ސައުދީ ފަންޑް ފޯ ޑިވެލޮޕްމަންޓްގެ އެހީގައި ހުޅުމާލޭގައި އިމާރާތްކުރުމަށް ހަމަޖެހިފައިވާ 400 ހައުސިން ޔުނިޓް ޑިޒައިންކޮށް ސުޕަވައިޒް ކޮށްދޭނެ ކޮންސަލްޓަންސީ ފާމެއް ހޯދަން ފިނޭންސް މިނިސްޓްރީ އިން އިއުލާނު ކޮށްފިއެވެ.
ފިނޭންސް މިނިސްޓްރީ އިން ކުރި އިއުލާނުގައި ވަނީ މި ކޮންސަލްޓަންސީ ހިދުމަތުގެ ތެރޭގައި ޓެންޑާ ޑޮކިއުމަންޓުތައް ތައްޔާރުކުރުން؛ އީއައިއޭ ރިޕޯޓް ތައްޔާރުކުރުން، ޑީޓެއިލްޑް ޑިޒައިން ރިވިއުކުރުމުގެ އިތުރުން ކޮންޓްރެކްޓާގެ މަސައްކަތްް ސުޕަވައިޒް ކުރުން ހިމެނޭ ކަމަށެވެ.
މިމަސައްކަތް ކޮށްދޭނެ ފަރާތެއް ހޮވުމަށް ހަމަޖެހިފައިވަނީ ސައުދީ ފަންޑް ފޯ ޑިވެލޮޕްމަންޓް ގެ "ގައިޑްލައިން ފޯ ޔޫސް އޮފް ކޮންސަލްޓަންޓްސް" އާ އެއްގޮތަށް ކުއަލިޓީ އެންޑް ކޯސްޓް ބޭސްޑް ސިލެކްޝަން (ކިއުސީބީއެސް) އުސޫލުގެ މަތިންނެވެ.
މަސައްކަތަށް ޝައުގުވެރިވާ ފަރާތްތަކުން އަންނަ އޭޕްރީލް މަހުގެ 26 ވާ ބުދަ ދުވަހުގެ މެންދުރު 1:00 ގެ ކުރިން، "އެކްސްޕްރެޝަން އޮފް އިންޓަރެސްޓް" ފިނޭންސް މިނިސްޓްރީއަށް ފޮނުވުމަށް ވަނީ ފުރުސަތު ހުޅުވާލާފައެވެ. އަދި އީމެއިލް މެދުވެރިކޮށް ހުށަހެޅޭ "އެކްސްޕްރެޝަން އޮފް އިންޓަރެސްޓް" ބަލައި ނުގަންނާނެ ކަމަށް ވެސް ފިނޭންސް މިނިސްޓްރީއިން ވަނީ ބުނެފައެވެ.
މި މަސައްކަތްތަކާއި ގުޅޭ މައުލޫމާތު ހިމެނޭ ގޮތަށް ތައްޔާރުކޮށްފައިވާ ޓާމްސް އޮފް ރިފަރެންސް (ޓީއޯއާރް) ފިނޭންސް މިނިސްޓްރީގެ ވެބްސައިޓް އިން ޑައުންލޯޑް ކުރެވޭނެއެވެ.
