އއ. މަތިވެރި އުމުރުން 73 އަހަރުގެ ހަސަން އަލީ (ހަސަންފުޅު) ހޯދަން 157 ގަޑިއިރުގެ ސީސީޓީވީ ފުޓޭޖު ދިރާސާކޮށްފައިވާ ކަމަށް ފުލުހުން ބުނެފިއެވެ.
ފުލުހުން ބުނީ ހަސަންފުޅު ގެއްލިފައިވާ މައްސަލައިގެ ތަހުގީގުގައި މަތިވެރިން ލިބެން ހުރި ހުރިހާ ސީސީޓީވީ ފުޓޭޖްތައް ހޯދައި 157 ގަޑިއިރުގެ ފުޓޭޖް ދިރާސާކޮށްފައި ވާއިރު އެ ފުޓޭޖްތަކުން ހަސަންފުޅު އެންމެ ފަހުން ފެނިފައި ވަނީ މިދިޔަ ޖެނުއަރީ 31 ވަނަ ދުވަހުގެ ހެނދުނުގެ 9:30 ހާއިރު އެ ރަށުގެ ފިހާރައަކަށް ވަދެ ނިކުންނަނިކޮށް ކަމަށެވެ.
ތަހުގީގަށް ލިބުނު މައުލޫމާތާ ގުޅިގެން މާލޭގެ ބައެއް ސަރަހައްދުތަކުގެ ސީސީޓީވީ ކެމެރާތައްވެސް ބެލިކަން ފާހަގަކޮށް ފުލުހުން ބުނީ ތަހުގީގުގެ ތެރެއިން މިހާތަނަށް 199 މީހުންގެ ފަރާތުން މައުލޫމާތު ސާފުކޮށް އަދި 29 މީހެއްގެ ބަޔާން ނަގާފައިވާ ކަމަށެވެ.
ހަސަންފުޅު ގެއްލިގެން މި މަހުގެ 1 ވަނަ ދުވަހު 09:37 ހާއިރު ފުލުހަށް ރިޕޯޓުކޮށްފައި ވާއިރު ހަސަންފުޅު ހޯދަން ރަށުގައި މީހުން ދިރިއުޅޭ ހުރިހާ ގެއަކާއި ރަށުގެ ހުރިހާ ފަޅު ގޯތިތަކާއި ގެވަޅު އަދި ހުސް ބިންތަކާއި ރަށުގައި ހިންގާ ހުރިހާ ގެސްޓް ހައުސްތަކާއި ކެފޭ ރެސްޓޯރެންޓު އަދި ރަށުގެ ހޭޅިފަށާއި ގޮނޑުދޮށާއި ވަލުތެރެ ހިމެނޭހެން ރަށުގެ ހުރިހާ ސަރަހައްދަކާއި ވަޅުފަދަ ތަންތަން ވަނީ ބަލާ ފާސްކޮށްފައިވާ ކަމަށް ފުލުހުން ވަނީ ބުނެފައެވެ.
ރަށުގެ ހުރިހާ އޮޑިދޯނި ފަހަރު ބަލައި އެއްވެސް ރަށަކަށް ހަސަންފުޅު ގޮސްފައިވޭތޯ ބެލުމުގެ މަސައްކަތް ކޮށްފައިވާ ކަމަށާއި އޭނާ އާންމުކޮށް ގޮސްއުޅޭ ރަށްރަށާއި އެ ރަށްރަށަށް ގޮސް އޭނާ އާންމުކޮށް ގޮސްއުޅޭ ގޭގޭގެ މީހުންނާ ސުވާލުކޮށް އެއްވެސް މައުލޫމާތެއް ލިބޭތޯ ބަލާފައިވާ ކަމަށް ވެސް ފުލުހުން ބުނެއެވެ.
ފުލުހުން ބުނީ ރަށުގެ ގޮނޑުދޮށުން ފެށިގެން ފަޅާއި ފަރު އަދި ކަނޑުގެ ސަރަހައްދު ފީނައިގެން ބަލާފައިވާ ކަމަށާއި މަތިވެރި ކައިރީގައިވާ ފަޅުރަށްރަށާއި ތިލަތަކާއި ފަޅުތައް ވެސް ފީނައިގެން ބަލާފައިވާ ކަމަށެވެ. އަދި ވައިގެ މަގުންވެސް އެ ސަރަހައްދުތައް ބަލާފައިވާ ކަމަށްވެސް ފުލުހުން ވަނީ ބުނެފައެވެ.
ފުލުހުން ވަނީ ހަސަންފުޅާ ބެހޭ އެއްވެސް މައުލޫމާތެއް ލިބިފައިވާ ފަރާތެއް ވާނަމަ، ފުލުހުންގެ ހޮޓްލައިން 3322111 ނުވަތަ އެންމެ ކައިރި ޕޮލިސް ސްޓޭޝަނަކަށް އަންގައިދިނުމަށް އެދިފައެވެ.
