޅުވިއެވެ.
ވ. އާރަށް ކުއްޔަށް ދޫކުރުމުގައި ރިޝްވަތާއި މަނީ ލޯންޑަރިންގެ ކުށް ސާބިތުވުމާ ގުޅިގެން ރައީސް ޔާމީނަށް ވަނީ އެ ދެ މައްސަލައިގައި 11 އަހަރުގެ ޖަލު ހުކުމެއް އިއްވާފައެވެ. އެ ހުކުމް ޔާމީންގެ މައްޗަށް އިއްވީ މިދިޔަ ޑިސެމްބަރު 25، 2022 ގައެވެ. އަދި ޔާމީންގެ ވަކީލުން ޔާމީން ޖަލަށް ލާން ކުރި ހުކުމް ވެސް ހައިކޯޓުގައި އިސްތިއުނާފު ކުރުމުން އެ ކޯޓުން ވަނީ އިސްތިއުނާފު ބަލާގެންފައެވެ.
ވ. އާރަށް ކުއްޔަށް ދޫކުރުމުގައި ރިޝްވަތާއި މަނީ ލޯންޑަރިންގެ ކުށް ސާބިތުވުމާ ގުޅިގެން ހަ މަސް ދުވަހުގެ ތެރޭގައި 52.6 މިލިއަން ރުފިޔާ ދެއްކުމަށް ކްރިމިނަލް ކޯޓުން ކުރި އަމުރު މި މަހުގެ 11 ވަނަ ދުވަހު ހައި ކޯޓުންވަނީ ބާތިލު ކޮށްފައެވެ.
